1 Mwo lupisi lwo kuvuna ngano, Samsoni aguhaga mwanambuzi niyo agenda kumkaula mkaziwe, "Niyo amgamba mkwewe naunga ningile mwe chumba cha mkazangu vileke nimuone" Mna mkwewe alemelaga.

2 Mkwewe niyo amgamba, "Ikindedi nehagamba kumwihiisa ivo niyo namloza kwa yumwenga mwa wadya wandaga nawo mwe ndoza yako. Hata ivo mvunawe naye mndele kujink'ha yehe. Haluse umlombe yehe."

3 Samsoni niyo amgamba, "Heninde na masa kwa yadya huunga niwatendele Wafilisiti." 4 Ivo Samsoni agendaga kugwila mabwasiko magana matatu niyo ayanyinya mikila yawe maidi maidi kwa hamwenga, niyo aika magala mwe mikila yawe. 5 Akajika ayakwelezaga magala ayo niyo ayalekela mabwasiko ayo niyo yengila mwe zink'honde za mizabibu za Wafilisiti na koka pele nk'honde ze ngano hamwenga ne ngano yandaga ikei kuvunwa hamwenga ne zink'honde ze mizeituni. 6 Niyo Wafilisiti wauzana, "Niani atendile mbuli ino?" Niyo wagambilwa, "Ni Samsoni yudya mkwewe kulawa Timna. Kwaviya Mnt'hu uyo amguhaga mkaziwe dya Samsoni na kumwink'ha yumwenga mwa wadya wandaga naye kwe ndoza."

Ivo Wafilisiti waitaga na kumoka kwa moto yudya mvele na ise. 7 Samsoni niyo awagamba, "Uneva nyuwe mdamanya mbuli enga ino, kindedi nakelisa kugamba henihalawe aha mpaka nilihize kiya mnidamanyile." 8 Ivo awatowesaga na kuwakoma want'hu wengi, niyo agenda kwikala mwo luwe lwa Etamu.

9 Wafilisiti wezaga na kutowa nk'hambi mwe isi ya Yuda niyo wasambala hagihi ne mzi wa Lehi. 10 Want'hu wa Yuda niyo wauzana, "Nii mwiza kutowana na suwe?"

Niyo wawahitula, "Kiza vileke kimgwiile Samsoni kimtende enga ivo akitendile." 11 Ivo want'hu gana mlongo na nt'hatu wa Yuda waselaaga na kuita kwo luwe lwa Etamu, niyo wamgamba Samsoni, "Togola humanyize kugamba Wafilisiti wakikaila? Haluse kukitendelai?"

Niyo awahitula, "Miye hiwatendela enga viya wanitendile." 12 Wamgambaga, "Kiseela kikunyinye na kuwatenda Wafilisiti wakuike mwo udahi wawe."

Samsoni niyo awagamba, "Keliseni kugamba homnikome nyuwe wenye."

13 Wamgambaga, "Ni vedi suwe hekikukome mna nekikunyinye na kuwatenda Wafilisiti wakuike mwo udhi wawe." Ivo wamnyinyaga kwa sigi mbili mp'hya niyo wamguha kulawa mwe mp'hanga. 14 Eze abule Lehi, Wafilisiti wezaga na kugutila. Muye ywa Zumbe amgelaga ludole Samsoni ziya sizigi zimnyinyele mwe mikono yakwe zakant'hikaga enga luzi lokigwe moto niyo zamlekela niyo kutomoka hasi. 15 Samsoni aonaga jeje dya mp'hunda bisi niyo adiguha na kuwakoma Wafilisiti alufu. 16 Samsoni niyo agamba,

"Kwa jeje dya mp'hunda hiwakoma want'hu alufu

Kwa jeje dya mp'huda hiduganya malundo lundo ya vimba."

17 Eze ibinde kulonga audulaga diya dijeje na hant'hu aho etangagwa Lamasi Lehi nuko kugamba mnima wa jeje.

18 Samsoni atozagwa ni nk'hilu niyo amlombezaga Zumbe Mnungu akamgamba, "Kunink'ha mndima ywako uhumi mkulu. Togola haluse nounileke nibanike kwa nk'hilu na kutahigwa ni Wafilisiti heweitile kwe dilago?" 19 Zumbe agubulaga hant'hu aho handaga na bome uko Lehi, mazi niyo yalawa. Samsoni anywaga mazi ayo niyo auwiywa ni ludole. Ivo nch'oko iyo yetangagwa Eni Hakole, naho iyuko uko Lehi mpaka ivi dielo.

20 Samsoni andaga mlamuzi ywa Waizilaeli kwa lupisi lwa miaka milongo miidi umwo Wafilisti wandaga wakaikaila isi.