1 "Musa agendeela kulonga, nevinde kugamba aho mkeza kunda mwingila mwe isi akuwenk'hani Zumbe Mnungu na kunda ukipe wenyu na kuikaila, 2 niho kila yumwenga naagele mwe nt'hangulu ulozo wa nk'hongo wa kila uvuni avunile, niyo aita navo hant'hu aho Zumbe Mnungu kahasagule kuvikwa. 3 Noumbase mlavant'hambiko naande aho mwe dizuwa idyo, niyo wamgamba, ‘Dielo nalonga mwenye kwa Zumbe Mnungu ywanga kugamba hingila mwe isi ino Zumbe awaikilaga kilapi wakale wetu kugamba noukink'he.’ "

4 "Mlavant'hambiko naye naaihokele kwako niyo aiika he kilingo cho kulavila nt'hambiko cha Zumbe Mnungu. 5 Naho nawe nouhitule mwenye aho hant'hu hasagulwe ni Zumbe Mnungu kagamba, ‘Mkale ywangu andaga Mwalami akwangadika niyo aita Misili ne mp'huga yakwe, umwo waitaga uko wandaga want'hu wageke mna welekaga niyo wanda si nk'hulu ina udahi naho want'hu wabindile ingi. 6 Wamisili wandaga wakakitendela kwa luhahila na kukitigiza kudamanya ndima ndala yo utumwa. 7 Niho chamwiilaga Zumbe Mnungu ywa wakale wetu. Akivaga niyo aona makunt'ho yetu na ndima ndala na kuzilwa kwetu. 8 Ivo Zumbe akilavaga uko Misili kwa udahi wakwe mkulu. Adamanyaga vilagiso na vihungi vingi na kweheela. 9 Akigalaga aha niyo akink'ha isi ina ulozo na ugoli. 10 Naho haluse negala kwa Zumbe ulozo wa nk'hongo we isi anink'hile, akajika ika int'hangulu hant'hu ha kumvika Zumbe niyo wafika madi ahakwe.’ "

"Akajika wiike int'hangulu aho hant'hu hasagulwe kumvika Zumbe 11 Ukaonele kinyemi ayedi yose akwink'hile Zumbe Mnungu weye ne mp'huga yako. Naho Walawi na watakwiza wakwikala kwako nawo wande mwe kinyemi icho."

12 "Ukeza kunda kwazagula imwenga yamlongo mwo ulozo wako mwo mwaka wa katatu, mwaka uwo nomlave imwenga ya mlongo, umwink'he Mlawi na mtakwiza na mwana nk'hiwa na mvele abanikilwe ni mgosiwe vileke wadye mwe nyumba yako na kwiguta. 13 Ulonge kwa Zumbe Mnungu, ‘Hikiusa kint'hu kikukile imwenga ya mlongo mwe nyumba yangu, hiwenk'ha Mlawi na mtakwiza na mwana nk'hiwa na mvele abanikilwe ni mgosiwe enga ivo usigiile. Hilekile kuzitimila naho hijaile sigilizi yako yeyose. 14 Hidiile iyo imwenga yomlongo umwo hahongeza, naho hiusile chochose kulawa mwe nyumba yangu aho nandaga hizumilwe kwa Zumbe, naho vint'hu ivo hivitendile malavo kwa wabanike. Hidamanya kila kint'hu unisigiile. 15 Kaula uku hasi kulawa hakukile hako kwe mbingu niyo wawavikila want'hu wako Izilaeli hamwenga ne isi ukink'hile viligane na ivo wagambaga nouwenk'he wakale wetu, isi ina ulozo na ugoli.’ "

16 "Dielo Zumbe Mnungu awasigiilani mtimile zisigilizi ne miko, ivo mzive na kuzitimila kwa uhuwilwa naho kwe mioyo yenyu yose no unt'hu wenyu wose. 17 Dielo kulonga mweye kugamba Zumbe Mnungu ni Mnungu ywako naho kugamba nomumtegeleze na kutimila ayo akukugambila na kuzidamanya zisigilizi zakwe zose na yose akukusigiila. 18 Dielo Zumbe kawazumilani kugamba nyuwe mwi want'hu wakwe mwenye wakukile enga ivo alonganga kugamba nomnde, naivo mwaungwa kutegeleza na kutimila zisigilizi zakwe zose. 19 Kugamba naawatunyiseni kujink'ha si zose aziumbile, naho nomtogolwe na kutunywa na kumanyika. Nomnde want'hu wakwe wakukile enga ivo alongile."