1 Mna Waizilaeli hawandile wahuwilwa mwa vint'hu viya alavilwe Zumbe, kwaviya Akani mwana ywa Kalami mwezukulu ywa Zabidi elekwe ni Zela we dikabila dya Yuda aguhaga vint'hu vimwenga mwe viya vilemezwe. Kwaivo maya ya Zumbe yawemukila Waizilaeli.

2 Yoshua awatumaga want'hu kulawa Yeliko waie kwo mzi wa Ai, uhagihi na Beti-aveni, mwe nt'hendelo yo ulailo wa zuwa wa Bateli, niyo awagamba, "Kweleni mkaipelembe isi." Nawo wakwelaga na kugenda kuupelemba mzi wa Ai. 3 Weze wauye wamgambaga Yoshua, "Wasekukwela want'hu wose kwo kuutaha mzi wa Ai, Use kwangadisa want'hu wose, wakwele want'hu alufu mbili hegu nt'hatu du wakautahe mzi kwaviya want'hu wa Ai wageke du." 4 Ivo elo, want'hu enga alufu nt'hatu wakwelaga kwo kuutaha mzi wa Ai, mna want'hu wa mzi wa Ai wawagulusaga Waizilaeli. 5 Want'hu wa Ai wawakomaga Waizilaeli wakubula milongo mitatu na mtandatu naho wawagulusaga watuhu kulawa mwe nk'hili yo mzi kubula Shebalimu na kuwakoma kwe seleza. Waizilaeli wogohesaga niyo watigint'hika.

6 Yoshua azitatulaga zisuke zakwe niyo agwa kifulifuli hasi he Disanduku dya Zumbe, ekalaga aho kubula kisingi, yehe na wadala wa izilaeli niyo waketiila nt'hifu ya msanga mwe mitwi yawe. 7 Yoshua niyo agamba, "Ha!, Zumbe Mnungu! Weye wawombosa want'hu awa mwo mto Yolodani vileke ukiike mwo udahi wa Waamoli wakikome? Nevinda vedi chasigale kudya kwe nt'hendelo ya kaidi yo mto Yolodani. 8 Zumbe, Nigeeze uneva Waizilaeli wawanyilika wank'hondo wawe? 9 Ivo, Wakanaani hamwenga na wakaya wose wa mwe isi ino umwo waneva mbuli iyo nawakizunguluke na kukikoma pele. Haluse noutende vivihi kulagisa ukulu we dizina dyako?"

10 Zumbe Mnungu niyo amgamba Yoshua, "Kimala! Nii wakelambalika hasi ivo? 11 Waizilaeli wadamanya wavu, kwaviya wabananga Ndagano yangu iyo niwenk'ile vileke wasekuijala. Waguha vint'hu vimwenga mwe viya vilemezwe, wavibawa na kulonga lulimi niyo wavihanganya ne vit'hu vawe. 12 Nivo vikuleka Waizilaeli hawakudaha kuwahuma wank'hondo wawe, wawanyilika wank'hondo wawe kwaviya waketenda woho wenye kunda kint'hu cho kubanangwa. Henigendeele kunda hamwenga na nyuwe naho kubula aho nombanange vint'hu nigambile msekuviguha. 13 Ivo elo, kimala uwakukize want'hu uwagambe wakekukize no kukeika lumwe mwe dizuwa dya luvi, kwaviya miye Zumbe Mnungu, Mnungu ywa Izilaeli nagamba ivi, ‘Mgati mwenyu viyuko vint'hu vilemezwe. Hamkudaha kuwahuma wank'hondo wenyu kubula vint'hu ivo viusigwe kwenyu!’ 14 Kwaivo wagambile kugamba luvi mtondo wose nawaletwe hameso hangu, kabila kwa kabila. Dikabila nenidisagule nediite kulongole kwangu, lukolo kwa lukolo. Lukolo nenilusagule nolwize kulongole kwangu, mp'huga kwa mp'huga. Mp'huga neniisagule neiite kulongole kwangu, mnt'hu yumwe yumwe. 15 Mnt'hu yeyose anapatikana akanda na vint'hu vilemezwe, yehe hamwenga na kila kint'hu chakwe kwaviya kabananga Ndagano yangu miye Zumbe Mnungu, naho kadamanya mbuli ya soni mwe Izilaeli."

16 Ivo elo, Yoshua niyo enuka mtoo tondo, niyo awaleta Waizilaeli wose hagihi, dikabila kwa dikabila. Dikabila dya Yuda niyo dyasagulwa. 17 Naho niyo aleta hagihi lukolo lwa Yuda, lukolo kwa lukolo na lukolo lwa Zelahi niyo wasagulwa. Aletaga hagihi mp'huga ya lukolo lwa Zelahi, mp'huga kwa mp'huga naho mp'huga ya Zabdi niyo yasagulwa. 18 Yoshua ailetaga mp'huga ya Zabadi hagihi, mnt'hu kwa mnt'hu, Akani mwana ywa Kalimi mwezukulu ywa Zabidi mwana ywa Zela ywe dikabila dya Yuda niyo asagulwa. 19 Yoshua amgambaga Akani, "Mwanangu mtogole Zumbe Mnungu, Mnungu ywa Izilaeli, naho unigambile yadya utendile naho usekugeza kunifisa." 20 Akani niyo amhitula yoshua, "Kindedi hidamanya wavu hameso ha Zumbe Mnungu, Mnungu ywa Izilaeli. Ivi nivo: 21 Mwe vint'hu vitahigwe, nize nione koti dyedi kulawa Babeli, na vibesu va madini ya masawa ya uzami ujink'hile kilo mbili, na nusu kilo ye zahabu, navimunk'hilwagwa navo niyo naviguha, kaula navifisaga hasi kwe dihema dyangu na masawa yadya ye hasi ye vint'hu ivo."

22 Ivo elo, Yoshua awatumaga want'hu niyo waguluka kwe dihema dya Akani, wavibwiilaga vint'hu viya vafisagwa mwe dihema ne vibesu viya va madini ya masawa yandaga hasi ye vint'hu ivo. 23 Wavilavaga kuse ye dihema vint'hu ivo niyo wavigala kwa Yoshua, na want'hu wose wa Izilaeli naho waviikaga hasi hameso ha Zumbe Mnungu. 24 Yoshua amguhaga Akani mwana Zela hamwenga na madini ya masawa ne valo diya ne zahabu na wanawe we kilume na wa kike ne zing'ombe ne zimp'hunda ne zingoto zakwe ne dihema dyakwe na kila kint'hu andile nacho. Yoshua hamwenga na Waizilaeli wose wamwigalaga kwe dikolongo dya Akoli. 25 Yoshua niyo amuuza Akani, "Nii kukigela makunt'ho? Zumbe Mnungu naakuletele makunt'ho weye mwenye iivi dielo." Waizilaeli wose wamtoaga maiwe Akani niyo abanika. Naho wawatoaga maiwe imp'huga yakwe yose nawo niyo wabanika, wokaga ivimba vawe vose. 26 Ivo waduganyaga kisungu cha maiwe mnanga mwa maivu ye vimba vawe. Naho maiwe ayo yeaho hata ivi dielo. Akajika maya ya Zumbe niyo ahalawa. Nivo vikuleka hant'hu aho hetangwagwa Kolongo dya Akoli hata ivi dielo.