1 Elo, Jefita kulawa Gileadi andaga mtowani hekogoha uyo andaga mwana ywa mvele pamp'he. Ise andaga ni Gileadi. 2 Gileadi andaga na wana watuhu kwo mkaziwe we ndoza. Wana awo weze wakule wamgulusaga Jefita ahalawe mwe kaya yawe. Wamgambaga, "Homnde na ukipe wa kint'hu chochose kwa tati yetu, weye una nyokwe mtuhu." 3 Jefita awanyilikaga wanduguze niyo akwikala kwe isi ya Tobi. Aho handaga na want'hu waihile, wamzumilaga niyo wanda hamwenga naye kila aho nawaite.

4 Mazuwa mageke yeze yomboke Waamoni wagendaga kutowana na Waizilaeli. 5 Vilongozi wa Gileadi wagendaga kumwitanga Yefita kulawa kwe isi ya Tobi. 6 Vilongozi awo wamgambaga, "Soo ukilongoze vileke kidahe kuwatowa Waamoni."

7 Mna Jefita awagambaga, "Ivi hinyuwe mwaniihiyaga niyo mwanigulusa nihalawe mwe nyumba ya tate. Haluse nii mwaniizila umwo mkapata makunt'ho?"

8 Niyo wadala wo mzi wa Gileadi wamgamba Yefita, "Chakuuiya weye haluse vileke wiite hamwenga na suwe na kuwatowa Waamoni. Kinawahuma neninde kilongozi ywetu mwa wose wakwikala Gileadi."

9 Yefita niyo awagamba, "Uneva kinaitanya hatowane na Waamoni, niyo Zumbe anitenda niwahume, ni kindedi neninde kilongozi ywenyu?"

10 Wadala wa Gileadi niyo wamhitula, wakagamba, "Kizumila. Zumbe muwona mwa suwe, ikindedi nekidamanye enga ivo ulongile." 11 Ivo Yefita aitaga nawo awo vilongozi wa Gileadi niyo want'hu wamtenda ande kilongozi ywawe. Yefuta avuzagiza kulonga ha Zumbe ziya zimbuli awagambile wadala wa Mizipa.

12 Niyo Jefita atumaga wegala ulosi kwa seuta ywa Amoni vileke wakamuuze, "Una nk'humbizi yani na suwe? Nii ukaikump'hukila isi yetu?"

13 Seuta Amoni awahitulaga wadya wegala ulosi kugamba, "Umwo Waizilaeli wandaga wakalawa Misili watahaga isi yangu kukongela kwo mto wa Alinoni mpaka mto wa Yaboki na mto Yolodani. Haluse vuzeni isi iyo kwa utondowazi."

