1 "Msekulava malavo ya ng'ombe hegu ngoto ina lema dyodyose kwa Zumbe Mnungu, kwaviya ayo yamwiihiza Zumbe."

2 "Mwadaha kwiva kugamba yumwenga ywenyu mwo mzi wenyu, mgosi hegu mvele kadamanya uwihi, na kubananga Indagano ya Zumbe Mnungu, 3 kwa kuidamanyila ndima na kuivika milungu mituhu, hegu zuwa hegu mwezi hegu nt'hondo, heviiligane ne sigilizi ya Zumbe. 4 Uneva nyuwe nanywe no mgambilwa ayo, nomkaule, uneva ni kindedi kint'hu iki kiihile kidamanywa mwe Izilaeli, 5 mlaveni kuse yo mzi mnt'hu uyo niyo mwamtowa maiwe mpaka abanike. 6 Hata ivo naakomwe uneva kuna uwona wa want'hu waidi hegu watatu. Asekukomwa uneva uwona ni wa mnt'hu yumwenga du. 7 Wadya waona wakonge woho kumtowa maiwe, akajika watimile watuhu. Ivo nivo nomuuse uwihi uno mwenyu."

8 "Yadahika masa yamwenga nayande madala kulamulwa aho he kaya yenyu enga via kukoma haheina kukambila, hegu kumlumiza mnt'hu mtuhu, na masa ya kugombela ugoli mwa want'hu. Igaleni masa ayo hant'hu hasagulwe ni Zumbe Mnungu, Mnungu ywenyu. 9 Nomwigale masa ayo kwa walavant'hambiko walawi na kwa mlamuzi we dizuwa idyo, woho nawo nawalamule masa ayo. 10 Ivo nawalamule aho hant'hu hasagulwe ni Zumbe. Unde na wengele kudamanya kila kint'hu wakuunga wakulangilize kukidamanya. 11 Neiwaunge mdamanye kutimila sigilizi nomwink'higwe no ulamuzi wakuulava kwenyu. Msekuleka kutimila usengelo wakuunga waulave. 12 Mnt'hu hekumwiva mlava nt'hambiko hegu mlamuzi aikigwe kumdamanyila ndima Zumbe Mnungu akomwe. Nivo nomuuse uwihi enga uno mwenyu. 13 Want'hu wose naweve na kogoha naho hahali mnt'hu naageze kudamanya wiihi enga uno naho."

14 "Aho mkeza kwingila mwe isi iyo Zumbe Mnungu naawenk'heni na kwikala, naywe niyo mwaona kugamba ni vedi kunda na seuta enga ivo zili isi nt'huhu ziwazungulukeni. 15 Mmanye kindedi kugamba mnt'hu mkumsagula kunda seuta niye asagulwe ni Zumbe. Vaungwa ande yumwenga ywa want'hu wenyu. Msekumsagula mta kwiza ande seuta ywenyu. 16 Hata ivo asekunda na Falasi nyingi kwaajili ya watowani wakwe, naho asekuwavuza want'hu uko Misili vileke andilise na Falasi nyingi, kwaviya Zumbe Mnungu kawakanya sema wanauye naho uko Misili. 17 Naho asekunda na wavele wengi, saivo moyo wakwe noihituke, naho asekunda na masawa mengi na zahabu nyingi. 18 Akanda kekaila difumbi dyo useuta vamuunga ande ne kitabu kiwandikwe zisigilizi izi zilaile kwa walava nt'hambiko wa Kilawi. 19 Naho naande ne kitabu icho na kukisoma mazuwa yose yo wikazi wakwe, vileke ahine kumogoha Zumbe Mnungu na kutimila sigilizi zakwe na malagizo yakwe kwa uhuilwa. 20 Uneva anatenda ivo, haakeone kunda ywedi kujink'ha wanduguze Waizilaeli, na kuleka kumwiva Zumbe na kutimila sigilizi zakwe kwa sila yoyose idya. Kwa ivo neekalise mwo useuta, yehe mwenye na welekwa wakwe mwe Izilaeli."