1 Aho Yoshua eze abanike, Waizilaeli wamuuzaga Zumbe Mnungu wakagamba, "Kabila dihi dikuunga dinde dya nk'hongo kwo kutowana na Wakanaani?"

2 Zumbe Mnungu niyo awahitula, "Kabila dya Yuda nidyo nedinde dya nk'hongo kutowana nawo kwaviya hiwenk'ha udahi wa kuitaha isi iyo."

3 Want'hu we dikabila dya Yuda wawagambaga wandugu zawe we dikabila dya Simioni, "Kikwelanyeni mwe isi kink'higwe vileke kikatowane na Wakanaani. Suwe naswe nekindanye na nyuwe kikaitoanile isi mwink'higwe." Ivo dikabila dya Simioni niyo dyaita nawo.

4 Ivo want'hu we dikabila dya Yuda wagendaga kutowana na Wakanaani na Wapelezi na kuwahuma, wawakomaga want'hu alufu mlongo uko kwo mzi wa Bezeki. 5 Mwo mzi uwo wambwilaga seuta Adoni Bezeki niyo watoana naye na kuwatowa Wakanaani na Wapelezi. 6 Mna Adoni Bezeki anyilikaga niyo woho wamgulusaga na kumgwiila, no kumkant'ha madole makulu yakwe mwe mikono na mwe viga.

7 Adoni Bezeki niyo agamba, "Maseuta milongo mfungate nawakant'haga madole makulu ya mwe mikono na mwe viga walogotaga masavu ya nk'hande yadondomoke hasi ye meza yangu. Haluse Mnungu kaniliha enga ivo nitendile." Wamwigalaga Yelusalemu niyo abanikila uko.

8 Want'hu we dikabila dya Yuda wautowaga mzi wa Yelusalemu na kuutaha. Wawakomaga want'hu wa mzi uwo kwa mabamba na kuutimp'ha moto.

9 Akajika want'hu we dikabila dya Yuda waseelaga wakatowane na Wakaanani wandaga wakekala mwe isi ye vigulu, isi ya Negebu na mawandamo ya usweelo wa zuwa. 10 Wawabasaga want'hu wa Wakaanani wekalaga Hebuloni uwo mzi wa Aba niyo waitowa mizi ya Sheshai na Ahimani na Talimai. 11 Weze walawe uko want'hu we dikabila dya Yuda wagendaga kuutowa mzi wa Debili, uwo wetangwagwa Kiliasi Sefeli. 12 Kalebu niyo agamba, "Mnt'hu yeyose akuunga awatowe na kuutaha mzi wa Kiliati Sefeli nenimloze mwanangu Akisa." 13 Ivo Osinieli mwana Kenazi mvunawe dya Kalebu autahaga umzi, Kalebu niyo amloza mwanawe Akisa kwa Osinieli. 14 Akisa eze abule kwa Osinieli amgambaga, "Lombeza nk'honde kwa tate." Akisa andaga mwe mp'hunda eze aseele mwe mp'hunda ise niyo amuuza, "Waungai?" 15 Niyo amhitula, "Naunga vizuto va mazi enga ivo unink'hile isi ya Negebu." Ivo Kalebu niyo amwink'ha isi ye vizuto va kukenya na mwondwaisi.

16 Awo wana Mkeni uyo mkwewe dya Musa, wakwelaga kulawa kwo mzi we mitende, uwo ukwitangwa Yeliko, wakekale hamwenga na want'hu wa kwe dijangwa dya Yuda uko Negebu hagihi na Alaba. 17 Ivo want'hu we dikabila dya Yuda waitaga na wandugu zawe Wasimioni niyo wawatoa Wakanaani wekalaga Sefasi niyo waubananga pele mzi uwo. Zina dya mzi uwo wetangwagwa Holima. 18 Ivo Want'hu we dikabila dya Yuda waitahaga mizi ya Gaza ne zikaya zakwe na Ashikeloni ne zikaya zakwe na Ekiloni ne zikaya zakwe.

