1 Waizilaeli wose kulawa kwo mzi wa Dani mpaka Beeli Sheba hamwenga na want'hu we isi ya Gileadi waduganaga na kunda kint'hu kimwenga uko Mizipa ha Zumbe Mnungu. 2 Vilongozi wose we kabila dya Izilaeli wagendaga kudugana na want'hu wa Mnungu, naho wandaga watoani wakubula alufu magana mane wakugenda lwa viga wandaga ne vitowanilo. 3 Want'hu we dikabila dya Benjamini wevaga kugamba Waizilaeli weyawe wadugana uko Mizipa.

Waizilaeli niyo wamuuza yudya Mlawi, "Kigambileni wiihi uno ivo ilaile." 4 Ivo yudya Mlawi mgosi ywa yudya mvele akomigwe niyo amhitula, "Miye na muwele wangu chabulaga Gibea mzi we kabila dya Benjamini vileke kigone uko. 5 Kilo icho wezaga wagosi wa Gibea na kuizunguluka inyumba iyo wakaunga wanikome, vituhu vakwe wagonaga na muwele ywangu kwa kumkakalisa niyo wamtendela vihile mpaka abanika. 6 Ivo nakiguhaga kimba cha yudya muwele na kuukant'ha kant'ha vibesu na kuvigala kwa makabila yose ya Izilaeli kwaviya wadamanyaga uihi na mbuli ya kuihiza mwe Izilaeli. 7 Haluse nyuwe Waizilaeli mkafanyanye na kulava ulamuzi wenyu."

8 Want'hu wose wenukaga hamwenga niyo wakagamba, "Hahana hata yumwenga mwa nyuwe akuunga auye kwe dihema dyakwe hegu kwe nyumba yakwe. 9 Ivi nivo kikuunga kiitendele Gibea. Nekiitowe lugumba kimanye ivo nekiitowe Gibea. 10 Nekisagule want'hu mlongo mwa kila want'hu gana wa Izilaeli, na want'hu gana mwa kila want'hu alufu, na want'hu alufu mwa kila want'hu alufu mlongo. Awo nawande na ndima ya kuwenk'ha nk'hande watowani wa Izilaeli, awo wakuunga wande na ndima ya kuusulumiza mzi wa Gibea mwe isi ya Benjamini kwaajili ya uwihi wawe wautendile mwe Izilaeli." 11 Ivo wagosi wose wa Izilaeli waduganaga kwa hamwenga kwaajili ya kuutowa mzi uwo wa Gibea.

12 Makabila ya Izilaeli yatumaga want'hu waite kwe dikabila dya Benjamini na kuwagamba, "Ni wiihi wani uno udamanyike mwenyu? 13 Ivo walaveni want'hu awo wata masa wandile Gibea vileke kiwakome na kuusa wiihi utendese mwe Izilaeli." Mna want'hu we kabila dya Benjamini hawawategeleze ndugu zawe Waizilaeli. 14 Ivo walawaga mwe mizi yawe uko Gibea vileke wakatowane na Waizilaeli. 15 Want'hu wa kabila dya Benjamini waduganaga kulawa kwe mizi yawe, fyo dya want'hu alufu milongo miidi na mtandatu wata sime naho want'hu wakwikala mwo mzi wa Gibea wasagulaga watowani wadahi magana mfungate. 16 Mwa want'hu awo wasagulwe kwandaga na want'hu magana mfungate awo wakudaha kutowa ne dimoso, kila yumwenga adulaga iwe kwa nk'humbailwe na kutowa hadya akuunga. 17 Want'hu wa Izilaeli kuleka dikabila dya Benjamini wawaduganyaga wagosi alufu magana mane wakudaha kutowana kwa sime. Wose wandaga watowani wadahi.

18 Waizilaeli waitaga hant'hu ha kuvika uko Beseli vileke wamuuze Mnungu, niani akuunga nalongole kukwela kuita kwe nk'hondo vileke atowane na kabila dya Benjamini?

Zumbe niyo awahitula, "Yuda niye akuunga alongole."

19 Kwize kuche Waizilaeli waitaga na kutowa nk'hambi hagihi no mzi wa Gibea. 20 Waizilaeli niyo walawa na kugenda kutowana na want'hu we dikabila dya Benjamini uko hagihi na Gibea. 21 Want'hu we dikabila dya Benjamini walawaga Gibea niyo wawakoma want'hu alufu milongo miidi na waidi. 22 Mna Waizilaeli niyo wakegela moyo niyo wakepanga naho kwaajili ya kutowana nk'hondo enga ivo wakepangile nk'hongo. 23 Umwo wajike Waizilaeli wakwelaga kulanga niyo wakonga kuila ha Zumbe mpaka kisingi wakagamba, "Haluse kiite naho kikatowane nk'hondo na ndugu zetu we dikabila dya Benjamini?"

Zumbe niyo awahitula, "Heiye, kweleni mkatowane nawo."

Ivo idifyo dya Waizilaeli dyapataga ludole, 24 Waizilaeli niyo waita mwe dizuwa dya kaidi wakatowane na want'hu we dikabila dya Benjamini. 25 Mwe dizuwa idyo dya kaidi want'hu we dikabila dya Benjamini walawaga Gibea na kugenda kuwatowa na kuwakoma Waizilaeli weyawe mlongo na mnane alufu, wose wandaga na sime wahinizwe vedi.

