1 Ivo, Yoshua ayaduganyaga makabila yose ya Izilaeli uko Shekemu. Awetangaga wadala na vilongozi na wakulu wa Izilaeli, woho nawo wezaga hameso ha Mnungu. 2 Yoshua awagambaga want'hu wose, Zumbe Mnungu, Mnungu ywa Izilaeli agamba, aho kale wadala wenyu nawekala mwe isi ya Efulati, na kuidamanyila ndima milungu mituhu. Mdala yumwenga andaga Tela, ise dya Ibulahimu na Naholi. 3 Miye Mnungu namsamizaga tati yenyu Ibulahimu kulawa mwe digundi dya mto Efulati na kumwigala aha Kanaani, uko nehimwink'ha cheleko kitendese. Nehimwink'ha Isaka, 4 Isaka naye nehimwink'ha Yakobo na Esau. Nehimwink'ha Esau milima ya Seili aikaile. Mna Yakobo na wanawe waitaga Misili. 5 Akajika nehiwatuma Musa na Haluni na kuigaila makun'tho isi ya Misili, akaheza aho nehiwasamizani mwe isi iyo. 6 Nehiwasamiza wadala wenyu kulawa Misili na kuwegala kubula kwe bahali ya Shamu. Wamisili wawatimilaga wakanda na magali ya kuvutwa ni Zifalasi na watowani wakwelaga mwe zifalasi. 7 Naho Waizilaeli weze wamwiile Zumbe Mnungu. Zumbe aikaga ziza mgati mwao na Wamisili na kuitenda ibahali iwagubike Wamisili. Nyuwe wenye nomuona yadya Zumbe Mnungu awatendele Wamisili.

Mwekalaga mwe dijangwa kwa lupisi lutali. 8 Naho nehiwaleta kubula mwe isi ya Waamoli awo wekalaga ng'ambu yo mto Yolodani. Nawatoana na nyuwe mna miye nehiwenk'hani uhumi mwa woho na kuwabananga pele na kuitaha isi yawe. 9 Balaki mwana Sipoli, uyo andaga seuta ywa Moabu, ezaga kuwatowa Waizilaeli na kumlalika Balaam mwana Beoli eze awaligiteni nyuwe. 10 Mna miye himtegeleze Balamu, yehe naye niyo awavikilani, miye name niyo nawayokola mwe mikono ya Balaki. 11 Naho niyo mwomboka mto Yolodani, na kubula Yeliko. Wakaya wa Yeliko nawatoana na nyuwe, na Waamoli, na Wapelezi na Wakanaani na Wahiti na Wagiligashi na Wahivi na Wayebusi. Awo niyo nawagela mwe mikono yenyu. 12 Negalaga malondoza iivi mkasinya niyo nawagulusa maseuta waidi wa Waamoli. Hamwadamanyaga aya kwa vitoanilo venyu. 13 Nawenk'hagani migunda iyo hamwailimile nyuwe, na mizi hamwaizengaga nyuwe iyo mkwikala ivi hause na kudya matunda ya mizabibu na mizeituni hamwihandile.

14 "Haluse elo mwogoheni Zumbe Mnungu na kumdamanyila ndima kwa moyo wedi na uhuwilwa. Lekeni milungu idya wadala wenyu nawakaivika uko Mesopotamia na kwe isi ya Misili. Mumdamanyile ndima Zumbe Mnungu ekedu. 15 Uneva hamkuunga kumdamanyila ndima Zumbe Mnungu, saguleni elo ivi dyelo uyo mkuunga mumdamanyile ndima. Kugamba ni idya milungu wadala wenyu nawakaivika mwe digundi dya mto Efulati, hegu milungu ya Waamoli iyo haluse mkwikala mwe isi yawe. Mna miye ne nyumba yangu nenimdamanyile ndima Zumbe Mnungu."

