1 Mwe kitabu iki numo zili zimbuli izo Musa alongaga na want'hu wa Izilaeli umwo wandaga mwe dijangwa ulailo wa zuwa wo mto Yolodani. Wandaga mwe Dikolongo dya Yolodani hagihi na Safu, hagati yo mzi wa Palani nt'hendelo imwenga ne mizi ya Tofeli na Labani na Hezoloti na Dizahabu kwe nt'hendelo int'huhu. 2 Ni lugendo lwa zuwa dimwenga kulawa kwo mnima Holebu uwo ukwitangwa Sinai mpaka Kadeshi-banea kwombokela mwe isi ya vigulu va Seili. 3 Mwo mwaka wa milongo mine, mwe dizuwa dya nk'hongo mwo mwezi wa mlongo na umwenga, aho weze walawe Misili, Musa awagambilaga ayo agambilalagwa ni Zumbe awagambile Waizilaeli. 4 Ayo yalailaga aho Musa eze amhume Sihoni seuta ywa Waamoli na awo wekalaga mwo mzi Heshi-boni no kumhuma Ogu seuta ywa Bashani uyo ailongozaga mizi ya Ashitaloti na Adulei. 5 Umwo want'hu wandaga ulailo wa zuwa wo mto Yolidani mwe isi ya Moabu, Musa akongaga naho kutambalisa Imiko.

Akagamba, 6 "Umwo chandaga kudya kwo mnima Helobu Zumbe Mnungu ywetu akigambaga, ‘Mwikalisa elo mwo mnima uno, 7 kongeni utafi msogele kulongole mwe isi ye vigulu ya Waamoli, mwiite kwe zi isi zose zi mgihi mwe dikolongo dya Yolodani mwe isi ye vigulu na mwe isi ze nt'hindiga, na nt'hendelo ya Kwa mwenye mzi na mp'hwani ye Bahali ya Meditelania. Mwiite kwe isi ya Wakanaani na kujink'ha milima ya Lebanoni mpaka kwo mto mkulu wa Efulati. 8 Kauleni isi ino yose hiwenk'hani nyuwe, isi iyo niyo miye Zumbe naikilaga kilapi cha kuwenk'ha wakale wenyu awo Ibulahimu na Isaka na Yakobo ne vyeleko vawe. Haluse iteni mkaitahe.’ "

9 Musa awagambaga want'hu, "Umwo chandaga mwo mnima Sinai nawagambagani, ‘Ndima ino ya kuwalongozani nyuwe ndala. Hikuidaha miye nikedu. 10 Zumbe Mnungu ywetu kawenk'hani cheleko, ivo dielo mgenyelesa enga nt'hondo za mwo ulanga. 11 Zumbe Mnungu ywa wakale wenyu awagenyezeni vitendese no kuwavikila enga ivo awaikilaga kilapi wakale wenyu. 12 Mna miye nikedu nenidahe vivihi kubinda nk'halalizi zenyu? 13 Saguleni want'hu wana mizungu naho wabala naho wakuzumilwa kulawa mwe kila kabila dyenyu, name neniwatende vilongozi wenyu.’ " 14 Nanywe mwanigambaga, "Icho ufanyanye ni kint'hu chedi cho kudamanya." 15 Elo, naguhaga vilongozi mwa makabila yenyu, want'hu wata mizungu naho wabala na wakuzumilwa kulawa mwe makabila yenyu. Want'hu awa waikagwa kunda vilongozi wakulu wa watowani kwenyu mwa want'hu maalufu na vilongozi wa want'hu magana na vilongozi wa want'hu milongo mishano na vilongozi wa want'hu milongo. Naho nehisagula wakimalizi wa makabila.

16 "Mwo lupisi ludya nawenk'haga walamuzi wenyu sigilizi izi kugamba, ‘Tegelezeni mahigano mwa wandugu zenyu naho mlamule haheina kwazagula, ikanda ni mwa waizilaeli wandugu hegu watakwiza wakwikala mwenyu. 17 Msekwazagula mwo kulamula kwenyu msengeleni kila mnt'hu mwo usengeelo uwo haheina kukaula ivo eli. Msekogoha mnt'hu yeyose kwaviya ulamuzi mkudamanya walawa kwa Mnungu. Uneva masa yatendesa madala naho hamkudaha kulamula, nigaileni miye nenilamule.’ " 18 Mwo lupisi uludya nehiwagambilani kila kint'hu nomkaungwa kudamanya.

