1 Kwandaga na mnt'hu yumwenga etangagwa Mika andaga akekala mwe vigulu va Ifulaimu. 2 Zuwa dimwenga amgambaga nine, "Aho mbavi akubawilaga viya vibesu alufu na gana va masawa weye wamligitaga, Miye nakwivaga mwenye. Miye nnanavo vibesu ivo, ni miye naviguhaga."

Nine niyo amgamba, "Mwanangu Zumbe Mnungu akuvikile kwa kuzumila kwako."

3 Niyo amvuzila nine viya vibesu va masawa alufu imwenga na gana, nine niyo amgamba, "Vileke ligito idyo dise kukupata mwanagu miye naika masawa ayo kunda yakuka kwa Zumbe vileke nidamanye mahili ya kusongala na kuyakiziga kwa madini ya masawa. Elo haluse nakuvuzila weye."

4 Mna niyo amvuzila nine. Nine aviguhaga viya vibesu va masawa magana maidi niyo amwink'ha yudya msani naye adamanyaga mahili ya kusongola na kuyakiziga kwa madini masawa, niyo ayaika mahili ayo mndani mwe nyumba ya Mika.

5 Ivo Mika andaga na hant'hu hakwe ha kuvikila. Adamanyaga kizibau na vihili va milungu midodo niyo asagula yumwenga mwa wanawe kunda mlavant'hambiko ywakwe. 6 Mwa mazuwa ayo Izilaeli kwandaga hahana seuta, kila mnt'hu adamanyaga kiya aonaga chedi kwakwe.

7 Naho handaga na mbwanga yumwenga mwe mzi wa Betelehemu ye isi ya Yuda. Yehe andaga Mlawi ekalaga mwe dikabila dya Yuda. 8 Mbwanga uyo ahalawaga mwo mzi uwo wa Betelehemu ye isi ya Yuda na kuzungula hant'hu hatuhu ho kwikala. Umwo akanda mwo utafi abwiilaga mwe vigulu va Ifulaimu mwe nyumba ya Mika. 9 Mika niyo amuuza, "Weye kulawahi?"

Niyo amhitula, "Miye ni Mlawi kulawa Betelehemu ye isi ya Yuda, nazungula hant'hu ha kwikala."

10 Mika niyo amgamba, "Kikalanye unde tate naho mlavant'hambiko ywangu. Nohwink'he vibesu mlongo va masawa mpaka mlongo kila mwaka na suke na nk'hande." 11 Uyo Mlawi niyo azumila niyokwikala hamwenga naye enga yumwenga mwa wanawe. 12 Ivo Mika amtendaga mbwanga uyo Mlawi kunda Mlavant'hambiko wakwe na kwikala naye mwe nyumba yakwe. 13 Niyo Mika agamba, "Haluse namanya kugamba Zumbe naanidamanyile uwedi, kwaviya Mlawi uyu kanda Mlavant'hambiko ywangu."