1 "Kumbukileni dizuwa dye kinyemi dye Pasaka mwezi wa Abihu na kumtunya Zumbe Mnungu. Kwaviya mwo mwezi wa Abihu, niho awayokolagani kulawa Misili nekilo. 2 Nomlave malavo ya Pasaka kulawa mwe mifugwa yenyu ya ngoto hegu ng'ombe na mbuzi kwa kumtunya Zumbe Mnungu hant'hu hamwenga ha kumvika. 3 Msekudya malavo ayo na mikate igeligwe ugwadu, nayo ni mikate ya makunt'ho, kwaviya nomsunguza kulawa Misili. Kwa mazuwa yose nomwikale mkakumbukila dizuwa diya mlawile Misili uko mwandile mkasulumila. 4 Kwa mazuwa mfungate mnt'hu yeyose asekugela ugwadu isi yakwe na mwe kaya yakwe, na nyama ya udya mfugwa uchinjigwe kisingi ye dizuwa dya nk'hongo isekusigala mpaka mtondo."

5 "Msekulava malavo ya Pasaka mwo mzi wowose udya Mnungu naawenk'heni. 6 Vituhu vakwe nomwilavile hadya Zumbe Mnungu ahasagule hande hant'hu ha kumvika. Aho niho nomlave malavo ya Pasaka, umwo kisingi zuwa dikaswa mwo lupisi uludya mwahalawaga Misili. 7 Iyo inyama nomuitipwilise na kuidya hant'hu aho Zumbe Mnungu naahasagule, naho mtondo wakwe nomhituke na kuuya mwa mahema yenyu. 8 Kwa mazuwa mtandatu nomdye mikate heigeligwe ugwadu, naho mwe dizuwa dya mfungate nahande na mdugano mkulu wa kumvika Zumbe Mnungu, msekudamanya ndima yeyose mwe dizuwa idyo."

9 "Nomuwaze mazuwa mfungate, naho nomkonge kuwaza kukongela aho nomwize mvune, 10 nomdamanye kinyemi cha mazuwa kwa kumtunya Zumbe Mnungu, Mnungu ywenyu, kwa kulava malavo ya kuunga mwenye, nomuyalave ivo Mnungu akuwavikilani. 11 Nomwinde na kinyemi hant'hu asagulwe kumvika Zumbe Mnungu, nyuwe hamwenga na wana wenyu na wandima wenyu Walawi na wata kwiza na wana nk'hiwa na wafiilwe ni wagosiwe awo wakwikala na nyuwe. Damanyeni aya hant'hu aho hasagulwe ni Mnungu. 12 Mkumbukile kugamba, mwandaga watumwa kudya Misili, ivo mnde na wengele kutimila sigilizi izi."

13 "Umwo mkajika kuvuna nk'hande yenyu na kuminya zizabibu zenyu, damanyeni zuwa dye kinyemi dye viheha kwa mazuwa mfungate. 14 Zuwa idyo dya mfungate nomdamanye kinyemi, nyuwe na wana wenyu wa kilume na wa kivele, na wandima wenyu Walawi na wata kwiza na yatima na wafiilwe ni wagosiwe awo wakwikala mwe mizi yenyu. 15 Kwa mazuwa mfungate na zuwa dya kinyemi kwa Zumbe Mnungu aho hant'hu ha kumvika. Kwaviya Zumbe Mnungu ywenyu naawavikileni mwo uvuni wenyu na mwe zindima zenyu zose mkudamanya naho kinyemi chenyu nekinde kikint'ha."

16 "Wagosi wose wa Izilaeli naweze ha Zumbe Mnungu nk'hanana nt'hatu kila mwaka, aho ho kuvikila. Mwo lupisi lwe kinyemi che mikate heigeligwe ugwadu, na kinyemi cho uvuni na kinyemi che viheha. Kila mnt'hu neegale malavo yakwe, 17 enga ivo naadahe viligane naivo Zumbe Mnungu akuvikile."

18 "Nomsagule walamuzi na wakulu kulawa mwa makabila yenyu mwe mizi yenyu iyo Zumbe Mnungu naawenk'heni. Awo nawo nawalave ulamuzi wa uwagilwa mwa want'hu. 19 Msekwazaganya ikindedi, naho msekwazagula naho msekuzumila kuhokela kint'hu chochose kikutenda mlamuzi mta umanyi asekulamula kwa uwagilwa. 20 Nomuwasengele want'hu kwa kutimila ikindedi, vileke mdahe kwikala na kwiikaila isi iyo Zumbe Mnungu akuwenk'hani."

21 "Umwo mkazenga kilingo kwajili ya Zumbe Mnungu mse kukimalisa mkola wa hili disongolwe dya ziti dya mnungu Ashela. 22 Naho msekukimalisa mkola wa maiwe akuwiihiya Zumbe Mnungu."