1 "Izi nizo zisigilizi ne miko no usengelo izo Zumbe Mnungu ywetu anisigiile nize niwahinizeni. Mzive na kuzitimila kwe isi iyo nomwingile no kuitaha, 2 vileke wana wenyu na vyeleko vawe wamtunye Zumbe Mnungu umwo nomnde mwekala kwa kutimila usengelo wakwe wose ne zisigilizi izo huwagambilani mwa mazuwa yose yo wikazi wenyu, vileke mazuwa yo ugima wenyu yande mengi. 3 Tegelezeni nyuwe want'hu wa Izilaeli, naho mkombeke kuziva na kuzitimila na ivo wikazi wenyu nounde wedi, naho nomgenyele no kwikala mwe isi yedi ina ulozo na udimi enga ivo Zumbe Mnungu ywa watati zenyu awagambagani naadamanye."

4 "Tegelezeni nyuwe want'hu wa Izilaeli, Zumbe Mnungu ni Zumbe ekedu. 5 Muunge Zumbe Mnungu kwa moyo wako wose na kwo unt'hu wako wose na kwa ludole lwako lwose. 6 Mzikumbukile zisigilizi izi huwasigiilani dielo naho zinde mwe mioyo yenyu. 7 Mzihinize kwa wana wenyu. Zinde ni simulizi yenyu mkanda hakaya hegu mkanda kwe samo hegu mkagenda mwe sila na mkanda mhumula hegu mkanda mwadamanya ndima. 8 Mziwandike na kuzivala mwe mikono na mwe vihanga venyu kunda lukumbusa. 9 Ziwandikeni sigilizi izi mwe mikimaila ye zinyivi zenyu na mwe zink'hili zenyu."

10 "Naho umwo Zumbe Mnungu ywenyu akawegalani kwe isi awaikilaga kilapi wakale wenyu, Ibulahimu na Isaka na Yakobo kugamba naawenk'he isi ina mizi mikulu yedi homwii zengile nyuwe. 11 Mnungu naawenk'heni nyumba zimemile vint'hu vedi homwii vidamanye nyuwe, masima homuyasimbile, nk'honde za mizabibu na mizeituni homwii handile. Mna mneza kunda na nk'hande nyingi yakuwegusani, 12 mkaulise msekwiza kumjala Zumbe awalavileni Misili kwe isi uko mwandaga watumwa. 13 Mwogoheni Zumbe Mnungu, mumvike yehe ekedu naho nomkelise kwa zina dyakwe du. 14 Mse kuvika milungu mituhu ya want'hu wawazungulukeni, 15 kwaviya Zumbe Mnungu emgati mwenyu, ni Mnungu mta wivu naho maya yakwe enga moto yanase kuwakimp'hukilani na kuwakomani pele mwe isi."

16 "Mse kumgeza Zumbe Mnungu enga ivo mwatendile uko Masa. 17 Mzitozese zisigilizi za Zumbe Mnungu miko yakwe huwasigiilani. 18 Damanyeni yakwelela na yedi ha Zumbe vileke wikazi wenyu unde wedi, naivo mdahe kugenda kuiguha isi iyo iyedi iyo Zumbe Mnungu aikile Ndagano kuwenk'ha wakale wenyu, 19 naho nomuwalave kuse ye isi wank'hondo wenyu wose ivi mkakaula enga ivo Zumbe alongile kugamba naadamanye."

20 "Mwa mazuwa yakwiza umwo wana wenyu wakeza kuwauzani wakagamba, ‘Nii Zumbe Mnungu kakisigiila kitimile zisigilizi izi zose?’ 21 Wagambeni ivi, ‘Suwe chandaga watumwa wa Falao kudya Misili, mna Zumbe akilavaga uko kwa udahi wakwe mkulu. 22 Kiona wenye aho Zumbe atumaga vilagiso va mitu yakweheela vikulu na vikutisa uko Misili na kwa Falao na kwa wandima wakwe. 23 Nakakilava Misili no kukigala aha niyo akink'ha isi idya aikaga Ndagano kwa kilapi kuwenk'ha wakale wetu. 24 Zumbe nakakigamba kive na kitimile sigililizi izi zose naho kimogohe. Kinadamanya ivo naadime isi yetu na kutenda kipatise. 25 Uneva kinamwiva na kutenda kila kint'hu kiya aungile Zumbe Mnungu nekimwelele.’ "