14 Yefuta atumaga naho wegala ulosi kwa seuta ywa Waamoni 15 wakanda na uhituzi uno: "Hicho kindedi kugamba Waizilaeli waguhaga isi ya Moabu isi ya Waamoni. 16 Mna umwo Waizilaeli wandaga wakalawa Misili wombokelaga kwe dijangwa kuita kwe bahali ya Shamu na mpaka Kadeshi. 17 Naho watumaga wegala ulosi kwa seuta ywa Edomu kumlombeza kugamba wombokele mwe isi yakwe, mna seuta ywa Edomu hawazumile. Iviyaiviya amlombezaga seuta ywa Moabu, yehe naye hawazumile wombokele mwe isi yakwe, ivo Wazilaeli wagendeelaga kwikala aaho Kadeshi. 18 Mna niyo woho wombokela kwe dijangwa kuzunguluka isi ya Edomu na Moabu mpaka ulailo wa zuwa wa Moabu ng'ambu yo mto Alinoni na kuika nk'hambi aho. Mna aho hawadahaga kwomboka umto Alinoni kwaviya nuwo wandaga umhaka wa Moabu. 19 Waizilaeli watumaga wegala ulosi kwa Sihoni, na kwa seta ywa Waamoli ywa Heshiboni wakawalombeza kugamba wombokele mwe ziisi zawe waite uko kwe isi yawe. 20 Mna seuta Sihoni hawazumile Waizilaeli wombokele mwe isi yakwe. Aduganyaga idifyo dyakwe dya watowani niyo waika nk'hambi uko Yahasa na kuwakump'hukila Waizilaelil. 21 Mna Zumbe Mnungu ywa Waizilaeli awenk'haga uhumi Waizilaeli kwa uyo seuta ywa Sihoni ne difyo dyakwe dya watowani. Ivo Waizilaeli waiguhaga isi ya Waamoli wandaga wakekala aho kunda yawe. 22 Waguhaga isi yose ya Waamoli kukongela mto Alinoni mpaka kwo mto Yaboki, na kukongela ulailo wa zuwa kwe dijangwa mpaka usweelo wa zuwa wa mto Yolodani. 23 Kwaivo ni Zumbe, Mnungu ywa Izilaeli awagulusaga Waamoli kwajili ya want'hu wakwe Wazilaeli. Haluse weye waunga ukihoke isi yetu? 24 Weye wageza kuiguha naho? Guha chochose wink'higwe ni mnungu ywako Kemoshi. Mna suwe nekiguhe kila kint'hu kink'higwe ni Zumbe Mnungu ywetu. 25 Togola weye wagamba uywedi kumjink'ha Balaki mwana Zipoli, yudya seuta ywa Moabu? Yehe hakihigile hegu kutowana na suwe? 26 Waizilaeli wekalaga uko Heshiboni na Aloeli ne mizi imnk'handa yakwe ne mizi midodo yose mnk'handa yo mto Alinoni. Nii hamwiikombole mwo lupisi ulo? 27 Miye hiwatendeleni dyodyose diihile, hiyo vedi kutowa nk'hondo. Zumbe niye mlamuzi. Naalamule dielo mwa Waizilaeli na Waamoli." 28 Mna seuta ywa Waamoni aubelaga ulosi uwo kulawa kwa Yefita.

29 Niyo Muye ywa Zumbe Mnungu amwiziila Yefuta. Yefuta niyo amboka mwe isi ya Gileadi na Manase niyo abula Mizipa ya Gileadi niyo agendeela mpaka Amoni. 30 Yefuta aikaga kilapi kwa Zumbe kugamba, "Uneva nounink'he uhumi kwa Waamoni, 31 kint'hu chochose nenibwiilane nacho kulawa mwe nyumba yangu, umwo hauya no uhumi. Neni kilave kint'hu icho kunda malavo yo kokwa pele."

32 Ivo Yefula ombokaga umto akatowane na Waamoni. Zumbe naye niyo amwink'ha uhumi kwa Waamoni. 33 Yefuta apataga uhumi mkulu na kuitaha mizi milongo miidi yandile Aloeli kuzunguluka Miniti na Abel Kelami. Ivo Waamoni wahumwagwa vitendese ni Waizilaeli.

34 Niyo Yefuta abula kwe kaya yakwe uko Mizipa, mwanawe wakike amlailaga akeza kumsingila, akatoa kagoma kadodo naho avina naho andaga niye mwanawe yumwenga du heiina miyawe. 35 Yefuta eze amuone atatulaga zisuke zakwe kwa kinyulu niyo agamba, "Ha, mwanagu! Kuusokeza umoyo wangu! Nii akanda ni weye ukunigela usungu? Hiika kale kilapi kwa kukelisa kwa Zumbe, naho hikudaha kukiusa!"

36 Yudya kigoli niyo amgamba, "Uneva kuika kilapi kwa Zumbe, damanya kiya naukaunga udamanye kwangu, kwaviya Zumbe kalihiza kwajili yako kwa wank'hondo wako Waamoni." 37 Mna amgambaga ise, "Nidamanyile kint'hu kimwenga du. Nileke kwa miezi midi du vileke hatalamke na wambuya zangu kwo mnima hahongeza kugamba nenibanike hahena kulombigwa." 38 Ise amgambaga aite niyo amzumila kwa miezi midi. Yehe na wambuyaze wekalaga kwo mnima wakanda wahongeza kwaviya naabanike haheina kulombigwa naho haheina kweleka. 39 Miezi midi ize yomboke yudya kigoli auyaga kwa ise. Ise naye atendaga enga ivo amwikilaga kilapi Zumbe, yudya kigoli abanikaga akanda mwali na mazanga.

Naho niyo yanda ni kihendo kwa Waizilaeli, 40 kugamba wana kike wa Waizilaeli waitaga hale kwa mazuwa mane kila mwaka waka mkumbukila yudya kigoli cha Yefuta Mgileadi.