1 Niyo Want'hu wa Ifulaimu wamgamba Gidioni, "Nii hukitange umwo ukagenda kutowana na Wamidiani? Nii wakitenda ivi?" Walabilaga kwa usungu kwe mbuli iyo.

2 Mna Gidioni awagambaga, "Kiya nehadaha kudamanya hakikudaha kuliganywa na kiya mdamanye nyuwe. Naho hata kiya kidamanywe ni want'hu wa Ifulaimu kitendesa uwedi kujink'ha kiya kidamanywe ni want'hu wo lukolo lwangu lwose. 3 Hamwenga na ayo, kwa udahi mkulu wa Mnungu muwakoma wakulu waidi wa Wamidiani, awo Olebu na Zeebu. Miye hidamanyai kikuligana na ivo?" Gidioni eze alonge ivo hawagendeele naho kunda na maya.

4 Mwo lupisi ulo, Gidioni na want'hu wakwe magana matatu wabulaga kwo mto Yolodani niyo wadendeluka. Hamwenga na kugamba wasokelesaga, wagendeelaga kuwagulusa awo wank'hondo wawe. 5 Umwo weze wabule Sukoti, awagambaga want'hu wo mzi, "Nawalombezani nk'hande ludodo kwaviya want'hu wangu wasokelesa, name nikei nawagulusa maseuta wa Wamidiani awo Zeba na Salimuna."

6 Mna wakulu wa Sukoti wagambaga, "Hakikudaha kuwenk'ha nk'hande watowani wako, kwaviya hamnati mumtahe Zeba na Salimuna."

7 Ivo Gidioni niyo agamba, "Vedi! Umwo Zumbe eze anink'he udahi wa kuwataha Zeba na Salimuna neni wakwalabule ne miwa ne mbigili ya kwedijangwa!" 8 Iviyaiviya Gidioni aitaga Penueli niyo alombeza enga ivo alombeze kwa want'hu wa Sukoti, mna want'hu wa Penueli wahitulaga enga ivo wahitule want'hu wa Sukoti. 9 Ivo Gidioni niyo awagamba, "Heza kuuya kwa wedi, neni umole mnala uno."

10 Zeba na Salimuna wandaga uko Kalikoli, hamwenga ne difyo dya watowani wawe mlongo na shano alufu. Awo nawo wasigalaga du, kwaviya watowani watuhu gana na milongo miidi alufu wakomwagwa. 11 Gidioni agendaga mwe sila ya uchuuzi mwo lwega lwe dijangwa, ulailo wa zuwa wa Noba na Jogibeha niyo waditowa idifyo idyo kwa kuditukiza. 12 Maseuta waidi wa Wamidiani, awo Zeba na Salimuna wanyilikaga mna Gidioni awagulusaga na kuwagwila niyo aditenda idifyo idyo dya watowani dingile kizingizo.

13 Gidioni mwana Yoashi auyaga kulawa kwe nk'hondo akombokela kwe mneka wa Helesi 14 Uko amgwilaga mbwanga yumwenga ywa Sekoti niyo amuuza. Mbwanga uyo amwandikilaga mazina ye vilongozi na wadala wamanyikise wa Sukoti, uwazilo wawe wandaga want'hu milongo mfungate na mfungate. 15 Gidioni aitaga kwa want'hu wa Sukoti niyo awagamba, "Mwakumbukila ivo mwalemelaga kunambiza mkagamba hamkudaha kuwenk'ha nk'hande watowani wangu wosokelese. Nehinda hinati niwatahe Zeba na Salimuna, haluse Zeba na Salimuna ni awa aha." 16 Awasulumizaga vilongozi wa Sukoti kwa muwamba ngoma ne mbigili ya mwe dijangwa. 17 Iviyaiviya aumolaga umnala wa Penueli niyo awakoma want'hu wose wo mzi uwo.

18 Akajika Gidioni awauzaga Zeba na Salimuna, "Togoleni we vivihi awo muwakomile uko Tabali?"

Niyo wamhitula, "Wandaga enga ivo wili weye, kila yumwenga andaga enga mwana seuta."

19 Niyo Gidion agamba, "Awo wandaga wandugu zangu, chonk'hile tombo dimwenga. Nakelisa ikindedi, yandile hamwa wakomile hegu hyawakomileni." 20 Niyo amgamba mwanawe mkulu ywe kilume uyo Yateli, "Kimala uwakome." Mna uyo mwanawe ogohaga kuwakoma kwaviya andaga akei mwana mdodo.

21 Aho Zeba na Salimuna wamgambaga Gidion, "Kikome weye mwenye kwaviya ino ndima ya mnt'hu mgima." Ivo Gidioni awakomaga niyo aguha mikufu yandaga mwe zisingo ze zingamia zawe.

22 Akajika aho Waizilaeli wamgambaga Gidioni, "Unde kilongozi ywetu ivi haluse, ukahalawa welekwa wako nawo wande vilongozi kwaviya kukikombola kulawa kwa Wamidiani."

23 Gidioni niyo awahitula, "Heninde miye kilongozi ywenyu hegudu hata wanangu. Zumbe niye naande kilongozi ywenyu." 24 Mna niyo awagamba, "Nehaunga kint'hu kimwenga kulawa kwenyu. Kila yumwenga ywenyu anink'he ziheleni ziya mzitahile." Wamidiani wandaga Waishumaeli wavalaga heleni za zahabu.

25 Want'hu niyo wamhitula, "Chelelwa kukwink'ha." Ivo watandikaga zisuke hasi niyo kila yumwenga aika umwo ziheleni izo atahaga. 26 Ziheleni ze zahabu izo Gidioni azipataga zabulaga kilo milongo miidi, naho izo hiyo hamwenga na zia ahokelaga na heleni, mikufu ya mwe singo, suke za zambalau, izo wavalaga maseuta wa Mediani ne mikufu yavaligwe mwe zisingo ze zifalasi ne zingamia zawe. 27 Gidioni adamanyaga hili kulawa mwe vint'hu ivo na kukiika mwo mzi wakwe uwo Ofuli. Waizilaeli wose wagendaga kukivika idyo dihili dyanda lwinika kwa Gidioni na want'hu we mp'huga yakwe.

28 Ivo Wamidiani wahumwagwa ni Waizilaeli niyo Waizilaeli wanda hawakuwogoha naho. Isi yandaga ya utondowazi kwa miaka milongo mine mpaka hadya Gidioni eze abanike.

29 Gidion uyo Yelu Baali mwana Yoashi, auyaga kwe kaya yakwe niyo ekala uuko. 30 Andaga na wana kilume milongo mfungate kwaviya andaga na wavele wengi. 31 Iviyaiviya andaga na muwele wakwe uko Shekemu uyo amwelekelaga mwana amwink'haga zina niye Abimeleki. 32 Gideon mwana Yoashi abanikaga akanda na miaka mingi niyo amoselwa msanga kwe kikuta cha ise Yoashi uko Ofuli umzi wo lukolo lwa Abiezali.

33 Gideon eze abanike, Waisraeli wamlekega Mnungu niyo waiuiya milungu yawe na kuivika. Wamtendaga Baali Beliti kunda mnungu ywawe. 34 Naho hawagendeele kumvika Zumbe Mnungu ywawe awakombolaga kwa wank'hondo wawe wabindaga wingi awo wawa zungulukaga nt'hendelo zose. 35 Naho hawandaga wedi kwe mp'huga ya Gidioni, hamwenga na ayedi yose awatendele Waizilaeli.