1 Elo, Musa akulawaga kwe nt'hindiga ya Moabu no kuita kwo mnima wa Nebo, akwelaga kwo lunenengwa lwa Pisiga ulailo wa zuwa mwo mzi wa Yeliko. Uko nuko Zumbe Mnungu amlagisaga Musa isi yose, kulawa Gileadi mpaka Dani, 2 isi yose ya Nafutali ne dijimbo dya Ifulaimu na Manase ne isi yose ya Yuda mpaka usweelo wa zuwa we Bahali ya Meditelania. 3 Nyika ya Negebu ne isi yose kulawa kwe nt'hindiga ya Yeliko no mzi we miti ya mitende mpaka Zoali. 4 Mnungu niyo amgamba Musa, "Ino niyo isi nalaganaga kwa Ibulahimu na Isaka na Yakobo aho nagambaga neni ink'hize kwa welekwa wenyu. Hiunga wiione kwa meso du, mna hohuleke wiiingile."

5 Naivo Musa mndima ywa Zumbe abanikilaga kudya kwe isi ya Moabu viligane na ivo Zumbe agambile nevinde. 6 Zumbe Mnungu ammoselaga msanga mwe dikolongo dya Moabu hagihi na Beti Peoli, mna hahali aho kili kikuta cha Musa hata ivi dielo. 7 Musa abanikaga akanda na miaka gana na milongo miidi. Hamwenga na ludole mwo mwili wakwe halwa hungukaga aho meso yakwe yandaga yakaona vedi. 8 Waizilaeli wamhongezelaga Musa mwe isi ya Moabu kwa mazuwa milongo mitatu.

9 Naho Yoshua mwana Nuni andilisaga na muye ywe mizungu, kwaviya Musa amwiikaga kunda mndima hant'hu ha yehe. Ivo Waizilaeli wamwivaga no kutimila icho alongaga naye azitozaga zisigilizi za Zumbe izo azilavaga kwombokela kwa Musa.

10 Kukongela aho, mwe Izilaeli hakwalailaga naho mlotezi mtuhu enga Musa alongaga na Zumbe meso kwa meso. 11 Hakuli mlotezi mtuhu adamanyaga mitu na va kweheela enga idya Zumbe amwink'haga Musa aidamanye amhume seuta ywa Misili, wandima wakwe na isi yakwe yose. 12 Hakwandile na mtuhu andaga na udahi wa kudamanya mbuli nk'hulu naho za kutisa enga izo adamanye Musa ha Waizilaeli.