1 "Mtegeleze nyuwe Waizilaeli! Ivi dielo mwaunga mwomboke mto Yolodani mwingile kwa kuwaika want'hu wa isi nt'huhu mwo udahi wenyu. Isi nk'hulu zina udahi kujink'ha nyuwe, na mizi mikulu izengelwe magomela matali yakubula kwa mavunde, 2 want'hu wenye wana ludole naho watali, welekwa wa Waanaki enga ivo muwamanyize. Mwiva ivo ikulongwa, Niani akudaha kukimaala awahige Waanaki? 3 Elo mmanye dielo kugamba Zumbe Mnungu niye akuwalongoelani kulongole kwenyu enga moto ukoka pele. Naawahume na kuwakoma pele naho naawakinye mkawa sinya. Ivo nivo nomuwakulumbuze na kusunguza kuwakoma pele enga ivo Zumbe Mnungu alongile."

4 "Aho Zumbe Mnungu akeza kuwagulusa iivi mkawasinya msekufanyanya mwe myo yenyu kugamba uwagilwa wenyu nuwo ulekile Zumbe akawegalani mkaitahe isi ino, kumbeke nu wavu wa want'hu we ziisi izo nuwo ukuleka Zumbe awakulumbuze iivi ukawasinya. 5 Hiyo kwaviya wazumilwa ha Mnungu naho wadamanya uwagilwa vikuleka Zumbe akulekele uitahe isi yawe, bule. Naawaguluse kwaviya wadamanya yaihile naho Zumbe Mnungu kwaviya akumbukila Indagano aikaga na Ibulahimu na Isaka na Yakobo. 6 Ivo umanye kugamba Zumbe Mnungu ukumvika hakukwink'ha isi iyo iyedi vileke uitahe kwaviya uywedi, bule weye ywi mnt'hu mnk'hani."

7 "Usekujala ivo mwamtendaga Zumbe Mnungu ande na maya kudya kwe dijangwa. Kukongela kwe dizuwa diya mwalawaga Misili mpaka aha, mwasagukaga na kumhiga. 8 Hata kudya kwo mnima wa Sinai mwamtendaga Zumbe ande na maya, andilisaga na maya niyo aunga awakome pele. 9 Aho nize nikwele kwo mnima kuhokela vibesu va maiwe ivo viwandikwe Indagano iyo Zumbe Mnungu adamanyaga na nyuwe, na kwikala uko mazuwa milongo mine, kilo na msi, hidile nk'hande naho hinywele mazi. 10 Niyo Zumbe anink'ha vibesu viidi va maiwe viwandikwe kwa kadole kakwe Mnungu, nevinda viwandikwa mbuli zose izo Zumbe amigambileni uko kwo mnima kulawa mwo moto zuwa dya mdugano. 11 Ivo, mazuwa milongo mine yeze yomboke, kilo na msi, Zumbe anink'haga vibesu viidi va maiwe vawandikagwa Ndagano."

12 "Ivo Zumbe anigambaga, ‘Sunguza useele hasi yo mnima, kwaviya want'hu wako uwalavile Misili wasaguka. Wasunguza kuileka sila niwasigiile waitimile naho wakedamanyila hili dya kusana.’ "

13 "Zumbe Mnungu niyo anigamba, ‘Hiwakaula want'hu awa, ni want'hu wank'hani vitendese, 14 nileke niwabanange, vileke wase kukumbukilwa naho mwe isi, miye nohutende weye unde tate ywa si nk'hulu ina ludole kujink'ha woho.’ "

15 "Ivo, nahitukaga, na kuseela kulawa kwo mnima, handa hinula viya vibesu viidi va maiwe, moto nawo wandaga ukakweela kwo mnima. 16 Nehyehelwa na kuona kugamba mdamanya kale wavu kwa Zumbe Mnungu. mkukedamanyila hili dya ndama ya kusana, nomsunguza kuileka sila ya Zumbe Mnungu iyo amisigileeni. 17 Ivo navitozaga viya vibesu viidi na kuvitwant'hiza hasi na kuvitula iivi mkasinya. 18 Nafunamizaga mtwi hasi hant'hu ha kumvika Zumbe Mnungu enga aho nk'hongo, kwa mazuwa milongo mine kilo na msi, hidile nk'hande hegu kunywa mazi, kwajili yo wavu wenyu muutendile kwa kudamanya yaihile ha Zumbe Mnungu kwa kumuihiya. 19 Nogohesaga maya ya Zumbe mwa nyuwe hegu nakawakomani pele, mna Zumbe Mnungu anivaga mwo lupisi ulwo. 20 Naivo, Zumbe Mnungu nakamuonela maya vitendese Haluni, niyo aunga amkome, ivo nehimlombezela Haluni mwo lupisi uulwo. 21 Naho naguhaga kiya ikint'hu cho wavu mwadamanyaga, indama mwadamanyaga niyo nayoka mwo moto. Niyo naitula vibesubesu na aitigint'haga niyo yanda enga luvumbi. Luvumbi ulo naluduulaga mwa kazuto kaseelaga kulawa kwo mnima."

22 "Naho mwamtendaga Zumbe Mnungu ande na maya kudya Tabela na kudya Masa na kudya Kibloti Hataava. 23 Naho umwo Zumbe eze awatumeni kulawa Kadeshi Banea awagambagani mwiite mkaitahe isi idya huwenk'hani mna nyuwe hamwatimilaga sigilizi ya Zumbe Mnungu, hamumhuile naho hammwivile na kutimila ayo alongile. 24 Nyuwe msaguka kwa Zumbe kukongela aho nize niwamanyeni."

25 "Ivo Nafunamizaga mtwi hasi hant'hu ha kumvika Zumbe kwa mazuwa milongo mine kilo na msi, kwaviya Zumbe naakaunga awakomeni pele. 26 Naho namlombezaga Zumbe hagamba, ‘We Zumbe Mnungu usekuwakoma pele want'hu wako mwenye, awo want'hu wawakombolaga kwa ukulu wako, na kuwalava Misili kwa ludole lwako lukulu. 27 Wakumbukile wandima wako, Ibulahimu, Isaka na Yakobo. Use kukaulisa zink'hani na wiihi na wavu wa want'hu wa Izilaeli. 28 Chaivo Wamisili nawagambe hwadahile kuwegala want'hu wako kwe isi idya wagambile nouwenk'he. Naho nawagambe kuwegala want'hu wako kwe dijangwa ukawakome kwaviya kuwaihia. 29 Mna awa ni want'hu wako ukipe wako uwalavile Misili kwa ludole lukulu na udahi.’ "