1 Wazilaeli wamtendelaga wavu Zumbe naho, Zumbe niyo awalekela Wafilisiti wawalongoze Waizilaeli miaka milongo mine.

2 Mwo lupisi ludya kwandaga na mnt'hu etangwagwa Manoa wo mzi wa Zola. Uyo andaga ni ywe dikabila dya Dani. Mkaziwe handaga na wana kwaviya andaga mgumba. 3 Mtumigwa ywa Zumbe amlailaga uyo mvele niyo amgamba, "Weye huna wana kwaviya ywi mgumba, mna nowinule ubovu iiviivi niyo wengila nyumba mwana kilume. 4 Ukaulise, use kuvata mp'hombe yoyose hegu kudya kint'hu chochose hekizumilwe ha Mnungu. 5 kwaviya nowinule ubovu na kweleka mwana kilume. Fili zo mwana uyo zise kumogwa mbwitu kwaviya naande kaikwa kwa ndima ya Mnungu kwa kilapi kukongela dizuwa dyo kwelekwa kwakwe. Naakonge indima ya kuwakombola Waizilaeili kulawa kwa Wafilisiti."

6 Yudya mvele agendaga kumgambila mgosiwe, "Mnt'hu ywa Mnungu kaniziila, naho nakanda ywa kutisa enga mtumigwa ywa kwe mbingu. Himuuzile dizina dyakwe na uko alaile, naho naye hanigambile idizina dyakwe. 7 Mna nakanigamba, ‘Nowinule ubovu na kwingila nyumba mwana kilume. Naho kanigamba nise kuvata mp'hombe na kudya kint'hu chochose hekizumilwe ni Mnungu, kwaviya uyo mwana kilume naaikwe kwa ndima ya Mnungu kwa kilapi mwo wikazi wakwe wose.’"

8 Manoa niyo alombeza Zumbe akagamba, "Zumbe chakulombeza, uyo mnt'hu ywa Mnungu umtumile akiuiye akigambile nekimdamanyilei uyo mwana kilume umwo akeza kwelekwa."

9 Mnungu adamanyaga kiya Manoa alombezaga, naho yudya mtumigwa ywa Zumbe auyaga kwa yudya mvele aho andaga kekala uko kwo mgunda mna mgosiwe handaga hamwenga naye. 10 Ivo yudya mvele asunguzaga kuguluka no kugenda kumgambila kugamba, "Kaula yudya mnt'hu kaniziila mwe dizuwa diya, keza naho."

11 Manoa akimaalaga niyo amtimila mkaziwe. Amuitilaga yudya mnt'hu niyo amuuza, "Weye niwe walongaga na mkazangu?"

Niyo yudya mnt'hu amhitula, "Heiye."

12 Manoa niyo amgamba, "Haluse elo, mbuli zako nezi kint'he ini, mbwanga uyo naande ywa vivihi naho ndima yakwe neinde ni ihi?"

13 Mtumigwa ywa kwe mbingu ywa Zumbe ahitulaga, "Mkazio akaulise aungwa adamanye kila kint'hu nimgambile, 14 hakuungwa kudya chochose kikulawa mwe zabibu naho asekuvata mp'hombe yoyose hegu kudya kint'hu chochose hekizumilwe ni Mnungu. Adamanye kila kint'hu kiya nimgambile."

15 Manoa andaga hamanyize kugamba uyo andaga mtumigwa ywa kwe mbingu ywa Mnungu niyo amgamba, "Nakulombeza hake goja usekuita, kikuchinjile mwana mbuzi." 16 Mna mtumigwa ywa kwe mbingu ywa Zumbe niyo amhitula. "Hata uneva unanilemeza kuita henidye nk'hande yako. Mna uneva waunga ulave malavo ya kokwa pele vaungwa umwink'he Zumbe." Manoa hamanyaga kugamba uyu andaga ni mtumigwa ywa kwe mbingu ywa Zumbe.

17 Manoa niyo agamba, "Kigambile dizina dyako vileke kize kikwink'he nt'hogola umwo zimbuli zako zikeza kulaila."

18 Yudya Mtumigwa ywa kwe mbingu niyo amuuza, "Nii mwauza dizina dyangu? Zina idi ni dya kweheela."

19 Ivo Manoa aguhaga mwana mbuzi uyo na malavo ya unga niyo amlavila Zumbe aho he kilingo cha kutambikila mnanga mwo luwe, Zumbe Mnungu naye niyo adamanya vihungi aaho Maoa na mkaziwe wakakaula. 20 Umwo zindilija zandaga zika limbija kulawa aho hokulavila nt'hambiko, Manoa na mkaziwe wamuonaga mtumigwa ywa kwe mbingu ywa Zumbe akakwela kuita kwe mbingu umwo mwe zindilija. Ivo Manoa na mkaziwe niyo wamvika Mnungu. 21 Manoa amanyaga kugamba uyo andaga mtumigwa ywa Zumbe Mnungu. Mtumigwa ywa kwe mbingu hamlaile naho Manoa na mkaziwe.

22 Manoa niyo amgamba mkaziwe, "Ikindedi haluse chabanika kwaviya kimuona Mnungu!"

23 Mna mkaziwe niyo amgamba, "Uneva Zumbe aungile kukikoma hegu hahokele malavo yetu yo kokwa pele hegu malavo yetu yo unga mwe mikono yetu, naho hegu hakilagise aya yose na kukigambila kint'hu iki mwo lupisi ulu."

24 Mvele yudya engilaga nyumba mwana kilume niyo amwink'ha zina niye Samsoni. Mwana uyo akulaga niyo Zumbe amvikila. 25 Muye ywa Zumbe wakongaga kukwezela umwo andaga Mahane Dani hagati ya Zolahi na Eshitaoli.