1 "Mtende kwa wengele zisigilizi zose niwenk'hileni ivi dielo vileke mnde na ugima na kugenyela, naho muitahe isi iyo Zumbe aikaga kilapi kugamba naawenk'he wakale wenyu. 2 Kumbukileni ivo Zumbe Mnungu awalongozagani mwo utafi mkomboka mwe dijangwa kwa miaka milongo mine ino yomboke. Awagezagani vileke amanye ayo ye mwe mioyo yenyu kugamba nomzitegeleze na kuzitimila zisigilizi zakwe hegu bule. 3 Awagezagani kwa sala niyo awenk'hani mana mdye, nk'hande iyo nyuwe na wakale wenyu hamnati mwiidye, ivo yandaga ni kuwahiniza kugamba Mnt'hu haaikwe ni kudya nk'hande du, mna naaikwe ni kiya akulonga Mnungu. 4 Suke zenyu hazasakalaga naho viga venyu havatutukaga miaka iyo yose milongo mine. 5 Mmanye mwe mioyo yenyu kugamba, enga ivo mwelesi akumuogola mwanawe, iivo Zumbe Mnungu naye awaogolani. 6 Ivo elo damanyeni enga ivo Zumbe awa sigiileni, wikazi wenyu ulongozwe ni zisigilizi zakwe niyo mwazitegeleza na kuzidamanya. 7 Kwa viya Zumbe Mnungu awegalani kwe isi ina ulozo, naho ina mito na vizuto na makawa ya mazi nc'hoko zikutumbuka mazi mwa makolongo na mwe vigulu. 8 isi ina ngano na shaili na zabibu na tini na makomamamnga na zeituni no uki. 9 Isi heiina sala naho homhungukilwe ni chochose, isi ina maiwe yakulava vilama naho ni isi mkudaha kusimba shaba. 10 Nomnde na kila kint'hu cho kudya naho nomumgambe Zumbe Mnungu nivedi kwajili ye isi ina ulozo awenk'hileni."

11 Musa agendeelaga kulonga akagamba "Msekumjala Zumbe Mnungu naho mse kudunduga kuiva na kutimila sigilizi yakwe yoyose iyo huwenk'hani ivi dielo. 12 Umwo mkeza kunda na nk'hande ya kuwegusani naho mkeza kunda mzeka nyumba zedi niyo mwekala uumo, 13 naho umwo ng'ombe zenyu na magoto na masawa na zahabu na ugoli wenyu mtuhu ukeza kunda ugenyela, 14 mkaulise mnase kukeduvya niyo mwamjala Zumbe Mnungu awalavileni Misili ukwo mwandaga watumwa. 15 Ni yehe awalongozagani mwe dijangwa dikutisisa dyandaga na nyoka zina usungu ukukoma na visuse. Awalavilagani mazi mwo luwe mwe isi heiina mazi. 16 Awenk'hagani mana mdye, nk'hande iyo wakale wenyu hawaimanyaga. Awatendelagani ayo yose vileke awagezeni kwa ayedi akuunga awenk'heni kulongole. 17 Aho mnakaulise, mnase mgambe mwe miyoyo yenyu mpata ugoli uwo kwa ludole na udahi wenyu wenye. 18 Mkumbukile kugamba Zumbe Mnungu niye awenk'hileni udahi wa kupata ugoli uwo. Adamanya aya kwaviya yehe akei mhuilwa dielo kwa Ndagano idya aikaga na wakale wenyu. 19 Mneza kumjala Zumbe Mnungu niyo mwatimila milungu mituhu na kuifikila madi na kuivika, nawakanyani kindedi kugamba nomkomwe pele. 20 Mnaleka kwiva na kutimila yalongigwe ni Zumbe Mnungu nomkomigwe pele enga ivo Zumbe awakomaga pele want'hu wa isi nt'huhu umwo mwandaga mkeza."