1 "Akajika chahitukaga niyo chakwela ne sila ikuhinga Bashani. Seuta Ogu ywa Bashani na watowani wakwe wose wakiziilaga vileke wakitowe nk'hondo hagihi no mzi wa Edulei. 2 Mna Zumbe anigambaga, ‘Use kumwogoha kwaviya hiwenk'hani udahi wa kumhuma na want'hu wakwe na kuitaha isi yakwe. Umtendele enga ivo utendile kwa seuta Sihoni ywa Waamoli uyo ekalaga Heshiboni.’ "

3 "Elo, Zumbe Mnungu ywetu uyo akink'haga udahi wa kumuhuma seuta Ogu ywa Bashani na wank'hondo wakwe. Ivo chawakomaga wose pele haheina kusigaza mnt'hu yeyose. 4 Chaitahaga mizi yakwe yose, hakwandaga na mzi wowose chadundugaga kuutaha. Chatahaga mizi ibuile milongo mtandatu, nuko kugamba ni isi yose yalongozagwa ni Ogu seuta ywa Bashani. 5 Mizi iyo yose yandaga na magomela matali yandaga na nk'hili zina madanga hamwenga kaya zibindile ingi hezendaga na magomela . 6 Kila kint'hu na kila mzi chavibanangaga pele niyo chawakoma wagosi na wavele na wana enga ivo chatendile kwe mizi ya seuta Sihoni ywa Heshiboni. 7 Mna mifugwa yose no ugoli wose chavitahaga vinde vetu."

8 "Ivo mwo lupisi ulo, chatahaga isi iyo ya maseuta awo waidi wa Waamoli, nt'hendelo ya ulailo wa zuwa yo mto Yolodani, kulawa kwo mto Anoni mpaka kwo Mnima Helimoni. 9 Mnima Helimoni want'hu wa Sidoni wawitangaga Silioni, Waamoli nawo wawitanga Senili. 10 Chatahaga mizi yose imwe nt'hindiga mwa magundi na si yose ya Geleadi na Bashamu yose mpaka Saleka na isi ya Adulei mizi ya seuta Ogu wa Bashani."

11 Seuta Ogu niye asigalaga du mwa Walefai. Jeneza dyakwe dyadamanyagwa dya kilama na maiwe. Dyandaga na utali wa mp'hima mtandatu, uzangalamu wakwe nawo mp'hima nt'hatu. Jeneza idyi dikei diuko komzi ukwitangwa Laba, umzi wa Waamoni.

12 "Kize kitahe isi iyo naink'hizaga kwa makabila ya Lubeni na Gadi kwe nt'hendelo ya mkoma mahanya mwa Aloeli hagihi na mzi wa Aloeli hagihi ne dikolongo dya Alinoni ikanda ni hamwenga ne nt'hendelo imwenga ye isi ye vigulu ya Geleadi hamwenga ne mizi yakwe. 13 Nte'hendelo isigale ya isi ya Gileadi na Isi yose ya Bashani, uwo useuta wa Ogu, nehiwenk'ha idihinde dye dikabila dya Manase. Isi yose ya Agabo."

(Bashani yamanyikaga kunda ni isi ya Walefeimu. 14 Mnt'hu yumwenga ywa kabila dya Manase akwitangwa Yeli aguhaga isi yose ya Agabo iyo ikwitangwa Bashani mpaka kwe mihaka ya Geshuli na Maaka. Vikaya vose avink'haga dizina dyakwe. Ivo mpaka ivi dielo vetangwa vikaya va Yaili.)

15 "Isi ya Gileadi nehiwenk'ha lukolo lwa Makili lwe dikabila dya Manase. 16 Want'hu wa makabila dya Lubeni na Gadi woho nawenk'haga isi yose kulawa Gileadi mpaka kwo mto wa Anoni. Mhaka wawe wa Kwa mwenye mzi wandaga nu mto Anoni, mhaka wa mkoma mahanya nawo wandaga nu mto Yaboki uwo ukuhakana ne isi ya Waamoli. 17 Ko usweelo wa zuwa isi iyo yenelaga mpaka kwo mto Yolodani, kulawa kwe diziwa dya Galilaya kwe nt'hendelo ya mkoma mahanya yaseelaga mpaka kwe bahali ya Alaba iyo ikwitangwa Bahali yo Munyu mpaka kwe ziseleza za Pisiga kwe nt'hendelo ya Ulailo wa zuwa."

18 "Mwo lupisi uludya nawa sigiilagani ivi, ‘Zumbe Mnungu ywenyu kawenk'hani isi ino ulailo wa zuwa wo mto Yolodani inde yenyu. Haluse wagosi wose wadahi we nk'hondo wakekake vitowanilo mwomboke mto Yolodani, muwalongoele wandugu zenyu Waizilaeli. 19 Mna wavele wenyu na wana wenyu ne mifugwa yenyu, himanya kugamba mnanayo mifugwa ibindile ingi, awo nawasigale kwe mizi niwenk'hileni. 20 Wambizeni wandugu zenyu Waizilaeli mpaka Zumbe awenk'he kutondowala mwe isi yawe enga ivo nyuwe naywe mtondowale. Nuko kugamba woho nawo waikaile isi yawe iyo wakwink'higwa ni Zumbe Mnungu uyo kikuvika uko kwe nt'hendelo int'huhu yo mto Yolodani. Yakajika ayo nomuuye kwe isi yenyu ino niwenk'hileni inde yenyu.’ "

21 "Naho namsigiilaga Joshua ivi, ‘Kuyaona mwenye ayo yose Zumbe Mnungu naawambize kuwakoma pele wadya maseuta waidi, uyo Sihoni na Ogu. Ivi nivo Zumbe naawatende kwe ziisi zose mkugenda kuzitaha. 22 Mse kuwogoha kwaviya Zumbe Mnungu ywenyu naawatowanileni.’ "

23 "Mwo lupisi ludya namlombezesaga Zumbe hamgamba, 24 ‘Zumbe Mnungu, kunda kunilagisa miye mndima ywako ukulu wako na udahi wako. Hakuli mnungu yeyose kwe mbingu hegu he isi akudaha kudamanya vint'hu vikulu vikweheela enga ivo udamanye weye! 25 Zumbe, nakulombeza unilekele nomboke mto Yolodani haione isi ina ulozo kwe nt'hendelo int'huhu, isi yedi ye vigulu hamwenga ne Milima ya Lebanoni.’ "

26 "Mna ni nyuwe mlekile Zumbe hanitegeleze. Vituhu vakwe niyo anigamba, ‘Nyamala, usekugendeela kulonga na miye mwe mbuli ino naho! 27 Ita kwo lunenengwa lwo mnima Pisiga niyo wakaula kwo ulailo wa zuwa na usweelo wa zuwa na Kwa mwenye mzi na mkoma mahanya. Uikaulise isi iyo kwaviya howomboke na mpaka nt'hendelo int'huhu ya Yolodani. 28 Umsangalaze na kumwink'ha ludole Yoshua na kumsigiila kwaviya naawalongoze want'hu awa womboke umto Yolodani naho naawalongoze Waizilaeli kutaha isi na idya kuikala.’ "

29 "Ivo chekelaga aaho he dikolongo dikuita Beti Peoli."