1 Uno nuwo upasi we isi Waizilaeli wahokele kunda yawe uko Kanaani wapangilwagwa ni Eliyazali mlava nt'hambiko akanda na Yoshua mwana Nuni na wakulu wa makabila ya Izilaeli. 2 Wapangilwagwa kwa kutowa kula viligane na ivo Zumbe amsigiilaga Musa kwa ayo makabila kenda ne inusu idya ye dikabila dimwenga. 3 Kwaviya Musa apangaga isi kwa makabila yadya maidi ne nusu ye dikabila kudya kwe nt'hendelo ya kaidi yo mto Yolodani, mna hawapangile Walawi hohose kunda hawe. 4 Kwaviya welekwa wa Yusufu wandaga na makabila maidi du, kabila dya Manase ne dikabila dya Efulaimu.Hakwandaga na hohose wapangilwagwa Walawi mwe isi iyo. Woho wenk'wagwa du hant'hu ha kwikala na hant'hu kwajili ye mafyo yawe ye mifugwa. 5 Ivo Waizilaeli waipangaga isi viligane na ivo Zumbe Mnungu amsigiilaga Musa.

6 Noho welekwa wa Yuda wamwiziilaga Yoshua uko Giligali, Kalebi mwana Yefune uyo Mkenizi yumwenga ywawe, niyo amgamba, "Kuyamanya ayo Zumbe alongaga na Musa mnt'hu ywa Mnungu kudya Kadeshi Banea mwa miye na weye. 7 Nandaga ni mnt'hu ywa miaka milongo mine umwo Musa mndima ywa Zumbe anigambaga niite kulawa Kadeshi Banea vileke haipelembe isi, name namwigailaga ulosi ukint'hile kulawa mwo moyo wangu. 8 Mna, wadya weyangu naitaga nawo, waitendaga mioyo ya want'hu ingile kinyulu. Mna miye namtimilaga Zumbe Mnungu ywangu kwa uhuilwa. 9 Ivo Musa aniikilaga kilapi mwe dizuwa diya akagamba, ‘isi idya wayombokelaga neinde yako na welekwa wako kwaviya wamtimilaga Zumbe Mnungu kwa uhuilwa.’ 10 Naho hake kaula, Zumbe Mnungu kaniika mgima hata ivi dielo viligane na viya alongaga. Ni miaka milongo mine na mishano kukongela hadya Zumbe alongaga na Musa ulosi uno, hadya Waizilaeli wandaga mwo utafi mwe dijangwa, naho haluse nna miaka milongo mnane na mishano. 11 Mna nikei nna ludole hata dielo enga ivo nandaga umwo Musa anigambaga haipelembe isi. Hata ivi haluse nikei na ludole lwa kutowana nk'hondo hegu kudamanya ndima yoyose. 12 Haluse elo, nink'he isi ino ye vigulu, ino Zumbe alongaga mwe dizuwa diya. Chakugambilaga kugamba Mazint'hu yakwitangwa Maanaki yandaga yekala mwe mizi mikulu yazengelwagwa magomela. Vadahika Zumbe naande hamwenga na miye, name neni yaguluse viligane na ivo Zumbe alongaga."

13 Yoshua amvikilaga Kalebi mwana Yefune niyo amwink'ha mzi wa Hebuloni kunda wakwe. 14 Mzi wa Hebuloni niyo wanda wa welekwa wa Kalebi mwana Yefune Mkenizi kwaviya amtegelezaga Zumbe Mnungu, Mnungu ywa Izilaeli kwa uhuilwa wakwe wose. 15 Aho kale mzi uno wa Hebuloni wandaga uketangwa Kiliati aba. Uyo Aliba andaga ni zint'hu dikulise mwa Waanaki weyawe wose.

Isi yahumulaga kulawa mwe nk'hondo.