1 Naho Musa mndima ywa Zumbe Mnungu eze abanike, Zumbe Mnungu amgambaga Yoshua mwana Nuni mwambizi ywa Musa 2 kugamba, "Mndima ywangu Musa kabanika, haluse dendelukeni nt'hendelo ya kaidi yo mto uno wa Yolodani, weye hamwenga na want'hu wa Izilaeli wose kubula kwe isi idya huwenk'hani. 3 Kila hant'hu aho nomjate hiwenk'hani enga ivo namgambile Musa. 4 Mihaka ya mwe isi yenyu neinde ivi, mwe nt'hendelo yo Kwa mwenye mzi ni dijangwa na mkoma mahanya ni milima ya Lebanoni na ulailo wa zuwa ni udya mto mkulu wa Efulate, kombokela si yose ya Wahiti kubula bahali ya Meditelania mwe nt'hendelo yo usweelo we dizuwa. 5 Hahana mnt'hu yeyose naadahe kukuhiga weye mazuwa yose mwo wikazi wako. Enga ivo nandile hamwenga na Musa, niivo neninde hamwenga na weye naho hehuleke mbwitu. 6 Utoge naho unde mdahi kwaviya ni weye nouwalongoze want'hu mwe isi ino nakelisile kugamba neniwenk'he wakale wawe. 7 Utoge naho unde mdahi na wengele kudamanya viligane ne zisigilizi zose akwink'hile Musa mndima ywangu. Timila kila kint'hu mwe sigilizi izo kila kint'hu nekinde chedi kwako kila hant'hu aho nowiite. 8 Kaulisa use kuleka kusoma ikitabu iki che sigilizi, ukafanyanya kilo na msi na kutimila kila kint'hu kiwandikwe umwo, vileke zimbuli zako zose zikuchumile na kunda mpati kila aho nowiite. 9 Kumbukila kugamba miye hikulagiza utoge naho unde mdahi. Usekogoha naho usekwingila chevu kwaviya miye Zumbe Mnungu ywako ni hamwenga na weye hohose aho nowiite."

10 Niyo Yoshua awalagiza vilongozi wa want'hu akawagamba, 11 gendeni mwe nk'hambi muwagambe want'hu, "Guheni nk'hande kwaviya mwe dizuwa dya katatu nomdendeluke mto wa Yolodani vileke mkaitahe isi iyo Mnungu ywenyu akuwenk'hani inde yenyu."

12 Yoshua awagambaga want'hu wa kabila dya Lubeni na Gadi na nusu ya kabila dya Manase. 13 "Kumbukileni kiya Musa mndima ywa Zumbe Mnungu awagambilagani akagamba, Zumbe Mnungu, Mnungu ywenyu naawahumuzeni na kuwenk'hani isi ino. 14 Wavele wenyu na wana wenyu na mifugwa yenyu neisigale mwe isi iyo Musa awenk'hileni, nt'hendelo ino yo mto Yolodani. Mna wagosi wose watogile wakanda na vitowanilo nawa dendeluke mto na kuwalongoela wandugu zenyu wose vileke, 15 muwambize wandugu zenyu kubula Zumbe Mnungu awenkh'e hant'hu ho kuhumula enga ivo awenk'hileni nyuwe. Naho nawaikaile isi iyo wenk'higwe ni Zumbe Mnungu, Mnungu ywenyu. Naho nomuuye niyo mwekala mwe isi yenyu. Isi iyo mwink'higwe ni Musa mndima ywa Zumbe Mnungu, kwe nt'hendelo ya ulailo wa zuwa yo mto Yolodani inde yenyu."

16 Niyo wamhitula Yoshua, "Mbuli zose ukilagize nekidamanye, kila hant'hu ukukilagiza nekiite. 17 Enga ivo kimtegeleze Musa mwe mbuli zose, nivo kikuunga kikutegeleze weye. Zumbe Mnungu, Mnungu ywako ande hamwenga na weye enga ivo andile hamwenga na Musa. 18 Mnt'hu yeyose akuunga alemele malagizo yako hegu kulemela kutimila ulosi wako hegu mbuli yoyose umlagize naakomwe. Mna weye unde na ludole na kunda mdahi!"