1 "Walava nt'hambiko wose we dikabila dya Lawi hawapangilwe hant'hu mwe isi vileke hande hawe. Woho nawekale kwa malavo ya Zumbe Mnungu. 2 Naho hawande na hant'hu hawe enga ivo weli wandugu zawe. Upasi wawe ni kunda walava nt'hambiko wa Zumbe enga ivo Zumbe alongile."

3 "Na ino neinde uwagilwa wa walava nt'hambiko kulawa kwa want'hu wakulava malavo inde ng'ombe hegu ngoto nawawenk'he walavant'hambiko, mikono njeje na utombo. 4 Nomuwenk'he ulozo wa nk'hongo wa nk'hande na divai mp'ya na mavuta na mazoya yakukant'hwa nk'hongo ye zingoto zako. 5 Mwe makabila yenyu yose, Zumbe Mnungu kasagula kabila dya Walawi dimdamanyile ndima enga walava nt'hambiko mazuwa yose."

6 "Mna Mlawi yeyose anaunga mwenye adaha kulawa mwo mzi wowose udya wa Izilaeli na kuita hadya Zumbe Mnungu naahasagule, 7 naho adaha kudamanya ndima aho enga mlava nt'hambiko wa Zumbe Mnungu, enga wadya Walawi watuhu wakudamanya ndima aho. 8 Nawapate upasi wawe wo kudya, hamwega na kugamba wana vint'hu vikulawa mwe zindima za wandugu zawe."

9 "Aho mkeza mpaka kwe isi idya mkwink'higwa ni Zumbe Mnungu, msekutimila vihendo viihile ve isi iyo. 10 Hasekunda na mnt'hu yeyose mwa nyuwe naamwoke mwanawe we kilume hegu ywe kike kunda malavo ya kokwa, akukaula mnamulo kwa misimo iihile, akutowa msia, 11 hegu msai wa hilizi, na akukweza mp'hepo na msai hegu mnt'hu akulonga na wabanike. 12 Kwaviya yeyose naadamanye ayo amwiihiza Zumbe, na kwaajili ya mbuli izi, Zumbe Mnungu awagulusa want'hu wakudamanya ayo, umwo nyuwe mkengila. 13 Mnde wahuilwa kwa Zumbe Mnungu."

14 Musa niyo agamba, "Want'hu we si izi nomzikaile waita kwa wagangana na wakutoa milamulo, mna Zumbe Mnungu hakuunga nyuwe mdamanye mbuli enga izo. 15 Vituhu vakwe Zumbe Mnungu naawasaguileni mlotezi mtuhu enga miye kulawa mwenyu naho mwaungwa mmwive na kumtimila."

16 "Icho nicho mumlombeze Zumbe Mnungu kudya kwo mnima Sinai mwe dizuwa diya dyo mdugano. Mwalombezaga kugamba hamkuunga kwiva naho Zumbe akalonga na nyuwe hegu kuuona naho uno umoto mkulu sema mnabanike. 17 Zumbe Mnungu nae niyo anigamba, ‘Ayo walongile ni kindedi. 18 Neniwasaguileni mwa wandugu zenyu mlotezi enga weye, nenigele ulosi wangu mwo mnomo wakwe, yehe naye naawagambileni yose nenimgambile. 19 Yeyose yudya heeve ulosi uwo naalonge mlotezi uyo kwa udahi wangu, miye mwenye nenimsengele. 20 Mna mlotezi mtuhu naalonge kwa udahi wa milungu mituhu, hegu naageze kulonga mbuli yeyose kwa udahi wangu ikanda himgambile alonge, uyo mlotezi naabanike.’ "

21 "Nyuwe nanywe mwadaha kwehelwa kugamba nomuumanye vivihi ulosi houlawile kwa Zumbe? 22 Uneva mlotezi analonga kint'hu kwa udahi wa Zumbe mna kint'hu icho hakikudamanyika hegu kunda kindedi, mbuli iyo halongile Zumbe. Mlotezi uyo kakelongela kwa udahi wakwe mwenye, msekumwogoha mlotezi uyo."