1 " Uneva mnt'hu ananda kakoma kwe mbago mwe isi iyo awenk'hileni Zumbe Mnungu, nanywe hammanyize amkomile, 2 wadala vilongozi na walamuzi wenyu nawafose na kuhima uhale wa hant'hu kimba aho kili mpaka mzi wa hagihi. 3 Niyo, wadala wo mzi wi hagihi na kiya kimba nawaguhe kadama hekenati kudamanyila ndima yeyose. 4 Wadala vilongozi wo mzi uwo nawaigale indama iyo kwa kazuto ka mazi yakuseela uko isanga yakwe hainati ilimigwe hegu kuhandwa, uko nawaigogole isingo indama iyo. 5 Walava nt'hambiko nawo wana wa Lawi nawaite uko kwaviya woho nawo wakulamula kila masa ya nk'humbizi. Zumbe Mnungu kawasagula wamdamanyile ndima na kuvikila want'hu kwa zina dyakwe. 6 Akajika wadala wose we hagihi na uko akomelwe uyo mnt'hu wasunt'he mikono yawe mnanga mwe ndama idya, 7 na kugamba, ‘Hakimkomile mnt'hu uyo naho hakimmanyize amkomile. 8 Zumbe uwausile wavu want'hu wako wa Izilaeli uwakombole kulawa Misili, naho use kukigela mwa masa ya kumkoma mnt'hu hebanange dyodyose.’ " 9 Kwa kudamanya ivo homnde na masa ya kukoma kwaviya mdamanya enga ivo Zumbe akuunga.

10 "Umwo mkagenda kutowana na wank'hondo wenyu, Zumbe Mnungu naye ana watendani muwahume na kuwataha, 11 niyo mwaona mvele mtana uyo ukumuunga naho waunga umlombe, 12 mguhe umwigale kwe kaya yako naamoge fili za mwo mtwi na kukant'ha makombe yakwe, 13 naavale suke zakwe nt'huhu. Neekale mwe nyumba yako na kuwahongezela welesi wakwe kwa lupisi lwa mwezi umwenga ikajika aho umlombe ande mkazio, 14 uneva houmuunge mwa mazuwa ya kulongole noumlekele aite, usekumtaga kwa matundu, naho usekumtenda enga mtumwa, kwaviya kumgela soni kwa kwikala nae haheina kumlomba."

15 "Uneva mgosi ana wavele waidi naho amuunga yumwenga mna yudya mtuhu hakuungwa, mna wavele awo wose weleka wana, naho nt'hulasasu ywa kigosi ni ywo mvele heekuungigwa, 16 naho dikeza mpaka dizuwa dyo kuwenk'ha wana awo ukipe, ase kulagisa kwazagula kwa mwana ywe kilume ywo mvele akumuunga kwa kumwink'ha upasi wa yudya nt'hulasasu. 17 Vaungwa amzumile yudya nt'hulasasu, mwana wa yudya mvele hekuungwa, na kumwink'ha uwagilwa wakwe hant'hu ha ugoli wakwe nk'hanana mbili."

18 "Uneva mnt'hu ana mwana kilume naho hekuweva welesi wakwe hata uneva wanamkanya, 19 ivo, nine na ise ywa uyo mwana nawamguhe niyo wamwigala kwa wadala wo mzi akwikala uyo umwana. 20 Welesi awo nawawagambile wadala wo mzi uwo, ‘Mwana ywetu ywe kilume hakwiva, naho mhank'hu naho mkozi. 21 Aho want'hu wo mzi uwo nawamtoe maiwe mpaka abanike. Kila mnt'hu mwe Izilaeli neeve na kogoha. Nivo nomuuse uwihi uno mwenyu.’ "

22 "Uneva mnt'hu kadamanya wavu ukuleka akomwe naho niyo akomwa kwa kuwambigwa mwo mti, 23 kimba chakwe kisekulekwa kilo chose, mna nomummose msanga zuwa iidyo. Kwaviya mnt'hu awambigwe mwo mti kaligitwa ni Mnungu. Kimoseleni msanga ikimba icho vileke isi inase ilemelwe ni Zumbe Mnungu."