1 "Mkeza kuita kwe nk'hondo na kokutoana na wank'hondo wenyu, na kuziona zifalasi na magali yakuvutwa ni Falasi na fyo kulu dya wank'hondo kujink'ha idyenyu msekogoha. Kwaviya nomndanye na Zumbe Mnungu awalavile Misili. 2 Umwo mkanda hamnati kukonga nk'hondo, mlava nt'hambiko naafose kulongole na kuwagamba watoani, 3 ‘Want'hu wa Iziaeli tegelezeni! Dielo mwihagihi na kutoana na wank'hondo wenyu. Msekogoha hegu kwingila chevu naho wasekumitisani. 4 Kwaviya Zumbe Mnungu niye naaite na nyuwe kokutoana na wank'hondo wenyu na kuwenk'hani nyuwe uhumi.’ "

5 "Niho wakulu wa watowani nawawagambe watowani, ‘Togoleni, eyuko mnt'hu yeyose azengile nyumba mp'ya mna hanati ailimbule? Auye kaya, sema akabanikila kwe nk'hondo niyo nyumba iyo yalimbulwa ni mnt'hu mtuhu. 6 Togoleni, eyuko mnt'hu yeyose ahandile mizabibu naho hanati kudya matunda yakwe? Auye kaya, sema anakabanikila kwe nk'hondo niyo mnt'hu mtuhu aonela kinyemi ukudya matunda yakwe. 7 Togoleni eyuko mnt'hu yeyose aha atumize mvele naho ehagihi na kulomba? Auye kaya, sema anabanikile kwe nk'hondo niyo mnt'hu mtuhu amlomba uyo mtumizwa.’ "

8 "Wakulu wa watowani nawagendele kuwagambila want'hu, ‘Togoleni eyaho mnt'hu afile chevu? Auye kaya, sema anatende weyawe wafe chevu enga yehe 9 Wakulu wa watowani awo wanajika kulonga na watoani, wakimalizi wa mafyo nawasagulwe kwa kila fyo dodo dya watowani.’ "

10 "Mkeza kunda hagihi kuukump'hukila umzi, nomnde kuwauza uneva wazumila kuhumwa haheina kutowana. 11 Wakaya awo wazumila kuhumwa haheina kutowana na kuwakomwoelani zink'hili, niho want'hu wose awo weyaho nawande watumwa wenyu na kudamanya ndima kwa kutigizwa. 12 Mna want'hu wo mzi uwo wanalemela niyo wusagula kutowana na nyuwe, ivo nomuwakindile kwa kuuzunguluka mzi wawe ne difyo dya watowani wenyu, 13 naye Zumbe Mnungu anawatendani mdahe kuutaha, nomuwakome wagosi wose. 14 Mna wavele na wana na ng'ombe na vose viyumo mwo mzi, mwadaha kuviguha vit'hu vose kwaajili yenyu nyuwe wenye. Ivint'hu ivo Zumbe Mnungu amink'hileni kulawa kwa wank'hondo wenyu. 15 Nivo nomwiitende mizi yose ihale ne isi mkugenda kwikala."

16 "Mna uneva mnaitaha mizi ye isi iyo, Zumbe Mnungu akuwenk'hani komeni kila kint'hu. 17 Nomkome pele, Wahiti na Waamoli, Wakanaani na Wapelezi, Wahivi na Wayebusi enga ivo Zumbe Mnungu awasigiileni mdamanye. 18 Wakomeni sema wanawahinizeni kutimila vint'hu vikuihiza ivo wakudamanya mwo kuvika milungu yawe niyo mwadamanya wavu ha Zumbe Mnungu ywenyu."

19 "Mnaukindila kwa kuuzunguluka mzi kwa mazuwa mengi mkatoana vileke muutahe, msekubananga miti yakwe kwa kuikant'ha. Kwaviya mwadaha kudya matunda yakwe. Togoleni, miti ni wank'hondo vikuleka muikump'hukile? 20 Mwadaha du kukant'ha miti hi ya matunda kwa kudamanyila mihindo ya kukweela mwe digomela umwo mkaukump'hukila umzi uwo mpaka muutahe."