1 Yelubaeli uyo akwitangwa Gidioni na want'hu wakwe wose andaga hamwenga nawo, wenukaga mtondotondo na kukima nk'hambi hagihi ne nc'hoko ya Halodi. Nk'hambi ya Wamidiani nayo neinda mkoma mahanya ye dikolongo hagihi no mnima Mole.

2 Zumbe Mnungu amgambaga Gidioni, "Want'hu awo unanao wengi vitendese kwangu miye kuwataha Wamidiani. Vileke Waizilaeli wase kukeduvya kugamba wanda wahumi kwa udahi wawe wenye haheina wambizi wangu. 3 Uwagambe want'hu kugamba, ‘Yeyose akogoha hegu kuzingiza auye kaya.’" Ivo Gidioni awagezaga want'hu. Want'hu alufu milongo miidi na waidi wauyaga kaya, na want'hu alufu mlongo wasigalaga.

4 Zumbe Mnungu amgambaga Gidioni, "Want'hu wakei wengi. Haluse wegale ukwo kwa mazi, miye name neniwageze uko. Uneva nnakugamba, ‘Mnt'hu uyo mwiitanye, uyo nomwiitanye, naho mnt'hu yeyose nohugambe msekuitanya uyo ho mwiitanye.’" 5 Ivo, Gidioni awegalaga want'hu uko kwa mazi Zumbe niyo amgamba, "Want'hu nawalambite amazi enga kuli nouwapagule na wadya wanywele kwa kufunama na kunywa mazi ne mikono." 6 Uwazilo wa wadya wanywele mazi wakateka ne mikono yawe wandaga magana matatu. Mna watuhu wose wasigale wafunamaga wakanywa mazi enga kuli. 7 Zumbe Mnungu niyo amgamba Gidioni, "Nohuyokole na kukwink'ha uhumi kwa Wamidiani ukanda nao awo want'hu milongo mitatu wanywele mazi kwa kulambita enga kuli. Uwagambe watuhu wose wauye kwe zikaya zawe." 8 Ivo Gidioni aguhaga nk'hande za wadya wakuuya kaya na magunda yawe na kuwalaga na kuuya kwe zikaya zawe. Yehe niyo asigala na want'hu magana matatu. ne nk'hambi ya Wamidiani neinda mondwaisi yawe kwe dikolongo.

9 Kilo icho, Zumbe Mnungu amgambaga Gidioni, "Inuka ukawakump'hukile mwe nk'hambi yawe, kwaviya hikwink'ha udahi wa kuwahuma. 10 Mna uneva wogoha, ita na mndima ywako Pula. 11 Uko nowive icho wakulonga, weye nawe noupate ludole lwa kugenda kuwatowa." Ivo Gidioni aitaga na mndima ywakwe Pula mpaka kwe nk'hambi ya Wamidiani. 12 Wamidiani na Waamaleki na want'hu wa ulailo wa zuwa wagonile mwe dikolongo. Wandaga wengi enga sige, wingi we zingamia zawe enga msanga wa mnk'handa ye bahali.

13 Gidioni eze abule, amwivaga mnt'hu yumwenga akamsimuila miyawe sozi yakwe ivi, "Nehilota sozi, naonaga mkate wa shaili ukatongolokela kwe nk'hambi mwa Wamidiani, noutowa dihema niyo dyagwa hasi pele."

14 Miyawe niyo amhitula, "Mbuli ino nuko kugamba ni dibamba dya Gidioni mwana Yoashi mnt'hu ywa Izilaeli. Mnungu kamwink'ha udahi wa kuwahuma watowani wose wa Midiani."

15 Gidioni eze eve ivo wakusimuila sozi iyo, afikaga madi niyo amvika Mnungu, auyaga mwe nk'hambi ya Waizilaeli, akagamba, "Inukeni kiteni kwaviya Zumbe Mnungu kakink'ha uhumi mwe difyo dyose dya watowani wa Wamidiani." 16 Niyo awapanga wadya want'hu magana matatu, na kuwaika mwe mafyo matatu niyo awenk'ha magunda na nyungu ina magala. 17 Akawagamba, "Heza mpaka hank'handa ye nk'hambi mnikaule icho nenidamanye nanywe mdamanye iivo. 18 Aho nenitowe digunda, miye ne difyo dyangu, nyose toweni magunda kulawa kila hant'hu kuzunguluka ink'hambi na kugutila kwa izwi kulu, ‘Kwajili ya Zumbe Mnungu na kwaajili ya Gidioni!’"

19 Gidioni ne difyo dyakwe dya want'hu gana wabulaga mwo lumbili lwe nk'hambi umwo kilo cha gati chandaga kihagihi, aaho wamizi weze wakesakanye. Gidioni na want'hu wakwe watowaga magunda yawe niyo watula zinyungu zawe izo wenulaga mwe mikono yawe. 20 Mafyo yose matatu kwa hamwenga watowaga magunda na kutula nyungu zawe. Mwe mikono yawe ya kumoso watozaga magala mikono yawe ya kulume nayo watozaga magunda na kuyatowa, na kugutila kwa izwi kulu wakagamba, "Sime kwaajili ya Zumbe Mnungu na kwaajili ya Gidioni!" 21 Wakimalaga kila yumwenga hant'hu hakwe kuizunguluka ink'hambi. Fyo dyose dya wank'hondo dyasambalaga na kugutila. 22 Want'hu wa Gidioni weze watowe magunda yawe Magana matatu, Zumbe Mnungu awatendaga Wamidiani wakonge kutowana woho kwa woho mwe nk'hambi. Wadya wasigale wanyilikaga mpaka Betishita kuhinga Zelela, mpaka mwo mhaka wa Abeli Mehola hagihi na Tabati.

23 Waizilaeli we dikabila dya Nafutali na Asheli na Manase, wose wetangwagwa niyo wawagulusa, Wamidiani. 24 Gidioni niyo atumaga wegala ulosi mwe isi yose ye vigulu va Efulaimu wawagambe, "Seleeni mkawatowe Wamidiani, ikeni wamizi kwo mto wa Yolodani ne vizuto vakwe mpaka Beti Bala vileke Wamidiani wasekomboka." Ivo wagosi wose wa Efulaimu wezaga na kuutaha mto Yolodani mpaka Beti Bala. 25 Wawatahaga vilongozi waidi wa Wamidiani, Olebu na Zeebu. Na kumkoma Olebu mwo luwe lwa olebu, Zeebu naye wamkomelaga hant'hu ha kuminyila zabibu uko Zeebu, wagendeelaga kuwagulusa Wamidiani. Niyo wamwigaila Gidioni mitwi ya Olebu na Zeebu, Gidioni andaga Ulailo wa zuwa wo mto Yolodani.