1 Zumbe Mnungu amgambaga Yoshua, Usekogoha hegu kufachevu, waguhe watoani wako wose ukwele nawo kwo mzi wa Ai kwaviya nohwink'he udahi wa kumhuma seuta ywa Ai, hamwenga na want'hu wakwe, mzi wakwe ne isi yakwe. 2 Nomuutendele mzi wa Ai hamwenga na seuta ywakwe enga viya muutendele mzi wa Yeliko hamwenga na seuta ywakwe. Mna mwadaha kuguha vitahigwa vakwe ne mifugwa yakwe kwajili yenyu. Ikeni want'hu wakunyata kwe nt'hendelo ya kunyuma yo mzi. 3 Ivo, Yoshua enukaga na watoani wakwe wose niyo wakwela kwo mzi wa Ai. Awasagulaga want'hu alufu thelathini na kuwegala nekilo. 4 Awalagizaga kugamba, "Nyuwe muunyatile mzi kulawa kunyuma. Msekuita hale na mzi mna mkeike lumwe mwo lupisi lwose. 5 Miye hamwenga na want'hu wose we hamwenga na miye nekiusogeele mzi. Umwo wakeza kufosa kuse kwiza kukitowa, suwe nekiwanyilike enga ivo chatendile nk'hongo. 6 Nawagendeele kukigulusa kubula aho nekiwegala hale na mzi wawe, kwaviya nawagambe, ‘Wakinyilika enga ivo watendile nk'hongo.’ Suwe nekiwaleke wakiguluse. 7 Aho, nyuwe nomwize kulawa uko mkunyatila na kuutaha mzi, kwaviya Zumbe Mnungu, Mnungu ywenyu kawenk'hani uhumi mwo mzi uwo. 8 Mkeza kunda muutaha mzi uwo nomuoke enga ivo Zumbe Mnungu alagize. Aya nayo malagizo mkuunga myatimile." 9 Ivo Yoshua niyo awatuma, woho nawo waitaga kubula aho ho kunyatila niyo wekala hagati ya Beseli na Ai, usweelo wa zuwa wa Ai. Mna Yoshua agonaga mgati mwa want'hu mwe kilo icho.

10 Kwize kuche Yoshua enukaga niyo, awaduganyaga want'hu, yehe na wadala wa Izilaeli wawalongoelaga want'hu kukwela kuita kwo mzi wa Ai. 11 Wadya watoani wose wandaga hamwenga naye wakwelaga na kuusongeela umzi. Naho waikaga nk'hambi mwe nt'hendelo ya mkoma mahanya ya Ai, naho handaga na kolongo hagati ya woho no mzi wa Ai. 12 Aguhaga want'hu watuhu alufu shano vileke wanyatile hagati yo mzi wa Beseli na Ai, nt'hendelo yo usweelo wa zuwa mwo mzi wa Ai. 13 Fyo kulu dya watoani dyaikagwa mwe nt'hendelo ya mkoma mahanya yo mzi na wadya nawakanyatila waikagwa mwe nt'hendelo yo usweelo wa zuwa wo mzi. Mna kilo icho, Yoshua agonaga mgati mwe idyo dikolongo.

14 Aho Seuta ywo mzi wa Ai eze aone imbuli iyo kwize kuche asunguzaga kwinuka. Wagosi wo mzi niyo wafosa wakatowane na Waizilaeli. Yehe na want'hu wakwe wahingaga kwe dikolongo dya Yolodani, hant'hu hamwenga ulailo wa zuwa wo mzi, mna hawamanyaga kugamba nokunda na want'hu wandaga wakamnyatila kwa kunyuma yo mzi. 15 Ivo, Yoshua hamwenga na Waizilaeli wose waketendaga enga wahumigwa niyo wakonga kunyilikila kwedijangwa. 16 Want'hu wose wandile kwo mzi wetangwagwa wawatimile Waizilaeli, aho wandaga wakamgulusa Yoshua, iyo yawatendaga wande hale no mzi wawe. 17 Hakwandaga na mnt'hu yeyose asigale mwo mzi wa Ai hegu Beseli uyo heefosile awabase Wazilaeli waulekaga mzi uwo wikedu niyo wawatimila Waizilaeli.