19 "Nekitenda enga ivo Mnungu ywetu akigambile. Chahalawaga ho mnima wa Helobu kuhinga kwe isi ye vigulu va Waamoli kwombokela mwe isi ina kutisa kwi hengi mwe dijangwa, niyo chabula Kadeshi banea. 20 Name niyo nawagambagani, ‘Mbula mwe isi ya vigulu umwo wakwikala Waamoli, iyo Zumbe Mnungu ywetu akukink'ha. 21 Kauleni, Zumbe Mnungu ywenyu kawenk'hani isi. Iteni mkaitahe vilagane na ivo asigiile Zumbe Mnungu ywa wakale wenyu. Mse kogoha naho msekukink'hila.’ "

22 "Mna nomwiza kwangu niyo mwanigamba, ‘Goja kigale wapelembi wakaipelembe isi vileke wakakigambile sila iyedi yo kombokela na kukigambila ivo ili imizi ya uko.’ "

23 "Mbuli iyo niyo yanelela, ivo nasagulaga wagosi mlongo na waidi, yumwenga kulawa mwe kila kabila. 24 Waitaga mpaka kwe isi ye vigulu no mpaka kwe nt'hindiga ya Eshikoli niyo waipelemba. 25 Wanonolaga matunda ye isi idya niyo wakigaila ulosi naho wakigamba isi akukink'ha Zumbe Mnungu ni yedi."

26 "Mna hamwazumila kukwela uko, mwasagukaga mwe sigilizi iyo ya Zumbe Mnungu , naivo hamwadahaga kwingila mwe iyo isi. 27 Msigala mwa mahema yenyu niyo mwakalaliza mkagamba, ‘Zumbe kakiihiya. Kakilava mwe isi ya Misili vileke akink'hize kwa Waamoli na kwa sila ino akikome pele. 28 Chogohaga! Uko chabasai? Wadya chawatumaga wakigamba mazint'hu ya uko matali naho yana ludole kujink'ha suwe naho yekala mwe mizi ina magomela yakubula kwo ulanga. Naho wayaonaga amazint'hu ayo uko!’ "

29 "Mna miye nawagambagani, ‘Msekuyogoha mazint'hu ayo naho msekwingila chevu. 30 Zumbe Mnungu ywenyu mkumvika naawalongozeni, naho naawatowanileni, enga ivo mwaonaga ukwo Misili, 31 na ivo atendaga kwe dijangwa. Mwaonaga ivo awaguhagani mwo utafi wenyu wose mpaka mbula mwe isi ino, enga tati ya mnt'hu ivo akudaha akumguha mwanawe.’ " 32 Mna hamwenga na ayo yose adamanye hamumhuile Zumbe Mnungu ywenyu 33 awalongoele mwo utafi, nekilo kwa mkola wa moto kuwalagisa sila mkuunga mwombokele, nomsi kwa idyo divunde, vileke awazunguile hant'hu ho kukima mahema yenyu.

34 "Zumbe evaga zink'halalizi zenyu niyo afa maya. Akelisaga akagamba, 35 ‘Mwe cheleko iki cho uwihi hahali yeyose neengile mwe isi iyedi iyo nakelisaga kuwenk'ha wakale wenyu. 36 Ni kalebi mwana Yefune du neengile mwe isi iyo. Yehe kanda mhuwilwa kwangu, name nenimwink'he yehe ne vyeleko vakwe isi iyo aipelembe.’ 37 Naho Zumbe nakanifiila maya kwajili yenyu niyo anigamba, ‘Weye nawe iviyaiviya howingile mwe isi iyo. 38 Mna mwambizi ywako Yoshua mwana Nuni niye neengile umo. Mna umgele moyo yehe niye naawalongoze Waizilaeli mwo kuitaha isi iyo.’ "

39 "Naho Zumbe akigambaga suwe chose, ‘Wana wenyu wadodo heewekudaha kwazagula ayedi na yaihile nawo nawengile mwe isi, awadya nomkagamba nawatahigwe ni wank'hondo wenyu. Neni ink'hize isi kwawe naho neinde ukipe wawe. 40 Mna nyuwe hitukeni muuye kwedijangwa kuhinga kwe Bahali ya Shamu.’ "

41 "Akajika mwanigambaga, ‘Suwe kidamanya wavu kwa Zumbe Mnungu mna haluse nekiite kwe nk'hondo enga ivo Zumbe Mnungu ywetu ivo akisigiile.’ " Niyo kila yumwenga ywenyu akeika lumwe kwa nk'hondo mkafanyanya kugamba nevinde vihufu kuitaha isi ye vigulu.

42 "Mna Zumbe anigambaga, ‘Wakanye wasekugenda kutowana kwaviya miye heninde hamwenga nawo, nawahumwe ni wank'hondo wawe 43 Nawagambilagani ivo Zumbe alongaga, mna hamwivile. Kwa kukeduvya kwenyu nomsaguka na kukwela kwe isi ye vigulu. 44 Ivo Waamoli wandaga wakekala mwe isi ye vigulu waweziilagani enga matuluma ya nyuki wakawahiga. Wawakulumbuzani niyo wawatowani uko Homa mwe isi ya Seili mpaka Halimahi. 45 Ivo mwamwiilaga Zumbe awambizeni, mna hawategelezeni naho awaonagani hi kint'hu.’ "

46 "Naivo elo mwekalaga Kadeshi kwa lupisi lutali."