26 Akajika watowani wose wa Izilaeli waitaga Beseli nawo wekalaga ha Zumbe. Wafungaga mpaka kisingi na kumlavila Zumbe Mnungu malavo yo kokwa na malavo ya utondowazi. 27 Waizilaeli wamlombezaga ulangilizi Zumbe Mnungu uko Beteli. Mwo lupisi ulo Disanduku dye Ndagano dyandaga uko Beteli, 28 Finehasi mwana Eliyazali mwana Haluni andaga mlavant'hambiko. Elo wamuuza Zumbe Mnungu, "Haluse kiite naho kikatowane na wandugu zetu we dikabila dya Benjamini?"

Zumbe Mnungu niyo Awahitula, "Iteni kwaviya luvi neniwenk'heni uhumi mwa woho."

29 Ivo Waizilaeli waikaga watowani wa kunyatila kuuzunguluka mzi wa Gibea. 30 Waizilaeli wagendaga kutowana na want'hu we dikabila dya Benjamini mwe dizuwa dya katatu. Niyo wekepanga naho kuutowa mzi wa Gibea enga viya watendile mwo lupisi ludya lwa nk'hongo. 31 Want'hu we dikabila dya Benjamini wafosaga vileke waite wakatowane nawo, Waizilaeli niyo wawagamba want'hu we dikabila dya Benjamini wafose kuse yo umzi. Niyo wakonga kutowana na kuwakoma want'hu mlongo na nt'hatu wa Izilaeli enga ivo watendile lupisi lwomboke mwe sila ikuita Beseli na Gibea na mwe isi za mwe nt'hindiga.

32 Want'hu we dikabila dya Benjamini niyo walonga, "Kiwatowa hameso yetu enga viya nk'hongo." Mna Waizilaeli nawo niyo wagamba, "Suwe kinyilikeni vileke kiwasogeze kwe zisila zink'hulu." 33 Wadya watowani wose wa Izilaeli wafosaga aho wendile niyo wekepanga naho uko Baali Tamali, wadya wandile wakawanyatila wasunguzaga kufosa aho wandile mwe nt'hendelo yo usweelo wa zuwa wa mzi wa Gibea. 34 Niyo want'hu alufu mlongo wasagulwe mwe Izilaeli yose wezaga na kuitowa Gibea. Nk'hondo iyo yandaga nk'hulu vitendese mna want'hu wa Benjamini hawamanyize kugamba kubanangwa kwawe kwi hagihi. 35 Zumbe Mnungu niyo awambiza Waizilaeli niyo wawahuma want'hu wa Benjamini. Waizilaeli wawakomaga want'hu wa Benjamini alufu milongo miidi na washano na gana, wose wadahile kutowana na sime. 36 Ivo want'hu we dikabila dya Benjamini wamanyaga kugamba wahumigwa.

Waizilaeli wauyaga kunyuma enga kugamba wawanyilika want'hu we dikabila dya Benjamini vileke wawenk'he luneka weyawe wandaga wakanyatila wautowe mzi wa Gibea. 37 Wadya wakuwanyatila wasunguzaga kwingila mwo mzi wa Gibea niyo wawakoma want'hu wose kwa sime. 38 Wadya watowani wose wa Izilaeli na want'hu wandaga wakanyatila wakeink'haga vilagiso kugamba wadya wakunyatila wakeza kuona mosi ukufunk'ha mwo mzi, na ivo wautowe umzi. 39 Mwo lupisi ulo want'hu we dikabila dya Benjamini wandaga wawakoma kale want'hu wa Izilaeli milongo mitatu niyo wagambana, "Kiwatowa enga viya kiwatoile hadya nk'hongo." 40 Mna umwo diya vunde dyo umosi dize dikonge kufunk'ha kulawa mwo udya umzi, want'hu we dikabila dya Benjamini wahitukaga kunyuma niyo weheelwagwa kuwona umosi wafunk'ha mzi wose. 41 Niho want'hu wa Waizilaeli wahitukaga, aho want'hu we dikabila dya Benjamini wogohesaga kwaviya wamanya kugamba file yawe ihagihi. 42 Kwa ivo wahitukaga na kuwanyilika Waizilaeli kwe dijangwa mna hawainyilike ink'hondo iyo. Nawo want'hu wa Izilaeli wadya walaile mwe mizi idya wawakomaga uko. 43 Waizilaeli wawakulumbuzaga want'hu we dikabila dya Benjamini kila hant'hu, wawatimilaga na kuwapata umwo wandaga wakehumuila mwo mzi wa Gibea wawakomaga wengi mwa woho mwe nt'hendelo yo ulailo wa zuwa. 44 Wawakomaga want'hu we dikabila dya Benjamini alufu mlongo na mnane, wose wandaga watoani wadahi. 45 Want'hu watuhu we dikabila dya Benjamini weze wahituke na kugulukila kwe dijangwa mpaka kwo luwe lwa Limoni, Waizilaeli wawakomaga want'hu alufu shano wakanda mwe sila. Wawatimilaga naho want'hu we dikabila dya Benjamini mpaka kwo mzi wa Gidomu uko wawakomaga want'hu watuhu Alufu mbili.

46 Want'hu wose we dikabila dya Benjamini wakomigwe wandaga alufu magana milongo miidi na shano wandaga watowani hewekogoha. 47 Mna want'hu magana mtandatu wanyilikaga kuhinga kwe dijangwa kwo luwe lwa Limoni na kwikala uko kwa lupusi lwa miezi mine. 48 Waizilaeli wauyaga na kuwakoma want'hu wose we dikabila dya Benjamini hamwenga na mifugwa na kila kint'hu chandaga aaho. Naho mizi yose wayokaga moto.