16 Aaho want'hu niyo wamhitula, "Hekidahe naho kumleka Zumbe Mnungu na kuidamanyila ndima milungu mituhu. 17 Kwaviya Zumbe Mnungu ywetu niye akilavile suwa hamwenga na wadala wetu mwe isi ya Misili uko chandile watumwa, kikaviona na meso yetu vihungi vidamanywe. Nakachamila mwe nt'hambo zetu zose na mwa want'hu wose umwo chombokaga. 18 Zumbe Mnungu nakakigulusila Waamoli wekalaga mwe isi. Kwaivo, suwe naswe nekimdamanyile ndima Zumbe Mnungu kwaviya yehe niye Zumbe Mnungu ywetu."

19 Mna Yoshua nakawagamba, "Nyuwe homdahe kumdamanyila ndima Zumbe Mnungu, kwaviya yehe ni Mnungu akukile. Yehe ni Mnungu mta finju, yehe naye hawalekeleni wavu wenyu hegu masa yenyu, 20 mnamleka Zumbe Mnungu na kuidamanyila ndima milungu ya wata kwiza, naawasulumizeni na kuwakoma pele, hata uneva andaga ywedi kwenyu aho nk'hongo."

21 Want'hu nawo niyo wamgamba Yoshua, "Bule suwe nekimdamanyile ndima Zumbe Mnungu ywetu."

22 Aho Yoshua niyo awagamba, "Nyuwe wenye ni waona we mioyo yenyu kugamba msagula kumdamanyila ndima Zumbe Mnungu."

Niyo wagamba, "Heiye," "kiwaona."

23 Yehe naye niyo amgamba, "Ivo, iuseni milungu ya wata kwiza iyo mnanayo mumtimile Zumbe Mnungu ywa Izilaeli, kwa moyo wenyu wose."

24 Woho nawo niyo wamgamba Yoshua, "Nekimdamanyile ndima na kutimila ayo naalonge Zumbe Mnungu ywetu."

25 Ivo Yoshua niyo aika Ndagano na Waizilaeli uko Shekemu, awenk'haga miko na malagizo yo kutimila. 26 Yoshua niyo awandika ayo yose mwe kitabu che miko ya Mnungu, niyo aguha iwe kulu na kudikima hasi yo mti wa mwaloni hagihi ne dihema dya Zumbe Mnungu. 27 Niyo awagamba want'hu wose, "Iwe idi nedinde ni uwona mwetu, kwaviya diiva mbuli zose izo Mnungu akigambile. Kwaivo, nedinde uwona wetu, vileke sema mnamkane Mnungu ywenyu." 28 Niyo Yoshua awagamba want'hu wose wahalawe, woho nawo niyo wahalawa kila yumwenga kwe kaya yakwe.

29 Yakajika ayo, Yoshua mwana ywa Nuni mndima ywa Mnungu, abanikaga akanda na miaka gana na mlongo. 30 Woho nawo niyo wammosela msanga uko apangilwe kunda hant'hu hakwe, uko Timali Sela, mwe milima ya Efulaimu mkoma mahanya yo mnima wa Gaashi.

31 Waizilaeli nawamdamanyila ndima Zumbe Mnungu mwo lupisi lwose mwo ugima wa Yoshua, na mazuwa yose wekale awo wadala wekale aho Yoshua eze abanike awo wamanya indima yose ya Zumbe awadamanyile Izilaeli.

32 Mavuha ya Yusufu ayo Waizilaeli wegale kulawa Misili nawayamosela msanga uko Shekemu, hant'hu aho Yakobo agulaga kulawa mwa wana wa Hamoli, ise dya Shekemu, kwa matundu gana. Isi iyo niyo yanda ukipe wawe welekwa wa Yusufu.

33 Eliyazali naye, mwana Haluni, abanikaga na kumoswa msanga uko Gibea, mzi wandile kenk'higwa mwanawe Fenehasi mwe isi ya milima ya Efulaimu.