1 Zuwa dimwenga Samsoni aseelaga kuita Timna. Uko aonaga mndele yumwenga ywa Kifilisiti. 2 Eze auye kaya awagambilaga welesi wakwe akagamba, "Hiyona mndele ywa Kifilisiti kudya Timna himbwedesa. Elo nilozeni ande mkazangu."

3 Mna welesi wakwe niyo wamuuza, "Nii ukaita uko kwa Wafilisiti heweitile kwe dilago vileke ukalombe uko? Huwone yeyose mwo lukolo lwetu hegu mwa want'hu wetu wose wa Izilaeli?"

Mna Samsoni amgambaga ise, "Mndele uyo niye nione huunga mniloze."

4 Welesi wakwe hawamanyaga kugamba andaga ni Zumbe akumlongoza Samsoni kwa ayo akudamanya, kwaviya Zumbe andaga akamwiikila lumwe Samsoni vileke awatowe Wafilisiti. Mwo lupisi ulu Wafilisiti wandaga wakawekaila Waizilaeli.

5 Ivo Samsoni na welesi wakwe weseelaga kuita Timna. Umwo wakaita kwombokela kwo mgunda we mizabibu uko Timna, aaho zana simba dyalailaga ikabuma uku dikamwiziila. 6 Aaho Muye ywa Zumbe amtendaga Samsoni ande na ludole niyo aikangazula isimba ne mikono yakwe, enga ivo mnt'hu akuikangazula mwana mbuzi. Mna hawagambile welesi wakwe icho adamanye.

7 Weze wabule Timna, Samsoni niyo agenda kusimuila na yudya mndele amwelelaga vitendese. 8 Yeze yomboke mazuwa mageke Samson auyaga kugenda kumlomba yudya mndele. Mwe sila umwo apagukaga niyo agenda kukaula idya isimba aikomaga. Eheelwagwa kwaviya abwiilaga tuluma dya nyuki naho kundani kwe kimba kiya kwandaga na uki. 9 Yehe aulundaga uki uwo ne mikono yakwe niyo adya uku akagenda, eze auye kwa welesi wakwe awenk'haga uki ludodo nao niyo wadya mna hawagambile kugamba uki udya walawaga mwe kimba che simba.

10 Ise dya Samsoni aseelaga kuita kwa mndele niyo Samsoni adamanya wila aaho. Ino neinda ni kihendo kwa wabwanga kutenda ivo mwo lupisi ludya. 11 Wafilisiti weze wamuone Samsoni, wamwigailaga wabwanga milongo mitatu wakande hamwenga naye mwo wila. 12 Samsoni awagambaga, "Naunga niwenk'heni ngelo. Uneva mnadaha kunik'ha uhituzi we ngelo mwa mazuwa mfungate yo wila we ndoza yangu, nenimwink'he suke milongo mitatu za suke zing'aile na suke milongo mitatu zo wila. 13 Mna mdunduga kunigambila uhituzi we ngelo iyo mwa mazuwa ayo mfungate yo wila, nyuwe nomnink'he mavalo milongo mitatu na doti nt'huhu milongo mitatu."

Woho niyo wagamba "Kigambile ngelo iyo, kiitegeleze."

14 Niyo agamba,

"Kwa mta kudya kwalawa ludyo;

Kwa mta ludole kwalawa mwiile."

Mazuwa matatu yomboka hahana ahitule ingelo iyo.

15 Mwe dizuwa dya kane wamgambaga mkaza Samsoni, "Mhembeleze mgosiyo vileke akigambile uhituzi ukulongwa mwe ngelo iyo. Huna tendile ivo chawatimp'hani moto weye hamwenga ne mp'huga ya iso yose. Weye na mgosiyo mkilalika aha vilele mkihoke ugoli wetu?"

16 Ivo mkaza Samsoni ambasaga mgosiwe uku akaila niyo amgamba, "Ikindedi weye hukuniunga! Kuni ihia! Kuwenk'ha want'hu wa kwetu ngelo niyo hunigambile ulosi ukulongwa mwe ngelo iyo!"

Samsoni niyo agamba, "Tegeleza, hata welesi wangu awo hiwagambile. Nii hugambile weye?" 17 Mkaziwe ailaga kwajili ye ngelo iyo kwa mazuwa yose mfungate yo wila we ndoza yawe. Mna mwe mazuwa yasigale mwe dizuwa dya mfungate dye ndoza Samsoni amgambilaga mkaziwe ulosi we ngelo iyo kwaviya mkaziwe amtigizaga. Yudya mkaza Samsoni agendaga kuwagambila Wafilisiti kikulongwa mwe ngelo iyo. 18 Ivo mwe dizuwa idyo kwandaga kukei kuswa, wagosi wa mwo mzi uwo wamgambaga Samsoni,

"Ni kihi kina mwiile kujink'ha uki?

Kihi kina ludole kujink'ha simba?"

Samsoni ahitulaga kugamba,

"Mwandile hamlimile ne ng'ombe yangu,

Hegu hamwamanyize uhituzi we ngelo yangu hata ivi haluse."

19 Aaho Muye wa Zumbe wamwiziilaga Samsoni niyo wamtenda ande na ludole, aseelaga Ashikeloni uko niyo akomaga wagosi milongo mitatu. Awahambulaga zisuke niyo awenk'ha wadya walavaga uhituzi we ngelo. Akajika aho, auyaga kwe kaya kwa ise na nine akanda na maya mwe kiya kilaile, 20 mna uyo mkaza Samsoni alozwagwa kwa mbwanga yumwenga mwa wadya wandile naye mwe ndoza yakwe.