1 Abimeleki mwana Yelu Baali aitaga kwo mzi wa Shekemu ukwo wekalaga wanduguze dya nine niyo awagamba, 2 "Wawauze want'hu wa Shekemu, nomkaunga vihi? Kugamba mlongozwe ni wana Gidioni wose milongo mfungate, hegu mwaunga mlongozwe ni yumwenga mwa woho? Mkumbukile kugamba Abimeleki ni mwana ywenyu wenye." 3 Ivo wanduguze dya nine dya Abimeleki wawagambilaga want'hu wose wa Shekemu mwe mbuli yakwe, want'hu wa Shekemu nawo walamulaga wamtimile Abimeleki kwaviya andaga ndugu ywawe. 4 Ivo vilongozi wa Shekemu wamwink'haga vibesu va masawa milongo mfungate kulawa kwe nyumba nk'hulu ya mviko ya Baali Beliti niyo wamwink'ha Abimeleki. Vibesu ivo awalihaga want'hu wahezi awo vileke wamtimile kila aho aitaga. 5 Aitaga nawo kwe kaya ya ise uko Ofula, eze abule kudya awakomaga wanduguze wose milongo mfungate, awo wana Gidioni kwa iwe dimwenga. Mna Yotamu uyo umdodo mwa wana Gidioni akefisaga, yehe hakomwagwa chu. 6 Ivo want'hu wose wa Shekemu, hamwenga na wa Beti Milo waduganaga ho mti wa mwaloni uwo wandile hagihi na Shekemu wamwiika Abimeleki kunda seuta ywaywe.

7 Umwo Jotamu eze eve ivo akwelaga kwo lunenengwa lwo mnima Gelizimu niyo alonga kwa izwi kulu akawagamba, "Nitegelezeni nyuwe want'hu wa Shekemu, uneva mwaunga Mnungu awategelezeni! 8 Zuwa dimwenga maziti yagendaga kusagula seuta ywawe. Niyo waugamba mzeituni, ‘Weye unde seuta ywetu.’ 9 Mzeituni niyo wahitula, ‘Togoleni nenileke kulava amavuta yo yakuungiswa ni milungu na want'hu vileke ninde seuta ywenyu?’ 10 Maziti niyo yaugamba mtini, ‘Wize weye unde seuta ywetu.’ 11 Mna mtini niyo wawahitula, ‘Togoleni nenileke kweleka matunda yedi yanamwiile, mna ninde seuta ywenyu?’ 12 Ivo maziti yaugambaga mzabibu, ‘So weye unde seuta ywetu.’ 13 Mna mzabibu wahitulaga, ‘Togoleni nenileke kweleka matunda yakuwagela kinyemi milungu na want'hu nikegele nk'huswank'huswa ya kunda seuta ywenyu?’ 14 Naivo elo niyo maziti yawiitila mti una miwa na kuugamba, ‘So weye unde seuta ywetu.’ 15 Udya umti we miwa niyo wagamba, ‘Uneva mwaunga ninde seuta ywenyu haya soni mwikale he mp'heho yangu. Uneva hamkuunga moto ukimp'huke kulawa mwa matambi yane zimiwa kwo kuyoka myeleti ya Lebanoni.’ "

16 Yotani agendeelaga kulonga, "Togoleni nomnda na makawiilo yedi na uhuwilwa umwo mkamtenda Abimeleki kunda seuta? Togoleni mumtendela uwedi Yelu Babaali viligane ne zindima zakwe? 17 Kumbukileni kugamba tate awatowanilagani. Andaga hagihi na kwaza ugima wakwe kwajili yenyu kuwayokolani nyuwe kwa Wamidiani. 18 Mna dielo mumhituka tate ne mp'huga yakwe. Muwakoma wanawe, want'hu mfungate kwa iwe dimwenga, nanywe mumtenda Abimeleki kunda seuta ywenyu, umwana ywo mvele mtumwa kwaviya yehe ni ndugu ywenyu na kumtenda seuta ywa Shekemu. 19 Haluse uneva kiya mumtendele Gidioni ne mp'huga yakwe mtenda kwa makawiilo na uhuwilwa, indeni na kinyemi na Abimeleki yehe naye ande na kinyemi na nyuwe. 20 Mna uneva hiyo ivo moto ulawe kwa Abimeleki no kuwoka want'hu wa Shekemu na Beti Milo. Moto ukimp'huke kulawa kwa want'hu wa Shekemu na Beti Milo na kumwoka Abimeleki." 21 Yotamu anyilikaga na kugenda kwikala uko Beeli kwaviya amwogohaga nduguye Abimeleki.

