1 Zuwa idyo, Debola na Balaki mwana Abinoamu wakemaga wila uno:

2 Vilongozi wakelaviliza kwikaila Izilaeli,

Want'hu nawo wakelavaga kwa kuunga wenye,

Mtogoleni Zumbe Mnungu.

3 Tegelezeni nyuwe maseuta!

Naho nyuwe wakulu tegelezeseni!

Miye nenimkemele Zumbe,

Nenikeme nt'hogola kwa Zumbe Mnungu ywa Izilaeli.

4 Weye Zumbe Mnungu wize ulawe uko Seili,

na kuseela mwo mnima Edomu,

isi neizingiza, ulanga nouseleza mazi,

Heiye mavunde niyo yaseleza fula.

5 Milima neizingiza hako Zumbe Mnungu, heiye, mnima Sinai,

hako Zumbe Mnungu, Mnungu ywa Izilaeli.

6 Mwa mazuwa ya Shamgali, mwana Anati,

mwo lupisi lwa Yaeli,

ludongo lwa want'hu nolunda halukomboka mwe isi,

watafi wombokaga kifiso mnk'handa.

7 Wikazi we zikaya wahelezaga mwe Izilaeli,

wahelezaga mpaka eze alaile Dobola,

eze alaile mami yawe dya Waizilaeli.

8 Weze waakesaguile milungu mihya,

niyo kwanda nk'hondo mwe isi.

Mna hakwandile na mta mjungo hegu nk'hindilo,

mwa want'hu alufu milongo mine mwe Izilaeli. 9 Nawatunya wakulu wawatowani wa Izilaeli,

na want'hu wakelavile kwa kuunga wenye.

Mtogoleni Zumbe!

10 Bwelekezeni nyuwe mkugendeza zimp'hunda zing'aile,

Bwelekezeni nyuwe mkwikaila vilago vikuikwa mnanaga mwe mp'hunda va yombe kulu,

na nyuwe mkugenda mwe sila.

11 Tegelezeni izwi hamwenga na kwanga kwa wakulasa na misale,

kwanga kwa wakuteka mazi

kwabwelekeza uhumi wa Zumbe,

uhumi wa Izilaeli.

Want'hu wa Zumbe waseela kulawa kwe zink'hili zawe

12 Inuka, inuka, Debola!

Inuka! inuka ukeme wila!

Inuka, Balaki mwana Abinoamu,

uwaguhe watahigwa wako.

13 Watoani wasigale nawaseela,

want'hu wa Zumbe Mnungu wagenda kumtoanila,

mwa want'hu wana ludole.

14 Kulawa Efulaimu waseelaga awo wandaga wakekala kwa Waamaleki,

Benjamini andaga hamwenga na want'hu wakutimilaga,

watowani wakulu waseelaga kulawa Makili,

wakulu waseelaga kulawa Zebuloni.

15 Wakulu wa Isakali wandaga hamwenga na Debola,

want'hu wa Isakali wahuwilwa kwa Balaki,

wamtimilaga mpaka kwe dikolongo.

Mna mwe mp'huga ya Lubeni wakepangaga,

waswesaga ulamuzi.

16 Nii mwekala kunyuma ne zingoto?

mkategeleza miluzi yo mdimi akwitanga mifugwa yakwe?

Heiye, dikabila dya Lubeni dikepanganiza

hawadahaga kufanyanya mbuli zikwiza.

17 Dikabila dya Gileadi dyasigalaga nt'hendelo ya kaidi ya Yolodani.

Kabila dya Dani nii nomsigala mwe melikebu mazuwa mengi?

Kabila dya Asheli nedisigala mnk'handa ye bahali hant'hu meli zikukimala,

no kwikala mwe mp'wani yakwe.

18 Mna want'hu wa Zebuloni

wakelavaga ugima wawe hata uneva nawaugwa wabanike.

Nivo watendaga want'hu wa Nafutali uko kwa magundi ye nk'hondo.

19 Kudya Taanaki mnk'handa ye zinc'hoko za mazi za Megido,

maseuta wezaga, niyo watowa nk'hondo,

maseuta wa Kanaani watowaga nk'hondo uko Taanaki hagihi ne zinc'hoko za mazi,

mna hawaguhile masawa hegu vitahigwa.

20 Uko kwe mbingu nt'hondo nezinda mwe nk'hondo.

Nt'hondo mwe zinyendo zawe, zatowanaga na Sisela.

21 Malao yo mto Kishoni yawakubilaga hale,

udya mto wa kale, mto wa Kishoni.

Neniite, nenigendeele kulongole kwa udahi.

22 Niyo ngaga ze zifalasi zalavaga sindo

aho weze wazitende zifalasi ziguluke kwa kukwatula hasi,

23 Mtumigwa ywa Zumbe niyo agamba, "Uligiteni mzi wa Melosi,"

"Waligiteni want'hu wakwikala umwo,

kwaviya hawezile kuwambiza want'hu wa Zumbe

kutowana na wank'hondo wata ludole."

24 Yaeli avikilwe kujink'ha wavele wose,

mkaza Hebeli uyo ywo lukolo lwa Wakeni.

Naavikilwe kujink'ha wavele wose wakwikala mwe mahema.

25 Sisela amlombezaga mazi, yehe niyo amwink'ha mele mwe kihungu cha kiseuta,

na kumletela siagi mwe kihungu cha nt'hogola.

26 Kwa mkono umwenga atoza kigingi che dihema

na mkono wakwe wa kulume atozaga nk'humbo,

iyo agomandilaga ikigindi mwo mtwi wa Sisela,

amponk'holaga mtwi wakwe.

27 Sisela afunamaga mwe viga vakwe niyo agwa,

na kugona mwe viga vakwe.

Agwaga hasi, kabanika!

28 Nine dya Sisela asungiilaga kuse mwe dilanga

eze asungile ailaga akagamba,

"Nii gali dyakwe dikuvutwa ni falasi hadisunguze kwiza?"

"Nii zifalasi zakwe hazisunguze kuuya?"

29 Wavele wata mizungu wamhitulaga.

ikindedi akesangalazaga zuwa kwa zuwa.

30 "Wazungula vint'hu va kuvitaha na kupangilana,

mvele yumwenga hegu waidi kila mtowani,

mavalo ya langi zihengi kwa ajili ya Sisela.

mavalo yahambigwe kwaajili ye singo yangu."

31 Zumbe Mnungu uwabanange wank'hondo wako wose!

Mna wambwiyazo wan'gale enga zuwa dikutont'homoka! Mwo lupisi dikutont'homoka kwa kung'ala

Isi yose niyo yanda na utondowazi kwa miaka milongo mine.