1 Zumbe Mnungu awalekaga want'hu wa si izi, vileke wawageze Waizilaeli awo wandaga hawanati watowane nk'hondo mwe isi ya Kanaani. 2 Atendaga ivo vileke awenk'he ' want'hu we vyeleko ivo umanyi wa kutoana nk'hondo, kwaviya wandaga hawanati waone nk'hondo. 3 Awo wasigale mwe isi wandaga ni Wafilisiti, na Wakanaani wose na Wasidoni na Waivi wekalaga mwo milima ya Lebanoni kulawa mwo mnima Baali Helimoni mpaka mwa magundi ya Hamati. 4 Wasigazwagwa vileke wawageze Waizilaeli, akaule uneva nawazumile zisigilizi zakwe awasigiilaga wakale wawe kwa kombokela Musa. 5 Ivo, Waizilaeli nawekala hamwenga na Wakanaani na Wahiti na Waamoli na Wapelezi na Waivi na Wayebusi. 6 Niyo walombelana na want'hu awo na kuivika milungu yawe.

7 Waizilaeli nawadamanya wiihi ha Zumbe Mnungu, niyo wamjala Zumbe Mnungu, Mnungu ywawe, niyo wavika Mabaali na Mashela. 8 Maya ya Mnungu yemukwagwa kwaajili ya Waizilaeli niyo amtenda seuta Kushani Lishataimu ywa Mesopotamia awahume Waizilaeli. Wamdamanyilaga kwa miaka mnane. 9 Mna weze wamwiile Zumbe, yehe awenk'haga mkombozi, Osinieli mwana Kenazi, mvunawe dya Kalebu uyo awakombolaga. 10 Ivo, Muye ywa Mnungu amwiziilaga Otinieli niyo anda kilongozi ywa Izilaeli. Otinieli niyo aita kwe nk'hondo Zumbe Mnungu naye niyo amwiika Kushi Lishataimu seuta ywa Mesopotamia mwo udahi wa Otinieli. 11 Ivo isi yandaga na utondowazi kwa lupisi lwa miaka milongo mine. Otinieli mwana Kenazi niyo abanika.

12 Waizilaeli watendaga wiihi ha Zumbe Mnungu. Zumbe Mnungu niyo amwink'ha udahi seuta Eguloni ywa Moabu awahume Waizilaeli, kwaviya nawamtendela Zumbe Mnungu uwihi. 13 Seuta Eguloni awaduganyaga Waamoni na Waamaleki niyo agenda kutowana na Waizilaeli, wawahumaga Waizilaeli na kuutaha mzi we Mitende uwo ukwitangwa Yeliko. 14 Waizilaeli niyo wamdamanyila seuta ywa Moabu kwa lupisi lwa miaka mlongo na mnane. 15 Mna Waizilaeli wamwiilaga Zumbe Mnungu naho. Zumbe naye niyo awenk'ha mnt'hu ywa kuwakombola, uyo Ehudi mwana Gela, mta moso, we dikabila dya Benjamini. Waizilaeli wamtumaga egale mageleko yawe kwa Eguloni seuta ywa Moabu. 16 Ehudi niyo asana sime, yandaga na utali wa sentimita milongo mishano. Niyo akekaka kulume kundani kwe suke yakwe. 17 Niyo amwigaila mageleko Eguloni seuta ywa Moabu. Eguloni andaga zint'hu nene. 18 Ehudi eze ajike kulava mageleko ayo, awagambaga wadya want'hu wenulaga mageleko ayo wakeitile. 19 Mna yehe eze abule kwa mahili ya maiwe yasongolwe hagihi na Giligali, amwuuiyaga Eguloni na kumgamba, "Nna ulosi wa kinyele kwako weye seuta."

Seuta niyo awagamba wandima wakwe "Hake kisogeleni." Wandima wakwe niyo wafosa kuse.

20 Ivo Ehudi niyo amsogeela hagihi na hadya ekale mwe chumba chakwe kihoile he balaza, "Nna ulosi wako kulawa kwa Mnungu." Seuta niyo enuka mwe difumbi dyakwe na kukimala. 21 Ehudi niyo asomola sime yakwe no mkono wa kumoso kulawa kulume kwakwe, na kumjunga Egiloni mwe zinda zakwe. 22 Isime yose hamwenga no mhini wakwe vadidimilaga mndani mwe zinda. Mavuta yajabalazaga idya isime, Ehudi hailavaga isime idya mwe zinda za seuta Eguloni. 23 Eze ajike Ehudi afosaga kuse na kuvugala zinyivi ze chumba icho. 24 Ehudi eze ahalawe, wandima wa seuta niyo wauya. Weze wakaule zinyivi zose zandaga zivugalwa, nawafanyanya kugamba andaga kazunguluka mndani mwe nyumba. 25 Wagojela niyo wahwa mna hawakomolaga zinyivi ze chumba, waguhaga nk'homoelo niyo wakomola. Weze wakomole wamuonaga seuta ywawe kagwa hasi naho kabanika.

26 Umwo wandaga wakagoja, Ehudi anyilikaga kombokela mwa mahili ya maiwe, na kuita Seila. 27 Eze abule uko mwe isi ye vigulu va Efulaimu atoaga gunda, Waizilaeli nawo waseelaga hamwenga nae kulawa kwe vigulu, yehe niyo awalongoela, 28 akawagamba, "Nitimileni, kwaviya Zumbe Mnungu kawenk'hani uhumi mwa wak'hondo wenyu Wamoabu." Ivo wamtimilaga Ehudi na kuihataha midando yo mto Yolodani, hamlekele mnt'hu yeyose adendeluke. 29 Zuwa idyo wawakomaga Wamoabu milongo alufu, want'hu wose wandaga na ludole na wata udahi wa nk'hondo, hakwandaga na mnt'hu hata yumwenga ahonaga. 30 Zuwa idyo Waizilaeli wawahumaga Wamoabu. Isi niyo yanda na utondowazi kwa miaka milongo mnane.

31 Ehudi eze ahalawe, ezaga Shamgali mwana Anati. Shamgali awakomaga Wafilisiti Magana mtandatu kwa ngoda ya kudimila. Yehe naye awakombolaga Waizilaeli.