1 "Zumbe Mnungu ywenyu naawegaleni kwe isi idya ikuunga inde yenyu, naawaguluse want'hu wa si nyingi nk'hulu zina ludole kujink'ha nyuwe, awo Wahiti na Wagiligashi, Waamoli na Wakanaani, Wapelizi na Wahivi na Wayebusi. 2 Umwo Zumbe Mnungu akeza kuwatenda mnde na ludole na kuwahuma vaungwa muwakome wose. Mse kunda na mwivano nawo na kuwaonela mbazi. 3 Msekulombelana naho msekuloza wana kike hegu kuwaloza wana kilume kwawe, 4 kwaviya nawawalongoze wana wenyu wasaguke kwa Zumbe niyo wavika milungu mituhu. Niho maya ya Zumbe nayawakip'hukileni nanywe namsunguze kukomwa pele. 5 Haluse ivi nivo nomuwatendele. Nommole vilingo vawe vo kulavila nt'hambiko, na katula mikola yawe vibesubesu na kumola mahili yawe ya Ashela, no kuyoka mahili yawe ya kusongola. 6 Kwaviya nyuwe mwi want'hu wa Zumbe Mnungu. Yehe kawasagulani nyuwe mnde want'hu wakwe kujink'ha want'hu wose we mwe isi."

7 "Zumbe Mnungu hiyo kugamba kawaungani na kuwasagulani kwaviya nomndilisa wengi mwe si kujink'ha want'hu watuhu, nyuwe mwandilisaga wageke kujink'ha want'hu wose mwe si. 8 Mna Zumbe awaungagani naho aungaga kukint'hiza Ndagano aikaga na wakale wenyu. Ivo nivo valekile awayokolagani na kuwakombola mwo utumwa kulawa kwa Seuta ywa Misili kwa udahi mkulu. 9 Ivo mmanye kugamba, Zumbe Mnungu ywenyu ni Mnungu mhuilwa, akukint'hiza Ndagano yo lukunde kwa maalufu ye vyeleko va want'hu wakumuunga no kutoza zisigilizi zakwe, 10 mna haaleke kuwasulumiza wakumwiihia. 11 Ivo elo damanyeni yandya yose mhinizwe, ziiveni na kuzidamanya zisigilizi zose huwagambilani dielo."

12 "Uneva mnategeleza zisigilizi izi niyo wazitimila kwa uhuilwa niho Zumbe Mnungu nagendeele kukint'hiza Indagano yakwe iyo adamanye na nyuwe naalagise lukunde lwakwe kwenyu enga ivo aikaga kilapi kwa wakale wenyu. 13 Naawaungeni niyo awavikilani vileke mgenyele na kweleka wana wengi, naavikile zink'honde zenyu zinde na ulozo wa nk'hande na divai na mavuta ya zeituni, naho naawavikileni mnde na ng'ombe na ngoto na mbuzi nyingi. Naawavikileni mwa aya yose mwe isi awaikilaga kilapi wakale wenyu kugamba naawenk'heni. 14 Nyuwe nomvikilwe kujink'ha want'hu wose mwe si. Hokunde na mgosi hegu mvele naande mgumba, naho hakunde na ludimo lwenyu lwolwose lukuunga lunde nt'hasa. 15 Zumbe naawamileni na maine yoyose. Naho haalekele maine yaihile mwayaonaga kudya Misili yaweziileni. Naayalekele maine ayo yaihile yaweziile wank'honido wenyu. 16 Wakomeni want'hu wa isi zose. Mnungu kawenk'ha udahi wakuwahuma naho mse kuwaonela mbazi. Naho msekuivika milungu yawe kwaviya iyo nainde lwinika kwenyu."

17 "Naho msekukegamba mwe mioyo yenyu want'hu awa wana ludole kujink'ha suwe, hekidahe kuwalava mwe isi ino. 18 Mse kuwogoha, kumbukileni vedi ivo Zumbe Mnungu ywenyu amtendaga Falao na Wamisili wose. 19 Kumbukileni makunt'ho yakutisa yadya mwakeonelaga wenye, na mitu na ya kweheela na udahi mkulu na ludole kwa ivo Zumbe Mnungu awakombolagani. Enga ivo awakomaga pele Wamisili, naawakome pele awo want'hu mkuwogoha. 20 Naho Zumbe Mnungu naatende wogohi mgati mwao naawabanange pele wadya wakukefisa. 21 Ivo want'hu awa wase kuwatisani kwaviya Zumbe Mnungu uyo mnanaye ni Mnungu mkulu ywa . 22 Zumbe Mnungu naawaguluse kwenyu want'hu we isi izi aho mkwingila. Haawabanange wose kwa lupisi lumwenga, chaivo makala mbago nayagenyele niyo yawagelani nk'huswank'huswa. 23 Zumbe Mnungu naawatende mnde na ludole kujink'ha wank'hondo wenyu vileke waganike mpaka wakomigwe pele. 24 Naawatendeni mnde na ludole kujink'ha maseuta wawe. Nomuwakome wose niyo wajaligwa. Hahali naawahigeni. 25 Nomuyoke moto mahili yawe. Mse kumunk'hilwa ni masawa hegu zahabu yawe niyo mwaziguha, msekuziguha sema inande lwinika kwenyu kwaviya Zumbe awihiya uhabwasi. 26 Msekuguha mahili aya na kuyegala kwe zikaya zenyu kwaviya nomligitwe enga mahili ayo. Msekuyaunga naho myabele kwaviya yaligitwa ni Zumbe "