1 Zuwa dimwenga Samsoni aitaga kwo mzi wa Gaza, amuonaga mvele yumwenga pamp'he niyo agona naye. 2 Want'hu wa Gaza weze wagambilwe kugamba Samsoni andaga aaho, wahazungulukaga hant'hu aho niyo wagoja kilo chose mwe nk'hili yo mzi. Wanyamalaga zii kilo chose niyo wagamba, "Nekigoje kuche vileke kimkome."

3 Mna Samsoni agonaga mpaka kilogati niyo enuka kilo icho niyo atoza mafigwe maidi ye zink'hili nokuyang'ola hamwenga ne didanga dyakwe niyo enula mwe mahega yakwe, aviguhaga mpaka kwo lunenengwa lwo mnima ukukaulana na Hebuloni.

4 Yeze yajinke ayo Samsoni amuungisaga mvele yumwenga etangwagwa Delila uyo endaga akekala mwe dikilongo dya Soleki. 5 Wakulu wa Wafilisti wamwizilaga Delila nakumgamba, "Mhembeleze Samsoni vileke umanye chotoko cho ludole lwakwe vileke kimtoze na kumnyinya na kumsulumiza. Unadamanya ivo kila yumwenga wetu naakwink'he masawa alufu na gana dimwenga."

6 Delila niyo amgamba Samsoni, "Naunga unigambile chotoko cho ludole lwako na ivo ukuunga uhumigwe na unyinyigwe."

7 Samsoni niyo amhitula, "Uneva wananinyinya kwa sigi mbisi za mfungate uta izo hezinyaile aho heninde no ludole naho neninde enga want'hu watuhu."

8 Wakulu wa Wafilisiti niyo wamwigailaga uyo mvele sigi mbisi mfungate za uta hezinyaile naye niyo amnyinya nazo Samsoni. 9 Delila andaga kaika want'hu mwe chumba cha kundani vileke wamtoze. Niyo amwitanga, "Samsoni, Wafilisiti weza kukusulumiza" Samsoni niyo azinkant'ha ziya sizigi enga luzi ludugane no umoto. Ivo hahali amanyize chotoko cho ludule lwakwe.

10 Delila niyo amgamaba Samsoni, "Weye kunibwalasa naho kunidant'hiliza. Haluse nigambile wadaha kunyinywa kwa kint'hu chani."

11 Samsoni niyo amhitula, "Wananinyinya kwa sigi mp'hya izo hezinati kudamanyilwa kint'hu chochose naho neninde hina ludole enga mnt'hu yeyose."

12 Ivo Delila aguhaga sigi mp'hya niyo amnyinya nazo. Niyo amwitanga "Samsoni Wafilisiti weza kukump'hukila." Kwandaga na want'hu mwe chumba wakumnyatila. Samsoni niyo azikant'ha sigi izo kulawa mwe mikono yakwe enga luzi.

13 Delila niyo amgamba Samsoni, "Hata ivi haluse kunidant'hiliza nigambile haluse wadaha kunyinywa na kint'hu chani?."

Samsoni niyo amgamba, "Unadaha kuziluka zifili zangu vifundo mfungate na kuzinyinya na suke mwo mgamba wo kufumila suke, aho heninde na ludole. Neninde enga mnt'hu mtuhu yeyose". 14 Aho Samsoni andaga kagona, Delila niyo aluka fili za Samsoni vichungi mfungate niyo azinyinya mwe p'hindo ye suke, na kuvinyinyisa mwo mgamba.

Niyo amgamba, "Samsoni, Wafilisiti weza kukukump'hukila!" Samsoni niyo enuka kulawa mwe zint'hongo na kuung'ola udya mgamba na kuitatula idya isuke imwe mp'hindo. 15 Delila niyo amgamba Samsoni, "Wadaha vivihi kugamba ‘Nakuunga,’ Mna hukunigambila chotoko cho ludole lwako? Kunibwalasa nk'hanana nt'hatu." 16 Dilila agendeelaga kumsunk'hasunk'ha Samsoni kwa kumgambila mbuli iidya kila zuwa, moyo wakwe wafaga chevu na kunda hagihi na kubanika.

