1 "Umwo Zumbe Mnungu akeza kuwakoma pele want'hu we isi iyo akuwenk'hani niyo mwaiguha mizi yawe ne zinyumba zawe na kwikala uko, 2 nompagule mizi mitatu yakunyilikila mwe isi iyo mkwink'higwa ni Zumbe Mnungu. 3 Nouipange isi nk'hanana nt'hatu naho kila mzi unde mhufu kwingilwa, vileke yeyose akumkoma miyawe haheina kukambila, naanyilike mwo umwenga mwe mizi iyo. 4 Mnt'hu akumkoma miyawe haheina kukambila, naho yehe handile mnk'hondo ywakwe, mnt'hu uyo adaha kunyilikila mwo umwenga we mizi iyo na kukeyokola mwenye. 5 Enga viya, mnt'hu akuita na miyawe kwe mbago akakele nk'huni, umwo akaukela umti, hoya niyo yasomoka kulawa mwo mhini wakwe na kumkoma yudya mtuhu, mnt'hu uyo adaha kunyilikila mwo umwenga we mizi iyo vileke akeyokole mwenye. 6 Mna uneva nokunda na mzi umwenga du, mzi utendesa uhale. Uyo akuunga alihize adaha kumgulusa na kumgwila niyo amkoma kwa maya myawe hebanange dyodyose. Mna nakanda hakambile kumkoma miyawe uyo andile hiyo mnk'hondo ywakwe. 7 Ivi nivo vikuleka nawasigiila muipagule mizi iyo mitatu."

8 "Naho uneva Zumbe Mnungu anongezela mihaka yenyu ye isi, enga ivo awagambilaga wakale wenyu na kuwenk'ha isi yose alaganaga kuwenk'ha awo wakale wenyu, niho nomsagule mizi mituhu mitatu. 9 Naawenk'heni isi ino uneva nomdamanye kila kint'hu huwasigiilani dielo, naho uneva nommuunge Zumbe Mnungu ywenyu na kwikala kwa kutimila mahinizo yakwe, 10 ipaguleni mizi iyo vileke mnt'hu heena masa asekukomwa mwe isi yenyu iyo Zumbe Mnungu nawenk'heni inde yenyu, na kuwatenda mnde na masa ya kukoma."

11 "Mna mnt'hu ananda mnk'hondo ywa miyawe, na kumvima na kum kup'hukila niyo amkoma na kunyilikila mwo mzi umwenga mwa iyo. 12 Niho wadala vilongozi wo mzi uwo na wasigiile want'hu wamfoseze uko kwo mzi na kumwink'hiza kwa yudya mndugu akuunga alihize vileke akomwe. 13 Msekumuonela mbazi mnt'hu uyo. Ivo nivo nomhause uwihi wo ukomi wa mnt'hu heina masa mwe Izilaeli, vileke mpate ayedi."

14 "Aho mkeza kwingila mwe isi mkwink'higwa ni Zumbe Mnungu ywenyu inde yenyu msekuusa viwalo ve mihaka ya want'hu we hagihi na nyuwe ivo vaikagwa ni kale wenyu."

15 "Uwona wa mnt'hu yumwenga haukudaha kumsengela mnt'hu mwa masa yeyose adamanye. Ni uwona wa want'hu waidi hegu watatu nuwo ukuungwa. 16 Uneva muwona aihile kalaila na kumlongeleza mnt'hu yeyose mwa masa, 17 ivo yehe na uyo alongelezwe mwa masa ayo nawaite hant'hu ha hakuvikila, na ha mlava nt'hambiko na walamuzi wo lupisi ulo naho nawa sengelwe. 18 Walamuzi awo nawakaulise kwa wengele malongelezo ayo naho, inanda muwona uyo ni mlulimi naho kamlongeleza miyawe kwa lulimi, 19 ivo, nomumdamanyile enga ivo naakaunga amdamanyile nduguye. Ivo nivo mkuunga muhause wiihi uwo mwe Izilaeli. 20 Naho want'hu watuhu naweve na kogoha. Wiihi enga uwo houdamanyike naho mwenyu. 21 Msekuwaonela mbazi want'hu enga awo. Ugima noulihwe kwa ugima, ziso kwa ziso, zino kwa zino, umkono kwa mkono, kiga nacho nekilihigwe kwa kiga."