1 Aho Abimeleki eze Abanike, Tola mwana Pua mwezukuluwe dya Dodo ezaga kuwakombola Waizilaeli. Yehe andaga ywe dikabila dya Isakali naho ekalaga uko Shamili kwe isi ye ivigulu va Ifulaimu. 2 Tola ailongozaga Izilaeli kwa miaka milongo miidi na mitatu, abanikaga niyo amoselwa msanga uko Shamili.

3 Tola, eze abanike ezaga Yaili kulawa Gileadi. Yaili andaga mlamuzi ywa Izilaeli kwa miaka milongo miidi na miidi. 4 Yaili andaga na wana milongo mitatu wandaga wakenulwa ni mp'hunda milongo mitatu. Naho awo wandaga na mizi milongo mitatu mwe isi ya Gileadi. Mizi iyo yagendeela kwitangwa kaya za Hawoti Yaili. 5 Yaili abanikaga niyo amoselwa msanga uko Kamoni.

6 Waizilaeli wadamanyaga uihi naho ha Zumbe kwa kuvika milungu ya Baali na Mashitalaloti na milungu ya Asilia na milungu ya Sidoni na milungu ya Moabu na milungu ya Amoni na ya Wafilisiti. Wasagukaga kwa Mnungu niyo waleka kumvika. 7 Ivo Zumbe awafiilaga maya want'hu wa Izilaeli niyo awatenda wekailwe ni Wafilisiti na Waamoni, 8 awo wawasulumizaga na kuwakunt'hiza Waizilaeli wandaga wakekala mwe isi ya Waamoli, ulailo wa zuwa wo mto Yolodani uko Gileadi kwa miyaka mlongo na mnane. 9 Naho Wamoni wombokaga mto Yolodani kugenda kuyatowa makabila ya Yuda na Benjamini na Ifulaimu Waizilaeli nawo wapatisaga makunt'ho. 10 Waiziaeli wamwiiilaga Zumbe wakagamba, "Kikutendela wavu, kwaviya kikuleka weye niyo chavika milungu ya Baali."

11 Zumbe niyo awahitula, "Togoleni miye hiwakombole kulawa kwa Wamisili na Waamoli na Waamoni na Wafilisiti, 12 Waisidoni na Waamaleki na Wamidiani wawagelagani makunt'ho aho nk'hongo, mwize mniile hyawayokolagani kulawa kwawe? 13 Hamwenga na ayo mnileka miye niyo mwaivika milungu mituhu. Ivo, heniwayokoleni naho. 14 Iteni mkaiile milungu iyo mwiisagule vileke akawayokoleni mkanda mwa makunt'ho."

15 Mna Waizilaeli wagendeelaga kumwiiila Zumbe wakamgamba, "Kitenda wavu. Weye noukitende ivo ukuunga, mna chakulombeza kiyokole diyelo." 16 Niyo waiusa milungu ye zisi zint'huhu na kumvika Zumbe Mnungu, Zumbe Mnungu naye hadaile kugendeela kufinyiliza aho eze aone makunt'ho ya Waizilaeli.

17 Waamoni wakeikaga lumwe wakatowane nk'hondo na Waizilaeli ivo waikaga nk'hambi aho Gileadi. Waizilaeli nawo wakeduganyaga hamwenga niyo waika nk'hambi uko Mizipa ya Gileadi. 18 Vilongozi wa want'hu wa Gileadi wakeuzaga kugamba, "Niani naakakonge kutowana na Waamoni? Yeyose naatende ivo niye naande kilongozi mwe Gileadi."