1 "Mgosi yeyose afunt'higwe hegu akant'higwe ugosi wakwe haazumilwe kuvika hamwenga na want'hu wa Zumbe."

2 "Naho mwana elekwe ni mgosi mwizilaeli kwa mvele hi Mwizilaeli, haazumilwe kwingila mwo mdugano wa want'hu wa Zumbe. Ino ni hamwenga na welekwa wakwe hata cheleko cha mlongo."

3 "Mwamoni hegu Mmoabu yeyose, welekwa wakwe wose na cheleko chakwe cha mlongo, hawakuungwa mwo mdugano wa want'hu wa Zumbe. 4 Kwaviya walemelaga kuwenk'ha nk'hande na mazi umwo mwandaga mwe sila kulawa Misili, naivo nawamwink'ha ndima Balaamu mwana Beoli kulawa Petoli kudya Mesopotamia. Awaligiteni nyuwe. 5 Mna Zumbe Mnungu hamwivile Balaamu, vituhu vakwe ligito idyo adihitulaga kunda uvikilwa, kwaviya Zumbe kawaungisani nyuwe. 6 Usekuwazunguila utondowazi hegu uvikilwa Waamoni hegu Wamoabu, mazuwa yose mazuwa yose."

7 "Msekuwaihiya Waedomu, awo ni ndugu zenyu. Naho msekuwaihiya Wamisili, kwaviya mwekalaga mwe isi yawe enga wata kwiza. 8 Welekwa wawe, kukongela cheleko cha katatu, nawazumilwe kwingila mwo mdugano wa want'hu wa Zumbe."

9 "Mkaita kwe nk'hondo, na kutoa nk'hambi, kila mnt'hu akenege na kila kint'hu kiihile kikukutenda usekuzumilwa ni Zumbe. 10 Uneva mgosi yeyose mwenyu aneningila usavu kwa kulawa mbeyu za cheleko nekilo, uyo naafose kuse ye nk'ambi na kwikala uko. 11 Mna inabula kisingi naahake mazi mwo mwili, naho zuwa dinaswa naauye kwe nk'hambi."

12 "Mwaungwa kunda na hant'hu kuse ye nk'hambi, aho mkudaha kuzungulukila. 13 Mnde na vigembe vidododo vileke umwo mkazunguluka vimwambizeni kusiliza. 14 Nk'hambi yenyu yaungwa inde ikukile kwaviya Zumbe Mnungu eyumo mwe nk'hambi yenyu vileke awayokole na kuwenk'ha uhumi mwa wank'hondo wenyu. Msekutenda kint'hu chochose kisavu icho nekileke Zumbe awalekeni."

15 "Uneva watumwa wananyilika kwa wakulu wawe na kunyilikila mwe isi ya Izilaeli mse kumvuza kwo mkulu wawe. 16 Nekale hamwenga na nyuwe mwe mizi yenyu hant'hu hohose hedi naahasagule, msekuwadamanyila vihile."

17 "Mwizilaeli yeyose mgosi hegu mvele hakuungwa kunda mhabwasi hant'hu hawe ho kuvika. 18 Matundu yeyose yalawile kwo uhabwasi, yasekwigalwa mwe nyumba ya Zumbe Mnungu kwajili ya kilapi chochose. Mnungu aviihia ivi vose."

19 "Usekumwink'ha nduguyo Mwizilaeli kint'hu chochose kwa maliho ya kusump'hula inde matundu hegu nk'hande hegu chochose kiya. 20 Wadaha kuguha cha kusup'hula kwa mta kwiza hiyo kwa Mwizilaeli miyawo, vileke Zumbe Mnungu akuvikile mwe zindima zako zose noudamanye mwe isi iyo ukwingila uitahe inde yenyu."

21 "Ukaika kilapi kwa Zumbe Mnungu, ukombeke kuiusa, kwaviya Zumbe Mnungu haleke kuiunga kwako naivo neinde wavu kwako, 22 mna unaleka kuika kilapi hounde na wavu, 23 unde na wengele mwe kukint'hiza kilapi icho ulongile, kwaviya nokuika Ndagano na Zumbe Mnungu kwa kuunga mwenye."

24 "Ukagenda mwe nk'honde ya mizabibu ya mnt'hu wadaha kudya zabibu ivo ukudaha, mna usekunonola zabibu zozose niyo wagela mwe nt'hangulu yako. 25 Uneva ukengila mwe nk'honde ya mnt'hu ina mhuta wadaha kukwanyula niyo wadya mna use kuisenga ne ngola na kuita nayo kaya."