1 Waifulaimu wakeikaga lumwe watowane nk'hondo, wadendelukaga mto Yolodani niyo wabula Zifoni, niyo wamgamba Yefuta, "Nii kudendeluka mhaka uwatowe Waamoni haheina kukigambila vileke kindanye? Haluse chayoka inyumba yako we mwenye ukanda mndani!"

2 Mna Yefuta niyo awagamba, "Want'hu wangu wandaga na nk'humbizi nk'hulu na Waamoni. Nawetangagani mna hamwezaga kunigombela kwa awo want'hu. 3 Nize nione kugamba hamwezaga, naitaga mwenye kwa kukelava ugima wangu niyo nomboka umhaka hatowane nawo, Zumbe naye niyo anik'ha uhumi mwa woho. Haluse nii mweza kutowana na miye?" 4 Yefuta awaduganyaga hamwenga wagosi wose wa Gileadi na kuwatowa wagosi wa Ifulaimu na kuwahuma. Waifulaimu wagambaga "Nyuwe want'hu wa Gileadi mwe isi ya Ifulaimu na Manase, mwi want'hu wa mwe dijangwa kulawa Ifulaimu." 5 Wagileadi watahaga ivipink'ha vose vo Yolodani vileke kuzikindila sila zose za Waifulaimu wasekudaha kunyilika. Umwo Waifulaimu wagezaga kunyilika walombezaga vileke walekelwe kwomboka, Wagileadi wawauzaga, "Nyuwe mwi Waifulaimu?" Uneva walemelaga wakagamba, "Bule," 6 Wamgambaga wagambe "Shiboleti." Mna yehe niyo agamba "Siboleti," Kwaviya Waifulaimu wandaga hawakudaha kutambula vedi. Ivo wamgwilaga na kumkoma ahoo he vipink'ha vo mto Yolodani. Mwo lupisi ludya want'hu alufu milongo mine na wane we dikabila dya Ifulaimu wakomwagwa.

7 Jefuta andaga mlamuzi ywa Izilaeli kwa miyaka mtandatu. Abanikaga niyo amoselwa msaga kwo umwenga mwe mizi ya Gileadi.

8 Yefuta eze abanike, Ibizani kulawa Betelehemu andaga niye mlamuzi ywa Waizilaeli. 9 Andaga na wana kilume milongo mitatu na wa kike nawo milongo mitatu. Awalozaga wanawe we kike kuse ye lukolo lwawe, naho niyo awaloza wanawe we kilume milongo mitatu kwa wana kike kuse yo lukolo lwawe. Ibizani andaga mlamuzi ywa Waizilaeli kwa miyaka mfungate, 10 Ibizani abanikaga na kumoselwa msanga uko Betelehemu.

11 Ibizani eze abanike, Eloni kulawa Zebuluni niye andaga mlamuzi ywa Waizilaeli kwa miaka mlongo umwenga. 12 Eloni abanikaga na kumoselwa msanga uko Aijaloni kwe isi ya Zabuloni.

13 Eloni eze abanike, Abidoni mwana Hileli kulawa Pilatoni andaga niye mlamuzi ywa Izilaeli. 14 Andaga na wana kilume milongo mine na vyezukulu milongo mitatu awo wandaga wakenulwa ni milongo mfungate, andaga mlamuzi ywa Izilaeli kwa miaka mnane, 15 Abidoni abanikaga na kumoselwa msanga uko Pilatoni mwe isi ye dikabila dya Ifulaimu mwe isi ye vigulu ya Waamaleki.