22 Abimeleki aikailaga Izilaeli kwa miaka mitatu. 23 Mnungu awatendaga Abimeleki na want'hu wa Shekemu wasekuivana. Want'hu wa Shekemu niyo wasaguka kulawa kwa Abimeleki. 24 Ino neilaila vileke Abimeleki na want'hu wa Shekemu, awo wamwambizaga mwo kuwakoma wana milongo mfungate wa Gidioni walihizwe mwo ukomi wawe. 25 Ivo elo kwajili yo unk'hondo na yehe want'hu wa Shekemu waikaga want'hu kwo lunenengwa lwe vigulu wawanyatile want'hu, vileke inde mnt'hu yeyose ombokelaga aho. Want'hu awo wamhokaga icho wandaga nacho. Abimeleki agambilwagwa imbuli ino.

26 Niho Gaali mwana Ebedi aitaga Shekemu akanda na wanduguze, want'hu wa Shekemu niyo wamhuilisa Gaali. 27 Waitaga kwe nk'honde ye mizabibu yawe niyo waha zabibu wahaga zabibu na kuziminya na kudamanya zuwa dya kinyemi na kwingila kwe nyumba ya mnungu ywawe, wadyaga no kunywa niyo wamhomola Abimeleki. 28 Gaali mwana Ebedi niyo agamba, "Abimeleki niye ani? Suwe want'hu wa Shekemu kivivihi vikuleka kimdamanyile Abimeleki? Gidioni na Zebuli mkulu ywakwe ywa watowani wadamanyileni want'hu wa Hamoli, babaakwe ywa Shekemu, mna nii kimdamanyile Abimeleki? 29 Yandile ni miye huwalongoza want'hu awa nehamuusa Abimaleki, nehamgamba ‘Ikalumwe mafyo yako, so uku kitowane!’"

30 Zebuli, mkulu wo mzi afaga maya eze eve ivo alongile Gaali. 31 Ivo egalaga wegala ulosi kwa Abimeleki kwa kinyele akagamba, "Gaali mwana Ebedi na wanduguze weza mwo mzi wa Shekemu vileke wakukindile usekwiza mwo mzi. 32 Haluse weye na want'hu wako mnyilike nekilo mkanyatile kwe zink'honde. 33 Mwinuke luvi kilokilo vileke muukump'hukile umzi. Naho Gaali na want'hu wakwe wakawabasani mtowane, niho muwatowe kwa kila luneka nompate!"

34 Abimeleki na want'hu wakwe wose wenukaga nekilo na kunyatila hagihi na Shekemu wakanda mwe vifyo vine va watowani. 35 Umwo Abimeleki na want'hu wakwe eze aone Gaali kafosa kuse, naho kakimala he nk'hili yo mzi, Abimeleki hamwenga na awo want'hu andaga nawo afosaga uko wandile wakanyatila. 36 Gaali eze aone amgambaga Zebuli, "Kaula! Kuna want'hu wakwiza kulawa kwo lunenengwa lo milima!" Zebuli niyo agamba,

"Weye waona du vizuli ve milima enga want'hu."

37 Gaali niyo alonga naho, "Kaula! Kuna want'hu wakulawa hagatigati yo milima naho fyo tuhu dyeza ne sila kulawa kwo mti wa mwaloni wa walaguzi!"