19 Zumbe Mnungu andaga hamwenga na want'hu we dikabila dya Yuda. Waitahaga isi ye vigulu mna hawadaile kuwahuma wakaya we isi iyo kwaviya wandaga na magali ya kilama. 20 Kalebu enk'wagwa mzi wa Hebuloni enga ivo Musa alongaga, Kalebu niyo azigulusa zink'holo izo zint'hatu za Anaki. 21 Mna want'hu we dikabila dya Benjamini hawawaguluse Wayebusi awo wandaga wakekala mwo mzi wa Yelusalemu. Nivo vikuleka Wayebusi wekala hamwenga na want'hu we dikabila dya Benjamini mwo mzi wa Yelusalemu mpaka ivi haluse.

22 Want'hu we dikabila dya Yosefu wautoaga mzi wa Beseli, Zumbe Mnungu awambizaga. 23 Wawatumaga wakaupelembe mzi wa Beseli. Aho nk'hongo mzi uwo wetangwagwa Luzu. 24 Wapelembi awo wamuonaga mnt'hu yumwenga akalawa mwo mzi, niyo wamgamba, "Kilagise ivo nekingile mwo mzi naswe hekikukome." 25 Ivo niyo wengila mwo mzi, nawo niyo wakoma kila kint'hu kwa sime. Mna wamlekaga yudya mnt'hu akanda mgima ne mp'huga yakwe. 26 Mnt'hu uyo aitaga mwe isi ya Wahiti niyo azenga mzi wakwe niyo awitanga Luzu. Nidyo dizina dyakwe hata ivi dielo.

27 Mna want'hu we dikabila dya Manase hawawaguluse want'hu wekalaga Besi Sheani hegu want'hu wekalaga Taanaki hegu want'hu wekalaga Doli hegu want'hu wekalaga Ibeleamu hegu want'hu wekalga Megido ne zikaya zakwe zi mgihi. Wakanaani walemelaga kufosa mwe isi idya. 28 Waizilaeli weze wapate ludole wawatigizaga Wakanaani mwe zindima zawe mna hawawaguluse wafose mwe isi. 29 Want'hu we dikabila dya Ifulaimu hawawaguluse Wakanaani wakwikala Gezeli mna Wakanaani wagendeelaga kwikala ukwo hamwenga nawo. 30 Want'hu we dikabila dya Zabuloni hawawaguluse Wakanaani wakwikala kwo mzi wa Kitiloni hegu wakwikala kwo mzi wa Nahalali, wagendeelaga kwikala hamwenga nawo wakawatigiza kudamanya ndima. 31 Hata want'hu wa Asheli hawawaguluse wadya wakwikala Ako na Sidoni na Alabu na Akizibu na Heliba na Afeka na Lehobu. 32 Ivo want'hu we dikabila dya Asheli niyo wekala hamwenga na Wakanaani wakaya we isi iyo kwaviya hawawagulusaga. 33 Want'hu we dikabila dya Nafutali hawawaguluse wadya wakwikala mwo mizi ya Beti Shemeshi hegu wadya wakwikala Beti Anasi. Mna want'hu wa Nafutali wekalaga na Wakanaani na kuwatigiza kuwadamanyila ndima. 34 Waamoli wawagulusaga want'hu we dikabila dya Dani kwe isi ye vigulu. Hawaungile weze wekale mwe isi ya nt'hindiga. 35 Waamoli wagendeelaga kwikala mwe mizi iyo yandaga mwo mnima wa Helesi na Aiyaloni na Shaalibimu. Mna want'hu we dikabila dya Manase na Efulaimu wawekailaga Waamoli na kuwatigiza wawadamanyile ndima. 36 Mhaka wa Waamoli wandaga mkoma mahanya ye Sela kombokelamneka wa Akalibimu na kugendeela.