1 Mwa mazuwa ayo Izilaeli wandaga hawana seuta.

Kwandaga na Mlawi yumwenga ekale enga mgeni mwe isi ye vigulu va Ifulaimu, amguhaga muwele wakwe kulawa Betelehemu mwe isi ya Yuda. 2 Mna yudya muwele ywakwe amwihiaga uyo Mlawi, niyo amwasa na kuuya kaya kwa ise uko Betelehemumwe isi ya Yuda. Umwo eze ekale kwa lupisi lwa miezi mine, 3 niho mgosiwe agendaga kumzungula naho, aungaga akalonge naye vedi na kumvuza kwe nyumba yakwe. Amguhaga mndima ywakwe ne mp'hunda zakwe mbili, yudya mvele amwigalaga kwe kaya ya ise, ise naye aze amwone amhokelaga kwa kinyemi. 4 Mkwewe amgambaga ekale naye, niyo ekala kwa mazuwa matatu.

5 Mwe dizuwa dya kane wenukaga mtondo tondo niyo wafunganya wahalawe, ise dyo mvele amgambaga mkwewe, "Goja unde kudya nk'hande ludodo niho uite."

6 Ivo wekalaga wose waidi wakadya nk'hande kwa hamwenga. Niyo ise dyo mvele amgamba, "Nakulombeza ugone aaha kilo iki unde na kinyemi."

7 Yudya Mlawi eze akonge kufosa ise dya mkaziwe amlombezesaga asekuhalawa. Uyo Mlawi naye azumilaga niyo asigala aaho. 8 Mwe dizuwa dya shano enukaga kilokilo vileke aite mna ise dya mkaziwe niyo amgamba, "Udye nk'hande vileke upate ludole ugoje mpaka nomsi niho ufose." Ivo wose waidi niyo wadya nk'hande kwa hamwenga.

9 Umwo eze enuke akeitile hamwenga na yudya mvele na mndima ywakwe, ise dya yudya mvele amgambaga, "Haluse diswa ugone naho aaha. Luvi kilokilo ufose na wiite kwe kaya yako." 10 Mna yudya Mlawi niyo alemela kugona naho, ivo afosaga na kuita mpaka mzi wa Yebusi nuko kugamba Yelusalemu akanda ne mp'hunda zakwe mbili hamwenga no muwele wakwe

11 Umwo weze wande hagihi no mzi wa Yebusi zuwa dize diswe, yudya mndima niyo amgamba mkulu wakwe Mlawi, "Haluse kingile mwo mzi uno wa Wayebusi kigone aaho."

12 Mna yudya Mlawi niyo amgamba mndima ywakwe, "Bule, hekingile mwo mzi wa watakwiza kwaviya want'hu wakwe hiyo Waizilaeli. Nekigendeele ne nt'hambo mpaka Gibea." 13 Mlawi niyo amgamba mndima ywakwe, "Kiite hagihi na Gibea hegu Lama kikagone uuko." 14 Ivo wagendeelaga ne nt'hambo yawe, aho zuwa dize diswe wandaga hagihi na mzi wa Gibea uwo mzi we kabila dya Benjamini. 15 Wengilaga mwo mzi vileke wagone umo. Weze wabule kwo mzi wagendaga kwikala ho lwazo lwo mzi, kwaviya hakwandaga na mnt'hu yeyose awahokelaga.

16 Kisingi kiya mnt'hu yumwenga mdala alawaga kwe nk'honde yakwe, mdala uyo andaga akekala mwe isi ye vigulu va Efulaimu mwo mzi wa Gibea enga mgeni. Want'hu mzi wa Gibea wandaga wa kabila dya Benjamini. 17 Mdala uyo eze amwone yudya mnt'hu aho ho lwazo amuuzaga, "Walawahi naho waitahi?"

18 Yudya Malawi niyo amhitula, "Chalawa Betelehemu mwe isi ya Yuda naho chaita kwe isi ye vigulu va Ifulaimu. Naitaga Betelehemu mwe isi ya Yuda na ivi haluse naita kwe kaya. Kwaviya hahana mnt'hu yeyose anihokele niite kwe kaya yakwe, 19 hata uneva kina kila kint'hu mani ya kuzink'ha zimp'hunda zetu naho kina mkate na divai kwaajili yo muwele ywangu no mndima ywangu na miye mwenye."

20 Yudya mdala niyo awagamba, "Tondowaleni! Sooni mwe nyumba yangu. Neniwenk'heni icho mkuunga, msekugona mwo lwazo lwo mzi uno." 21 Ivo awegalaga mwe nyumba yakwe na kuzink'ha mp'hunda mani. Nawo wahakaga mazi, niyo wadya nk'hande.

22 Umwo wakanda ne kinyemi mwe mioyo yawe, want'hu wavu hewemzumile Mnungu wa mzi uwo waduganaga he nyumba iyo. Wamgambaga yudya mdala uyo mta inyumba, "Mlave kuse yudya mnt'hu ezile kwakwo vileke kigone naye enga ivo kikugona na wavele."

23 Mna yudya mdala mta nyumba afosaga kuse na kuwagamba, "Bule wanduguzangu, nawalombeza msekudamanya uwavu uno. Kwaviya mnt'hu uyu mgeni ywangu msekumdamanyila uwihi wowose. 24 Kauleni aha eyuko mwali na mazanga yakwe na muwele ywa mnt'hu uyu. Neniwalave kwenyu muwaguhe muwatendele ivo mkuunga mna kwa mnt'hu uyu msekumtendela uwihi wowose." 25 Mna wadya want'hu hawamtegeleze. Yudya Mlawi amlavaga kuse yudya muwele ywakwe kwa wadya want'hu nawo wamguhaga na kugona naye kwa kumkakalisa kilo chose mpaka mtondo. Kwize kuche wamlekelaga akeitile.

26 Kilokilo yudya mvele auyaga kwe nyumba ya mgosiwe uko andile, eze abule ho lwivi niyo agwa na kugona aho mpaka kucha. 27 Mgosiwe eze enuke akomolaga lwivi lwe nyumba na kulawa kuse vileke agendeele ne nt'hambo yakwe, niyo ambwila yudya mwele wakwe kagona hasi ho lwivi na mikono yakwe itoza ulwivi ulwo. 28 Niyo amgamba, "Kimala kiite." Mna yehe hahituke. Yudya mgosi amwinulaga na kumwika mwe mp'hunda yakwe na kuita naye mpaka mwe nyumba yakwe. 29 Eze abule he nyumba yakwe, aguhaga ngola na kumkant'ha kant'ha yudya muwele vibesu mlongo na viidi ve vilungo vakwe niyo avigala vibesu ivo kwa kila kihande kwa kabila dimwenga dya Izilaeli. 30 Kila mnt'hu aone mbuli iyo agambaga, "Mmh! Mbuli enga ino hainati ilaile hegu kuoneka kukongela aho Waizilaeli weze walawe mwe isi ya Misili mpaka ivi dielo. Kifanyanyeni mwe mbuli ino! Togoleni kitende vivihi!"