1 Umwo wandaga uko Shilo mwe isi ya Kanaani, vilongozi we zink'holo za Walawi, wamwiitilaga mlavant'hambiko Eliyazali na Yoshua mwana Nuni, na vilongozi wa makabila yose ya Waizilaeli, 2 niyo wawagamba, "Zumbe Mnungu nakamlagiza Musa kink'higwe mizi ya kwikala na hant'hu he mifugwa yetu." 3 Ivo, Zumbe Mnungu awasigiilaga Waizilaeli wawenk'he Walawi mizi kulawa mwe isi yawe na hant'hu ha ludimo inde yawe,

4 Kula ya nk'hongo neinda ya want'hu wo lukolo lwa Kohati. Walawi wandile welekwa wa Haluni mlavant'hambiko wenk'wagwa kwa kutoa kula, mizi imwe si ya makabila ya Yuda, Simioni na Benjamini. Uwazilo we mizi wenk'higwe ni mlongo umwenga na mitatu. 5 Welekwa wa nk'holo za Kohati wasigale nawenk'higwa mizi mlongo iyo yandaga mwe isi ya Ifulaimu na Dani ne isi ya usweelo wa zuwa ne nusu ye dikabila dya Manase.

6 Want'hu we zink'holo za Geleshoni nawenk'higwa mizi mlongo na mitatu mwe makabila ya Isakali, Asheli na Nafutali na hant'hu ha nusu ya Manase uko Bashani.

7 Want'hu wa nk'holo za Melali nawenk'higwa mizi mlongo na miidi mwe ziisi za makabila ya Lubeni na Gadi na Zebuloni.

8 Waizilaeli nawawenk'ha Walawi mizi iyo hamwenga na kaya za ludimo, enga ivo Zumbe Mnungu amlagize Musa. 9 Aya nayo mazina ye mizi kulawa mwe makabila ya Yuda na Simeoni iyo wenk'higwe, 10 kwa welekwa wa mlavant'hambiko Haluni, awo want'hu we zink'holo za Kohati uyo andile we dikabila dya Lawi. Hant'hu hawe nawapata nk'hongo kwaviya kula yawe neinda ya nk'hongo. 11 Nawenk'higwa mzi wa Aliba, nuko kugamba Hebuloni, mwe vigulu va Yuda hamwenga na holudimo lwakwe lwazungulukaga kosekose. Aba andaga tati yakwe Anaki. 12 Mna migunda yo mzi uwo hamwenga na kaya zikuzunguluka, enk'hwagwa kale Kalebu mwana ywa Yefune unde wakwe.

13 Hamwenga na kuwenk'ha welekwa wa mlavant'hambiko Haluni mzi wa Hebloni uwo wiikigwe kunda mzi wa kunyilikila, naho wenk'hagwa mzi wa Libina hamwenga ne zinyika za ludimo. 14 Yatili na holudimo lwakwe na Eshitemoa na holudimo lwakwe. 15 Holoni na holudimo lwakwe na Debili na holudimo lwakwe, 16 Aini hamwenga na holudimo lwakwe, Yuta hamwenga na madimilo yakwe, Bete Shemeshi hamwenga na holudimo lwakwe. Kwa hamwenga mizi wenk'higwe walawi kulawa kwa makabila ayo maidi ni kenda. 17 Mwe dikabila dya Benjamini nawenk'higwa mizi mituhu ya Gibeoni na Geba, 18 Anatoti hamwenga na holudimo lwakwe, Alimoni hamwenga na holudimo lwakwe. Imizi iyo yose wenk'higwe ni mine. 19 Mizi yose ya welekwa wa Haluni awo wandile walavant'hambiko, neinda mlongo na mitatu hamwenga na holudimo lwakwe.