38 Zebuli niyo amgamba, "Wikuhi weduvi wako haluse? Hiyo weye wagambile nii kimdamanyile Abimeleki. Togola awa hiyo want'hu wadya noukawabela? Haya ita ukatoane nawo." 39 Gaali awalongozaga want'hu wa Shekemu niyo atowana na Abimeleki. 40 Mna Abimeleki amgulusaga mpaka kwe nk'hili nk'hulu yo mzi, naho wengi walumiziswagwa umwo wandaga wakanyilika. 41 Abimeleki ekalaga uko Aluma, Zubali naye amgulusaga Gaali na wanduguze kulawa Shekemu naivo hawadahile kwikala aaho naho.

42 Zuwa ditimile Abimeleki aonaga kugamba want'hu wa Shekemu wandaga wakafunganya waite kwe zink'honde, 43 ivo aguhaga want'hu wakwe niyo awapanga vifyo vitatu vileke awonawo wanyatilaga kwe zink'honde, naye akaulaga, eze aone want'hu walawaga kwe mizi awakump'hukilaga na kuwa koma. 44 Umwo Abimeleki na want'hu wakwe andile wakasunguza kugenda kwamila kink'hili yo umzi, ivifyo viidi vituhu vawakump'hukila want'hu kwe zink'honde na kuwakoma wose. 45 Kutowana kwagendeelaga msi wose. Abimeleki autahaga umzi na kuwakoma want'hu wose wandaga umwo. Awokaga moto umzi niyo awanjazila munyu.

46 Umwo wakaya wose wo mnala wa Shekemu weze weve ivo, wengilaga mwe digomela dyetangwagwa nyumba ya kumvika Eli Beliti. 47 Abimeleki agambilwagwa kugamba wakaya wose wandile mwe digomela dya Shekemu wakeduganya hamwenga, 48 ivo akwelaga kwo mnima Zalimoni akanda hamwenga na want'hu wakwe. Aguhaga hoya niyo akant'ha tambi dyo mti na kudiika mwe diega dyakwe. Awagambaga wadya want'hu andaga nawo wasunguze kutenda enga ivi yehe atendile. 49 Ivo kila yumwenga akant'haga tambi dya ziti niyo wambasa Abimeleki niyo wayaumbika mwo zink'handula ze digomela. Wayatimp'haga moto kukanda na want'hu kundani ye digomela. Want'hu wose wandaga uumwo wabanikaga. Kwandaga na want'hu alufu imwenga, wagosi kwa wavele.

50 Abimeleki aitaga Tebezi na kuuzunguluka niyo autaha umzi. 51 Mna hagati ho mzi uwo kwandaga na mnala utogile, niyo kila mgosi na wavele na wakaya wo mzi wanyilikilaga kwo mnala uwo. Wavugailaga ulwivi na kukwela kulanga kwe digulu dyakwe. 52 Abimeleki ezaga niyo aukump'hukila umnala, akwelaga kwo lwivi vileke autimp'he moto mnala. 53 Mna mvele yumwenga amduilaga iwe dya kusigint'hila niyo autula umtwi wakwe. 54 Abimeleki asunguzaga kwitanga mbwanga andaga akamwinuila vitowanilo vakwe akamgamba, "Somola isime yako unikome. Hikuunga ikagambigwa hikomwa ni mvele." Ivo uyo mbwanga amsenga ne sime niyo amkoma. 55 Waizilaeli weze waone Abimeleki kabanika, wose wauyaga kila mnt'hu kwe kaya yakwe.

56 Naho ivo nivo Mnungu amlihizaga kwa masa Abimeleki amtendelaga ise kwa kuwakoma wanduguze milongo mfungate. 57 Ivo Mnungu kawaliha want'hu wa Shekemu waupate uihi waudamanye. Ivo ligito dya Yotamu mwana Yelu Baali niyo dyawapata.