1 Niyo Zumbe Mnungu amgamba Yoshua 2 awagambe Waizilaeli ivi. "Keikileni hank'handa mizi yo unyilikilo iyo niwagambileni kwombokela kwa Musa. 3 Mnt'hu yeyose anakoma haheina kukambila adaha kunyilikila mwo mzi umwenga mwa iyo, naho nivo naakwenege na mnt'hu akuunga alihize masa yo ukomi. 4 Mkomi naanyilikile uko mwo umzi umwenga mwe iyo na kukimala mwe nk'hili na kuwagambila wadala wo mzi uwo masa yakwe. Wadala awo nawamhokele na kumwink'ha hant'hu ha kwikala hamwenga nawo. 5 Yudya akuunga aliheze masa anamgulusa kubula kwo mzi uwo, wadya wadala hawakuungwa kumlava mkomi uyo kwa yudya mta kulihiza masa, kwaviya amkomaga miyawe haheina kukambila, naho hakwandile na nk'humbizi mwa woho. 6 Mkomi uyo naagendeele kwikala uumwo kubula aho neeze asengelwe hameso ya Waizilaeli hegu kubula yudya mlavant'hambiko mkulu andile mwo undima akeza kubanika. Akajika aho yudya mkomi adaha kuuya kwakwe mwo mzi uwo anyilike."

7 Ivo, nawakeikila hank'handa mizi ya Kadeshi mwe Galilaya mwo mnima wa Nafutali, Shekemu mwo mnima Efulaimu na Kiliat Aba. Nuko kugamba Hebuloni mwe isi ye milima ya Yuda. 8 Mwe nt'hendelo ya kaidi yo mto Yolodani, ulailo wa zuwa wa mzi wa Yeliko, wakeikilaga hank'handa mzi wa Bezeli wandaga mwe zinyika za nt'hindiga, mzi wenye wandaga ni wa hant'hu he dikabila dya Lubeni. Na Lomoti uko Gileadi uwo mzi we dikabila dya Gadi na Golani uko Bashani aho hant'hu handaga he dikabila dya Manase. 9 Ino niyo mizi ikigwe kwa ajili ya Waizilaeli wose na watakwiza wakwikala hamwenga na nyuwe, vileke mnt'hu akumkoma miyawe haheina kukambila agulukile uko sema anakomigwe na mta kulihiza masa ya ukomi, kubula aho akeza kusengelwa iivi want'hu wose wakakaula.