1 Umwo Ehudi eze abanike, Waizilaeli wadamanyaga uwihi ha Zumbe. 2 Zumbe Mnungu niyo awaika mwo udahi wa Yabini, seuta ywa Kanaani, uyo ekalaga uko Hazoli. Mkulu ywe difyo dya watowani wakwe etangwagwa Sisela mkaya ywa Halosheti Hagoimu. 3 Seuta Yabini andaga na magali ya kuvutigwa ni Falasi yakubula magana kenda ya kilama. Awatendelaga Waizilaeli ukwank'hwalu kwa miaka milongo miidi, nawo niyo wamwiila Zumbe Mnungu awaambize.

4 Mwo lupisi ulwo, kwandaga na mlotezi ywe kivele etangwagwa Debola, mkaza Lapidoti, andaga mlamuzi ywa Izilaeli mwo lupisi ulo. 5 Debola andaga akadamanyila ndima hasi yo mtende wandaga mwo mzi wa Lama na mzi wa Beteli mwe isi ye vigulu ya Efulaimu. Want'hu wa Izilaeli wamwiizilaga vileke awalamule masa yawe. 6 Zuwa dimwenga amwitangaga Balaki mwana ywa Abinoamu ywa Kadeshi mwe isi ya Nafutali, eze eze amgambaga, "Zumbe Mnungu, Mnungu ywa Izilaeli, kagamba, ‘Kaduganye want'hu alufu mlongo kulawa mwa makabila ya Nafutali na Zebuloni. Uwalongoze kuita kwo mnima wa Tabali. 7 Miye nenimtende Sisela, mkulu ywa Watoani wa Yabini akanda na magali yakwe ya nk'hondo, atowane na nyuwe kwo mto Kishoni. Miye nohwink'he uhumi mwakwe.’"

8 Balaki niyo amgamba Debola, "Uneva nekiitanye, neniite, mna uneva hekiitanye na weye miye heniite." 9 Debola niyo amhitula, "Ni vedi, neniite hamwenga na weye, mna houpate nt'hunyo yeyose yo uhumi wa nk'hondo, kwaviya Zumbe Mnungu kamwink'ha ludole uyo mvele amhume Sisela." Ivo Debola niyo atimilana na Balaki wakaita Kadeshi. 10 Balaki niyo ayetanga makabila ya Nafutali na Zabuloni uko Kadeshi, want'hu alufu mlongo wakwelaga wakamtimila. Debola nae aitaga hamwenga nae.

11 Mwo lupisi ulo, Hebeli uyo wo lukolo lwa Wakeni andaga kakepagula na Wakeni weyawe awo welekwa wa Hobabu, mnamuwe dya Musa, akimaga hema dyakwe hagihi no mti ukwitangwa Mwaloni wa Zaananimu uwo wandaga hagihi na Kadeshi.

12 Sisela eze eve kugamba Balaki mwana ywa Abinoamu kaita kwo mnima Taboli, 13 Sisela aduganyaga magali yakwe milongo kenda ya kilama na akanda hamwenga na wagosi wose, ahalawaga Halosheti Hagoimu kuita kwo mto Kishoni.

14 Debola niyo amgamba Balaki, "Ita! Dielo nidyo dizuwa Zumbe Mnungu akwink'hile udahi wa kumhuma Sisela. Zumbe Mnungu akulongoela." Ivo Balaki niyo aseela kulawa kwo mnima Taboli na kuwalongoza want'hu wakwe alufu mlongo. 15 Umwo Balaki na watowanoi wakwe weze wamtowe Sisela Zumbe niyo awazaganya Sisela na watoani wakwe wose na magali yakwe ya nk'hondo wasekumanya mitoanile. Sisela aseelaga mwe digali dyakwe, niyo anyilika. 16 Balaki niyo awatimila watoani awo na magali mpaka Halosheti Hagoimu na kuwakoma watoani wose wa Sisela kwa sime, hakusigale hata yumwenga.

17 Mna Sisela niyo aguluka mpaka kwe dihema dya Yaeli, mkaza Hebelu lukolo lwa Wakeni. Adamanyaga ivo kwaviya nokunda na Ndagano ya utondowazi mwa seuta Yabini ywa Hezoli ne mp'huga ya Hebeli. 18 Yaeli niyo amgamba Sisela, "Zumbe ywangu, so kwangu, naho usekogoha." Sisela engilaga mwe dihema dyakwe niyo amgubika ne suke izamile. 19 Sisela amgambaga Yaeli, "Nakulombeza unink'he mazi ninywe, kwaviya nna nk'hilu." Agubulaga kabete kandaga na mele niyo amwink'ha niyo anywa, niyo amgubika naho. 20 Sisela niyo amgamba, "Kimala ho lwivi lwe dihema. Mnt'hu yeyose aneza kukuuza kugamba, hana mnt'hu yeyose aha, umgambe hahali."

21 Mna Sisela kwaviya asokelesaga agonesaga. Yaeli mkaza Hebeli aguhaga kigingi na nk'humbo mwo mkono wakwe na kumbasa mp'halahole niyo akigomandila mwe kihanga chakwe niyo chalawanya mpaka mwe sanga. Ivo Siseli niyo abanika. 22 Umwo Balaki andaga akamtimila Sisela, Yaeli afosaga kuse akamsingile niyo amgamba, "Soo kwangu nohulagise mnt'hu ukumzungula." Balaki niyo engila mwe dihema dya Yaeli na kumbwiila Siseli hasi, kabanika naho kigingi che dihema kigomandilwa mwe kihanga chakwe.

23 Ivo, zuwa idyo Zumbe Mnungu awenk'haga Waizilaeli uhumi mwa seuta Yabini ywa Kanaani. 24 Waizilaeli niyo wagendeela kumkulumbuza Yabini, seuta ywa Kanaani, mpaka aho wakumkomaga pele.