1 Waizilaeli watendaga uihi ha Zumbe, niyo Zumbe awaleka wekailwe ni Wamidiani kwa lupisi lwa miyaka mfungate. 2 Wamidiani wawasulumizaga vitendese Waizilaeli, ivo Waizilaeli wawanyilikaga na kukefisa kwa mabome na mp'hanga uko kwo mnima. 3 Kila aho Waizilaeli wahandaga mbeyu zawe uko kwo mgunda, Wamidiani na Wamaleki na want'hu watuhu wa uko ulailo wa zuwa wezaga kuwatowa Waizilaeli. 4 si izo neziika nk'hambi mwe isi, na kubananga ulozo wose mwe isi mpaka mhaka na Gaza, Waizilaeli hawasilwagwa chochose, ngoto hegu ng'ombe hegu mp'hunda. 5 Wezaga wengi enga sige wakanda na mahema na mifugwa yawe, woho ne ngamia zawe zandaga wengi hewekuwazika ivo waibananga isi ya Izilaeli. 6 Wamidiani wawatendaga Waizilaeli kunda wakiwa. Waizilaeli wamwiilaga Zumbe.

7 Waizilaeli weze wamwiile Zumbe Mnungu awausile makunt'ho ayo wayapataga kwa Wamidiani, 8 Zumbe Mnungu awenk'haga mlotezi. Mlotezi uyo niyo awagamba, Zumbe Mnungu ywa Izilaeli agambaga, "Nawalavagani mwe isi ya Misili uko mwandaga watumwa. 9 Naho nawakombolagani mwo udahi wa Wamisili na kulawa mwa want'hu watowanaga na nyuwe mwe isi ino. Nawagulusaga umwo mwandile mkeza niyo nawenk'hani isi yawe. 10 Nawagambilagani kugamba ni miye Zumbe Mnungu ywenyu, naho msekuivika milungu ya Waamoli awo mkwikala mwe isi yawe. Mna hamwanitegelezaga."

11 Mtumigwa ywa Zumbe niyo aita na kwikala hasi yo mti wa mwaloni wa Yoashi ywo lukolo lwa Waabiezeli uko Ofula. Gidioni mwana ywa Yoashi andaga akaheta ngano, kundani hant'hu ha kukamila zabibu vileke Wamidiani wasekumuona. 12 Mtumigwa ywa Zumbe Mnungu amlailaga akamgamba, "Zumbe Mnungu ehamwenga na weye mtoani hekogoha."

13 Gidioni niyo amgamba, "Mkulu, uneva Zumbe Mnungu ehamwenga na suwe, nii mbuli izi zose zilaila kwetu? Wikuhi udamanyi wa kweheela uwo chagambilwagwa na wakale wetu wakagamba, hiyo Zumbe akigalavga kulawa Misili. Mna Zumbe kakileka naho kukitenda kikailwe ni Wamidiani."

14 Niyo Zumbe Mnungu amhitukilaga na kumgamba, "Ita kwa udahi uwo unanao, ukaikombole Izilaeli kulawa mwa Wamidiani. Ni miye mwenye hukutuma."

15 Gidioni niyo amhitula, "Mna Zumbe, nenidahe vivihi kuikombola Izilaeli? lukolo lwangu nulo lusokelese mwe dikabila dya Manase, miye mwenye name ni mdodo mwe kaya yetu."

16 Zumbe Mnungu niyo amgamba, "Nohwink'he udahi, naho weye nouwatowe Wamidiani enga kugamba wakoma mnt'hu yumwenga."

17 Gidioni niyo amgamba, "Uneva kunizumila, unink'he kilagiso kugamba ni weye kindedi ulongile na miye. 18 Nakulombeza usekuhalawa aha mpaka aho neniuye na kukwigaila malavo yangu na kuika hameso hako." Naye amhitulaga, "Nehugoje aha mpaka aho nouwiye."

19 Gidioni engilaga kwe nyumba niyo ambika nyama ya mbuzi na mikate na makopo mlongo ya unga heigeligwe ugwadu. Aigelaga idya inyama mwe nt'hangulu, niyo agela msuzi mwe nyungu na kumwigaila hasi yo mti wa mwaloni na kumwink'ha. 20 Mtumigwa ywa Mnungu amgambaga, "Guha inyama ne mikate iyo uwiike mnanga mwo luwe ulu. Akajika gela msuzi mnanga mwe nyama ne mikate." Naye niyo adamanya ivo. 21 Mtumigwa ywa Zumbe alolotezaga ne ngoda niyo akwafa inyama ne mikate. Aaho moto walawaga mwo luwe niyo wayoka pele idya inyama ne mikate. Mtumigwa ywa Zumbe niyo aga.