17 Ivo amgambilaga yudya mvele chotoko chakwe chose, niyo amgamba, "Lumo halwomboke mwo mtwi wangu kwaviya miye hiikwa kwa ndima ya Mnungu kukongela aho nandile mwe nda ya mnala. Uneva fili zo mwo mtwi ywangu zinamogwa neninde hina ludole enga mnt'hu mtuhu yeyose!"

18 Ivo Delila eze aone Samsoni kamgambila chotoko chakwe chose, atumaga ulosi kwa vilongozi wa Wafilisiti niyo awagamba, "Soni naho kwaviya kanigambila chotoko chakwe chose." Ivo vilongozi wa Wafilisiti niyo weza kwa Delila wakanda na matundu mwe mikono yawe. 19 Delila niyo amgoneza Samsoni mwe viga vakwe, Samsoni naye niyo agona nt'hongo. Delila Amwitangaga mnt'hu vileke ammoge vichungi mfungate ve zifili mwo mtwi wakwe. Niyo Delila akonga kumsulumiza Samsoni kwaviya handga hana ludole naho. 20 Delila niyo amwitanga Samsoni, "Samsoni Wafilisiti weza kuku kump'hukila!" Samsoni niyo enuka kulawa mwe zint'hongo akagamba, "Nenifose kuse na kukekombola enga mazuwa yose." Mna hamanyaga kugamba Zumbe Mnungu amlekaga. 21 Wafilisiti wamgwiilaga na kumn'gola meso yakwe, wamguhaga mpaka Gaza. Wakanda wamnyinya kwa mp'hingu za shaba, wamwiikaga uko vileke asigint'he ingano uko kwe divugailo. 22 Eze amogigwe, fili zakwe niyo zakonga kukula naho.

23 Ivo vilongozi wa Wafilisiti waduganaga kwa hamwenga vileke wamlavile malavo mnungu ywawe akwitangwa Dagoni, niyo wadamanya wila mkulu nakugamba, "Mnungu ywetu kamgela mnk'hondo ywetu Samsoni mwo udahi wetu."

24 Umwo wakanda na kinyemi mwe mioyo yawe wagambaga, Mwigaleni Samsoni eze avine vileke kinde na kinyemi. Ivo wamletaga Samsoni kulawa mwe diya divugailo naye niyo aseziga hameso yawe.

Niyo wamwika hagati ye mikola miidi. 25 Want'hu weze wamuone Samsoni wamtogolaga mnungu ywawe wakagamba, "Haluse Mnungu ywetu mwiika mnk'hondo ywetu mwo udahi wetu, yudya abanange isi yetu na kuwakoma want'hu wetu wengi." 26 Samsoni niyo amgamba yudya mbwanga amtozile mkono wakwe akamlongoza, "Niike hant'hu aho hudaha kuitoza mikola itozile dizumba vileke name nigamile." 27 Naho dizumba diya dyandaga na want'hu wengi wagosi kwa wavele na vilongozi wose wa Wafilisiti wandaga umo, kulanga kwe dizumba idyo kwandaga na want'hu alufu nt'hatu wagosi kwa wavele, awo wandaga wakamkaula Samsoni ivo wandaga wakamsezigila. 28 Samsoni niyo amlombeza Zumbe Mnungu akagamba, "Zumbe Mnungu nikumbukile nakulombeza unigele ludole uulu du, vileke nilihize kwa Wafilisiti wayang'oile meso yangu." 29 Samsoni niyo aitoza idya mikola miidi za hagati izo zitozile dizumba niyo aitozaga mikola iyo, mkola umwenga kwo mkono wo kulume, mkola umtuhu nawo mkono wo kumoso. 30 Samsoni niyo agamba, "Goja nibanike hamwenga na Wafilisiti!" Niyo aisindika idya mikola kwa ludole lwakwe lwose, diya dizumba niyo dyawagweela vilongozi na want'hu wose wandile mdya mwe dizumba. Ivo awakomaga want'hu wengi mwo lupisi lwo kubanika kwakwe kujink'ha mazuwa yo ugima wakwe.

31 Ivo wanduguze ne mp'huga yakwe yose wagendaga kumguha na kummosela msanga hagati ya mzi wa Sola no mzi wa Eshitaoli hagihi ne kikuta cha Manoa ise. Samsoni andaga mlamuzi ywa Izilaeli kwa miyaka mlongo miidi.