1 Mtumigwa ywa Zumbe akwelaga kulawa Giligali mpaka Bokimu niyo awagamba Waizilaeli kugamba, "Zumbe kagamba, hiwalavani mwe isi ya Misili na kuwegala mwe isi iyo nakelisile kwa wakale wenyu, hagamba, ‘Heniuse Indagano yangu niikile na nyuwe. 2 Nanywe hamkuungwa kuika Ndagano na want'hu we isi ino, mna banangeni hant'hu hawe ha kulavila nt'hambiko.’ Mna nyuwe hamnitegeleze. Nii mkatenda ivi? 3 Haluse nawagambani kugamba, heniwaguluse kwenyu, mna nawande enga miwa kwenyu naho milungu yawe neinde lwinika kwenyu kwa kuivika." 4 Mtumigwa ywa Zumbe eze awagambile want'hu wose wa Izilaeli ulosi uno, watulaga ndilo. 5 Wahetangaga hant'hu aho Bokimu, nuko kugamba hant'hu ha ndilo. Niyo wamlavila Zumbe Mnungu malavo.

6 Aho Yoshua eze awalage Waizilaeli, kila yumwenga aitaga hant'hu hakwe aho apangilwe vileke ahaguhe hande hakwe. 7 Waizilaeli wamdamanyiliga Zumbe mazuwa yose mwo ugima wa Yoshua, na mazuwa yose yo ugima wa wadala awo wandaga aaho Yoshua eze abanike awo waonaga zindima zose izo Zumbe awadamanyilaga Waizilaeli. 8 Yoshua mwana Nuni naho mndima ywa Zumbe Mnungu, abanikaga akanda na miyaka gana dimwenga na mlongo. 9 Wammoselaga msanga mwa hant'hu apangilwe inde yakwe uko Timanati Helesi, mwe isi ye milima ya Efulaimu mkoma mahanya yo mnima Gaashi. 10 Mna cheleko chakwe chose chakehanganyaga, na kutimila cheleko kituhu icho hachammanyaga Zumbe Mnungu hegu ivo awatendele want'hu wa Izilaeli.

11 Ivo, Waizilaeli wadamanya wavu ha Zumbe Mnungu na kuivika milungu ikwitangwa Mabaali. 12 Nawamleka Zumbe Mnungu, Mnungu ywa wakale wawe, uyo awalavaga mwe isi ya Misili, na kuivika milungu mituhu ya want'hu wawazunguluke. Waifunamilaga milungu iyo na kumtenda Zumbe Mnungu aihiwe. 13 Wamleka Zumbe Mnungu, na kuwadamanyila Mabaali na Mashataloti. 14 Ivo Zumbe Mnungu awaihiaga Waizilaeli vitendese, naye niyo awaleka wahoki wawahoke ugoli wawe, na kuwatenda wahumwe ni wank'hondo wawe naho Waizilaeli hawadahaga kukimaala ha wank'hondo wawe. 15 Aho wagendaga kutoana, udahi wa Zumbe hawandaga hamwenga nawo, enga ivo Zumbe agambaga naatende. Wandaga mwe makunt'ho makulu. 16 Niho Zumbe Mnungu awenk'hile walamuzi wa kuwalava mwo udahi wa want'hu wawahokile ugoli wawe. 17 Hata ivo Waizilaeli hawawategeleze, kwaviya wakehabwasaga kwa kutimila milungu mituhu na kuifunamila wakaivika. Wasunguzaga kuileka sila ya wakale wawe. Sila ya kutimila sigilizi za Zumbe Mnungu. 18 Kila aho Zumbe Mnungu akawenk'ha walamuzi, yehe mwenye andaga hamwenga na mlamuzi uyo, awayokolaga kulawa mwa wank'hondo wawe mwo lupisi lwose lwo wikazi wo mlamuzi uyo. Kwaviya Zumbe Mnungu awaonelaga mbazi umwo awevaga wakasulumila kulawa kwa awo wandaga wakawasulumiza. 19 Mna aho mlamuzi eze abanike woho wauwiyaga udamanyi wawe wa kale, na wavu wiihile kujink'ha watati zawe. Waitimilaga milungu mituhu, wakaidamanyila ndima na kuivika, naho hawalekaga udamanyi na wiihi wawe. 20 Niyo Zumbe Mnungu anda na maya mwa Izilaeli, akagamba, "Kwaviya want'hu awa wabananga lndagano niidamanye na wakale wawe, na kulemela kutimila yadya nilongile, 21 heniziguluse naho isi izo Yoshua azisigaze umwo abanikaga. 22 Nenizitende si izo ziwageze Waizilaeli nikaule kugamba nawauwiye sila yangu enga watati zawe hegu bule." 23 Ivo Zumbe Mnungu awalekaga want'hu wa si izo wasigale, naho hasunguzaga kuwagulusa aho Yoshua eze abanike.