22 Gidioni eze amanye kugamba yudya andaga mtumigwa ywa Zumbe Mnungu, ogohaga niyo agamba, "Ha! Zumbe, hangi miye mwenye, kwaviya himuona mtumigwa ywako na meso yangu!"

23 Mna Zumbe Mnungu niyo amgamba, "Utondowazi unde na weye! Usekogoha naho houbanike."

24 Gidioni amzengelaga Zumbe Mnungu hant'hu ha kulavila malavo uko na kuhetanga, "Zumbe Mnungu ni utondowazi" Hant'hu ha kulavila malavo. Hant'hu aho hakei uuko uko Ofula ya Wabiezeli mpaka dielo.

25 Kilo icho Zumbe Mnungu amgambaga Gidioni, "Guha njeku imwenga kwa iso, njeku idya ya kaidi ya lika dya miyaka mfungate. Mola hant'hu ha iso hant'hu ha nt'hambiko kwa Baali, bananga dihili dya Ashela dihank'handa hakwe. 26 Ukamzengele Zumbe Mnungu ywako kilingo cho kutambikila enga ivo vikuungwa aha he digundi idi, niyo wanilavila malavo ya kokwa pele ye njeku idya ya kaidi kwa nk'huni ze dihili diya dya Ashela wadimoile." 27 Ivo, Gidioni aguhaga wandima wakwe mlongo, adamanyaga enga ivo alagizwagwa ni Zumbe Mnungu. Mna kwaviya awogohoga wanduguze na want'hu wa komzi, hadahile kuyadamanya ayo nomsi, ivo ayadamanyaga nekilo.

28 Kilokilo wakaya wo mzi weze wenuke waonaga kilingo cha nt'hambiko ya Baali no mkola wa Ashela wandile hadya umoligwa. Idya njeku yandaga yokigwa mnanga mwe kilingo cho kutambikila kizengigwe. 29 Wakeuzaga, "Niani adamanye mbuli ino?" Weze wadamanye upelembi, wabunk'hulaga kugamba ni Gidioni mwana Yoashi niye adamanye aya. 30 Wakaya wo mzi niyo wamwizila Yoashi, wakamgamba, "Mlave mwanao kimkome, kwaviya kamola kilingo cho kutambikila cha Baali na kudibozola dihili dya Ashela idyo dyandaga hagihi."

31 Ivo Yoashi niyo awagamba wose wamwiziilaga, "Nyuwe mwamgombela Baali? Mwageza kumyokola? Yeyose akuunga amgombele naakomigwe kukei kutandazuka. Uneva Baali ni Mnungu kindedi naakegombele mwenye umwo mnt'hu akamola kilingo chakwe cha kutambikila." 32 Zuwa idyo wamwitangaga Gidioni "Yelu Baali", Nukokugamba "Mneke Baali akegombele mwenye", kwaviya Gidioni amolaga kilingo chakwe cha kutambikila.

33 Niyo Wamidiani na Waamaleki na makabila yose yakwikala ulailo wa zuwa wadendeluka mto Yolodani na kuika nk'hambi zawe mwe dikolongo dya Yezeli. 34 Niyo Muye ywa Mnungu amlongoza Gidioni. Gidioni niyo atoa digunda akawetanga Wabiezeli wamtimile. 35 Atumaga wegala ulosi mwe isi yose ya Manase weze wamtimile niyo atuma wegala ulosi watuhu wawetange want'hu wa makabila ya Asheli na Zabuloni na Nafutali. Woho nawo wakwelaga wakamtimila.

36 Gidioni amgambaga Mnungu, "Uneva noikombole Izilaeli kwa udahi nounink'he enga ivo ugambile, 37 Kaula naika nk'hingo ya ngoto ho lwazo lwo kuhetela. Uneva nokunde na mnyuzu uuwo du, mna kiwasa kindanda kinyala niho nenimanye kugamba nouiyokole Izilaeli kwa udahi nounink'he enga ivo ulongile." 38 Niyo vanda ivo, kwaviya eze enuke, aukamulaga mnyuzu wandaga mnanga mwe kink'ho idya iyo kumemeza lwiga. 39 Gidioni niyo agamba, "Mnungu, nakulombeza usekuniihia. Nilekele nilombeze uulu du. Nalombeza nilekele gezo dimwenga du. Mwo lupisi ulu niitende ink'hingo inde inyala mna sanga inde na mnyuzu." 40 Mnungu niyo adamanya ivo kilo icho, kwaviya mnanga mwe nk'hingo mwandaga kunyala mna hasi mwe sanga handaga na mnyuzu.