20 Want'hu wasigale wa lukolo lwa Kohati, awo iviyaiviya ni Walawi nawenk'higwa mizi kulawa mwe dikabila dya Efulaimu. 21 Wenk'higwa Shekemu, mzi uwo wandile mzi wa kunyilikila, hamwenga na holudimo lwakwe iyo ili mwe isi ye vigulu va Ifulaimi na Gezeli hamwenga na holudimo lwakwe. 22 Kibizamu hamwenga na nyika zakwe zo ludimo na Beti Heloni hamwenga ne holudimo lwakwe hamwenga iyo imizi wenk'higwe ni mine. 23 Mwe dikabila dya Dani wenk'higwa Eteke hamwenga na holudimo lwakwe, Gibesoni hamwenga na holudimo lwakwe, 24 Aiyaloni na holudimo lwakwe na Gatilimoni na holudimo lwakwe. Kwa hamwenga mizi iyo wenk'higwe ni mine. 25 Mwa hant'hu he nusu he dikabila dya Manase nawenk'higwa Taanaki na holudimo lwakwe. na Gati Limon hamwenga holudimo lwakwe. Mizi iyo wenk'higwe ni miidi.

26 Ivo, mizi wenk'higwe zink'holo za Kohati zisigale nezinda mlongo hamwenga na holudimo lwakwe. 27 Want'hu we zink'holo za Walawi za lukolo lwa Gelishoni, nawenk'higwa mizi miidi mwe nusu ye dikabila dya Manase. Golani uko Bashani, mzi wo kunyilikila, na holudimo lwakwe, na Beshe Tela na holudimo lwakwe. 28 Mwe isi ye dikabila dya Isakali, nawenk'higwa Kishoni na holudimo lwakwe na Dabelati na holudimo lwakwe, 29 Yalimuti na holudimo lwakwe na En Ganimu na holudimo lwakwe. Kwa hamwenga mizi wenk'higwe ni mine. 30 Mwe isi ye dikabila dya Asheli nawenk'higwa Mishali na holudimo lwakwe na Abidoni na holudimo lwakwe, 31 Helikati na holudimo lwakwe na Lehobu na holudimo lwakwe. kwa hamwenga mizi iyo wenk'higwe ni mine. 32 Mwe isi ye dikabila dya Nafutali nawenk'higwa Kadeshi, mzi uwo wa kunyilikila wili uko Galilaya na holudimo lwakwe Hamoti Doli na holudimo lwakwe na Katani na holudimo lwakwe. 33 Hamwenga na mizi mituhu yo lukolo lwa Geleshoni neinda mlongo na mitatu na mitatu na holudimo lwakwe. 34 Walawi watuhu wasigale, awo welekwa wa Melali nawenk'higwa mizi imwe dikabila dya Zabuloni. Nayo ni Yokeamu na holudimo lwakwe, Kalita na holudimo lwakwe, 35 Dimna na madimilo yakwe na Nahalali na holudimo lwakwe. kwa hamwenga iyo neinda mizi mine. 36 Mwe isi ye dikabila dya Lubeni nawenk'higwa Bezeli na holudimo lwakwe, Yahazi na holudimo lwakwe, 37 Kedemoti hamwenga na holudimo lwakwe na Mefaati na holudimo lwakwe. kwa hamwenga nainda mizi mine. 38 Mwe isi ye dikabila dya Gadi nawenk'higwa Lamoti wa Gileadi, mzi wa kunyilikila na holudimo lwakwe na Mahanaimu hamwenga na holudimo lwakwe, 39 Heshiboni na holudimo lwakwe na Yazeli na holudimo lwakwe. kwa hamwenga mizi iyo neinda mine. 40 Hamwenga ne mizi yose wenk'higwe welekwa wa Melali, want'hu we zink'holo za Walawi wasigale neinda mlongo na miidi.

41 Hamwenga na mizi yose wenk'higwe Walawi mwe isi ya Izilaeli neinda milongo mine na mnane na holudimo lwakwe. 42 Kila yumwenga mwe mizi iyo wazungulukwagwa na hant'hu holudimo.

43 Ivo, Zumbe Mnungu awenk'haga Waizilaeli isi yose iyo akelisaga kugamba naawenk'he wakale wawe. Woho nawo niyo waitaha na kwikala uumo. 44 Zumbe Mnungu niyo awenk'haga utondowazi kila hant'hu mwe isi enga ivo akelisile na wakale wawe. Hahali mnk'hondo yeyose adahile kuwahigani kwaviya Zumbe Mnungu awatendaga muwahume wank'hondo wawe. 45 Haihali kila kint'hu icho Zumbe Mnungu akelisile na Waizilaeli hekikint'hile. Kila Ndagano yakint'haga.