18 Zumbe Mnungu amgambaga Yoshua, "Onyekeza mjungo wako kwo mzi wa Ai, kwaviya nohwink'hwe uhumi mwo mzi uwo." Yoshua niyo auonyekeza mjungo wakwe mwo mzi wa Ai. 19 Aho Yoshua eze achuluse mjungo wakwe kwo mzi wa Ai, fyo dyandaga dikanyatila mwe nt'hendelo nt'huhu dyafosaga na kwingila mwo mzi. niyo dyautahaga umzi uwo niyo dyasunguza kuwoka pele. 20 Want'hu wa Ai weze wakaule kunyuma, wauonaga mosi kulawa mwo mzi wakwela kubula kwe mbingu. Hawandile na ludole lwa kuguluka nt'hendelo yoyose, kwaviya Waizilaeli wandaga wakanyilikila kwe dijangwa wawahitukilaga wadya wandile wakawagulusa. 21 Yoshua na Waizilaeli wose weze waone fyo dyandile dikanyatila diutaha mzi, naho mosi wakweela kulanga wawahitukilaga na kukonga kuwakoma want'hu wa Ai. 22 Waizilaeli wautahaga mzi wa Ai wafosaga wakawabasa want'hu wa Ai.Wadya Waizilaeli wandaga wakanyilika nawo wawahitukilaga want'hu wa Ai, Ivo want'hu wa Ai wakebwiilaga we hagati ya watowani wa Waizilaeli. Watowani wa Izilaeli wawakomaga want'hu wa Ai wose hakwasigale hata yumwenga. 23 Mna seuta ywa mzi wa Ai wamtahaga akanda mgima na kumwigala kwa Yoshua.

24 Waizilaeli weze wabinde kuwakoma wagosi wose wa Ai kudya kwe zink'honde na kwe dijangwa uko wandile wakawagulusa, na kukomwa kila yumwenga, Waizilaeli wose wauyaga Ai na kuwakoma wose wandaga umwo. 25 Want'hu wose wo mzi Ai wakomigwe mwe dizuwa idyo, wagosi kwa wavele wandaga alufu kumi na mbili. 26 Yoshua haseleze mkono wakwe utozile mjungo wakwe kuhinga Ai kubula aho eze awakome want'hu wose wo mzi uwo. 27 Waizilaeli waguhaga mifugwa no ugoli du enga ivo Zumbe Mnungu amlagize Yoshua. 28 Ivo, Yoshua awokaga pele mzi wa Ai kwa moto na kunda mank'halank'hala kubula ivi haluse. 29 Amholezaga seuta ywa Ai mwe diziti kubula kisingi. Mna dizuwa dize diswe Yoshua alagizaga ikimba chakwe kiselezwe mwe diziti na kuduulwa he nk'hili yo mzi akajika niyo waumbika kisungu cha maiwe mnanga mwe ikimba icho, kisungu icho kiyuko kubula ivi dielo.

30 Ivo, Yoshua amzengelaga Zumbe Mnungu, Mnungu ywa Izilaeli, kilingo cho kutambikila kwo mnima wa Ebali, 31 enga ivo Musa mndima ywa Zumbe Mnungu awasigiilaga Waizilaeli viligane na mawandiko mwe kitabu che miko ya Musa kugamba neinde he kilingo cho kutambikila kizengigwe kwa maiwe heye songolwe kwa kint'hu cha kilama. Umwo mnanga mwe kilingo icho numo wamlavilaga Zumbe malavo ya kokwa pele na malavo ya utondowazi. 32 Yoshua awandikaga naho mwe miko ya Musa mnanga mwa maiwe ha meso ha Waizilaeli. 33 Waizilaeli wose hamwenga na vilongozi wawe, wadala na walamuzi na wakulu na watakwiza wose awo wandaga mwawe, wakimalaga nt'hendelo zose mbili ze Disanduku dye Ndagano halongole ha walavant'hambiko Walawi, awo wandaga wakadinula Disanduku dye Ndagano dya Zumbe Mnungu. Nusu yawo wakimalaga kulongole kwo mnima Gelizimu, nusu ya want'hu wakimalaga halongole ho mnima Ebali enga ivo Musa mndima ywa Zumbe Mnungu alagize aho nk'hongo mwe mbuli yo kuvikilwa kwa Waizilaeli. 34 Akajika aho, Yoshua awasomelaga Miko yose hamwenga na uvikilwa na maligito enga ivo iwandikwe mwe kitabu che miko. 35 Hakwandaga na ulosi ulagizwe ni Musa uwo Yoshua hewesomele Waizilaeli wose wakanda, wavele na wana na watakwiza.