1 Mwa mazuwa ayo Izilaeli kwandaga hahana seuta. Ivo kabila dya Wadani dyandaga dikazungula hant'hu ho kwikala kwaviya wandaga wakei kudaha kwingila mwe isi wenk'wagwa inde yawe mwa makabila ya Izilaeli. 2 Ivo dikabila dya Dani wawasagulaga want'hu washano wata udahi wawatume kulawa uko Sola na Eshitaoli vileke waite wakaipelembe isi. Want'hu awo waitaga ne zink'holo zawe zose. Niyo wawagamba, "Iteni mkaipelembe isi iyo." Ivo want'hu awo wagonaga mwe isi ye vigulu va Ifulaimu niyo wekala umo mwe nyumba ya Mika. 3 Weze wabule hagihi ne nyumba ya Mika, wamanyaga izwi dya yudya mbwanga Mlawi, ivo niyo wengila umwo na kumuuza, "Ni ani akuletile aha? Wadamanya ndima yani aha?"

4 Yehe niyo awahitula, "Miye na Mika kizumilana ninde mlavant'hambiko ywakwe."

5 Niyo wamgamba, "Chakulombeza kiuzile kwa Mnungu uneva nt'hambo yetu neinde yedi."

6 Yudya mlavant'hambiko niyo awahitula, "Iteni p'heho yedi. Nt'hambo yenu izumilwa ni Zumbe."

7 Ivo elo wadya want'hu washano wahalawaga na mpaka Laishi, waonaga want'hu wa uko ivo wandile wekala kwa utondowazi enga want'hu wa Sidoni. Wandaga wakekala kwa uwedi hewekukawiila maihi naho hawehungukilwe ni chochose mwe isi. Wandaga hale na want'hu wa Sidoni naho wandaga hawana umbuya na want'hu wowose.

8 Weze wauye kwa wandugu zawe uko Sola na Eshitaoli wawauzaga, "Mwaonagai uko?"

9 Niyo wawahitula, "Kimaleni," "Kiteni kikaitowe isi ya Laishi. Kiiona isi iyo yedi. Mse kwikala aha haheina cho kudamanya, sunguzeni kugenda kuitaha isi iyo. 10 Mnaita uko nomuwabwiile want'hu hewekukawiila maihi naho ni isi nk'hulu, naho Mnungu kawenk'hani udahi wa kuiguha. Ni isi heikuhungukilwa ni kint'hu chochose." 11 Ivo want'hu magana mtandatu wa kabila dya Dani wakanda na vitowanilo vawe wahalawaga kulawa Sola na Eshitaoli. 12 Umwo wakanda mwo utafi watoaga nk'hambi uko usweelo wa zuwa wa Kiliati Yealimu mwe isi ya Yuda. Nivo vikuleka hant'hu aho mpaka ivi dielo hetangwa nk'hambi ya Dani. 13 Kulawa uko waitaga mwe isi ye vigulu va Ifulaimu, niyo wabula mwe nyumba ya Mika.

14 Wadya want'hu washano wagendaga kuipelemba isi ya Laishi wawagambaga wandugu zawe, "Haluse mmanya kugamba mwe nyumba izi kuna kizibao na mahili ya kusongola na vihili ve milungu midodo? Ivo fanyanyeni ivo mkuunga mdamanye." 15 Ivo wadya wapelembi waitaga mwe nyumba ya Mika, niyo wengila ndani na kumuuza mbuli zakwe yudya mbwanga Mlawi. 16 Wadya want'hu magana mtandatu we kabila dya Dani wakanda ne vitowanilo vawe wakimalaga he nk'hili. 17 Wadya want'hu washano awo waitile kuipelemba isi wengilaga kundani na kuguha diya dihili dyo kusongola na kiya kizibao ne vihili ve milungu midodo. Watendaga ayo umwo yudya mlavant'hambiko akanda kakimala he nk'hili hamwenga na wadya want'hu magana mtandatu wakanda ne vitowanilo.

18 Want'hu awo weze wengile mwe nyumba ya Mika na kuguha mahili ya kusongola, ne kizubao na vihili ve milungu midodo. Yudya mlavant'hambiko niyo awaona na kuwauza, "Mwadamanyai?"

19 Nawo niyo wamhitula, "Nyamala usekulonga chochose, kiitanye unde tatiyetu na mlavant'hambiko ywetu. Togola ni vedi weye kunda mlavant'hambiko kwa ajili ya nyumba ya mnt'hu yumwenga hegu kunda mlavant'hambiko we dikabila dimwenga dya Dani?" 20 Yudya mlavant'hambiko niyo anda na kinyemi. Aguhaga kadya kafuko na diya dihili ne vihili va milungu midodo, niyo aita hamwenga na wadya want'hu. 21 Ivo wakongaga nt'hambo yawe, wawalongozaga wana wawe ne mifugwa yawe na ugoli wawe.

22 Umwo wakanda hale ne nyumba ya Mika, want'hu wandaga wekekala hagihi na Mika wetangwagwa niyo wadugana hamwenga, nawo wawatimilaga want'hu wa kabila dya Dani na kuwabwiila. 23 Weze wawatimile wawagutilaga want'hu we dikabila dya Dani nawo wahitukaga na kumuuza Mika, "Weye waungai ikuleka weza na fyo dya want'hu awa wose?"

24 Mika awahitulaga akawagamba, "Nyuwe mwaiguhaga milungu yangu iyo niidamanye naho mwamguhaga mlavant'hambiko ywangu niyo mwakeitila ‘Haluse miye nna kint'hu chani kituhu?’ Ivo elo mwadaha vivihi kuniuza kugamba, naungai?"

25 Want'hu we dikabila dya Dani niyo wamgamba, "Usekulabila na suwe, unatenda ivo want'hu wata maya wadaha kukukoma weye ne mp'huga yako." 26 Ivo want'hu we dikabila dya Dani niyo wakeitila, Mika eze aone wanaludole kujink'ha yehe ahitukaga na kuuya kwe kaya yakwe.

27 Nawo niyo waviguha vint'hu adamanyaga Mika no mlavant'hambiko andaga naye, nawo niyo wabula Laishi kwa want'hu heweina nk'huswank'huswa na want'hu hekawiile maihi niyo wawakomaoa kwa sime no kuwoka pele umzi wawe. 28 Kwandaga hahali mnt'hu yoyose wa kuwaokola, kwaviya wandaga hale na mzi wa Sidoni naho wandaga hawana umbuya na want'hu watuhu. Mzi uwo wandaga hagihi ne dikolongo dya Beti Lehobu. Want'hu wa kabila dya Dani wauzengaga naho mzi uwo niyo wekala umo. 29 Mzi uwo niyo wetangwa zina dyakwe Dani, viligane ne zina dya tati yawe uyo elekwe na Izilaeli, mna mzi uwo aho nk'hongo wetangagwa Laishi. 30 Want'hu we dikabila dya Dani wakimalisaga mahili ya kusongola, naho yudya mlavant'hambiko ywawe Yonasani mwana Gelishomu mwezukulu ywa Musa na wanawe, wandaga walavant'hambiko wa kabila dya Dani mpaka want'hu we isi iyo aho waitaga kwe samo. 31 Mwo lupisi lwose Dihema Dikukile umwo yandaga Shilo.wandnt'hu we dikabila dya Dani wandaga wakavika dihili dyo kusongolwa idyo dyadamanyagwa ni Mika.