1 Want'hu wa Izilaeli waikaga kilapi wakanda uko Mizipa kugamba, "Hahande na mnt'hu yoyose akuunga amloze mwana kike ywakwe kwa want'hu we dikabila dya Benjamini." 2 Ivo want'hu awo waitaga Beseli niyo wekala uko ha Zumbe Mnungu mpaka kisingi, wailaga kwa izwi kulu na usungu, 3 wakagamba, "Zumbe Mnungu, Mnungu wa Izilaeli, nii mbuli ino yalaila niyo chahungukilwa ne dikabila dimwenga mwe Izilaeli?"

4 Kwize kuche want'hu wazenga he kilingo cha kutambikila niyo walava malavo yo koka na malavo yo utondowazi. 5 Niyo wauzana, "Ni kabila dihi dya Izilaeli hadizile ho mdugano ha Zumbe Mnungu?" Kwaviya waikaga kilapi kugamba mnt'hu yoyose hebuile ha Zumbe Mnungu uko Mizipa aungwa akomwe. 6 Ivo Waizilaeli niyo wanda na kinyulu kwajili ya wandugu zawe Wabenjamini, niyo wagamba, "Dielo dikabila dimwenga dyaga. 7 Haluse nekitende vivihi vileke kiwapatile wavele awo wagosi we dikabila dya Benjamini wasigale? Kwaviya kikelisa kwa zina dya Zumbe Mnungu kugamba hekiwenk'he wana kike wetu wande wavele wawe!"

8 Weze wauze uneva kwandaga na fyo mwa makabila ya Waizilaeli hediibuile kwo mdugano uko Mizipa, wabunk'hula kugamba hahana hata yumwenga akulawa Yabeshi Gileadi ezile mwe nk'hambi kwaajili yo mdugano. 9 Waizilaeli weze wawazigwe waonaga hahana mnt'hu yoyose wa Yabeshi Gileadi andaga aaho.

10 Ivo wadya wadugane wawatumaga watowani hewekogoha alufu mlongo na mbili, niyo awagamba, "Iteni Yabeshi Gileadi mkawakome wadya wakwikala uko wavele hamwenga na wana. 11 Komeni wagosi wose wagonile na wavele na wavele wose wagonile na wagosi." 12 Wawabwilaga wandele wakwikala Yabeshi Gileadi wali na mazanga wakubula magana mane niyo wawegalaga mwe nk'hambi uko Shilo mwe isi ya Kanaani.

13 Ivo mdugano wose watumaga want'hu wegale ulosi wo utondowazi kwa want'hu we dikabila dya Benjamini awo wandaga uko kwo luwe lwa Limoni. 14 Ivo wadya wagosi we dikabila dya Benjamini wauyaga kwa wandugu zawe, niyo wenk'higwa wadya wavele wasigale uko Yabeshi Gileadi. Mna wavele awo wandaga hawakukint'ha kwa wagosi.

15 Waizilaeli wawaonelaga mbazi want'hu we dikabila dya Benjamini, kwaviya Zumbe Mnungu ausaga uhamwenga wawe na makabila ya Izilaeli. 16 Ivo wadala wo mdugano niyo wagamba, "Haluse kitendei vileke kiwenk'he wavele awo wasigale, kwaviya wavele wose we dikabila dya Benjamini wakomwagwa pele? 17 Wadya wagosi wasigale we dikabila dya Benjamini vaungwa wenk'higwe wavele vileke wadigendeleze, kabila dyodyose dya Izilaeli disekwaga. 18 Mna hakikudaha kuwenk'ha wana kike wetu wande wavele wawe, kwaviya suwe Waizilaeli kiika kilapi cha kumligita, mnt'hu yoyose akumloza mwana kike ywakwe kwa mgosi we dikabila dya Benjamini."

19 Niyo wagamba, "Kaula kuna zuwa dya kinyemi kila mwaka dya Zumbe uko Shilo mkoma mahanya ya Beseli nt'hendelo ya ulailo wa zuwa mwe idya sila ikulawa Beseli kuita Shekemu na nt'hendelo ya Kwa mwenye mzi ya Lebana." 20 Ivo wawalagizaga wadya wagosi we dikabila dya Benjamini na kuwagamba, "Iteni mkakefise mwe migunda ya mizabibu. 21 Wandele wa Shilo wanalawa kuse na kuseziga, nyuwe laweni mwe iyo migunda ya mizabibu na kila yumwenga amgwiile mndele yumwenga akajika waguheni muite nawo mwe isi ya Benjamini. 22 Tati zawe hegu ndugu zawe waneza kulabila nekiwagambe, ‘Suwe chawalombezani muwaonele mbazi want'hu wa Benjamini na kuwaleka wawaguhe wavele awo, kwaviya hakipatile wavele wakukint'ha mwo luisi lwe nk'hondonk'hondo ya Yabeshi Gileadi. Naho homnde na masa kwaviya hiyo nyuwe muwenk'hile awo wana kike wenyu, homsengelwe kugamba mbananga ikilapi.’"

23 Wagosi we dikabila dya Benjamini wadamanyaga ivo. Umwo wandele wandaga wakaseziga, kila mnt'hu amgwilaga mndele yumwenga niyo amguha na kuita naye vileke ande mkaziwe. Ivo wauyaga mwe isi yawe na kuizenga mizi yawe uhya na kwikala umo.

24 Mwo lupisi ulo Waizilaeli wahalawaga, kila mnt'hu auyaga kwe dikabila dyakwe no lukolo lwakwe, kila mnt'hu aho apangilwe.

25 Mwe mazuwa ayo kwandaga hahana seuta mwa Izilaeli, kila mnt'hu adamanyaga kiya aone ni chedi.