1 "Uneva kunalaila mwenyu mlotezi hegu mtapita sozi niyo alagisa vilagiso na va kweheela, 2 vileke awalongozeni mkavike milungu mituhu hayamanyike hata kwa wakale wenyu, naho hata uneva vilagiso va kweheela alongile valaila, 3 msekutegeleza zimbuli za mlotezi uyo hegu sozi za uyo alotile. Kwaviya Zumbe Mnungu naande awagezani akaule uneva mwamuunga Zumbe Mnungu kwa mioyo yenyu yose na kwo unt'hu wenyu wose. 4 Mtimileni Zumbe Mnungu na kumwogoha, nuyo ywo kumwiva na kumtimila. Mvikeni yehe naho mnde wahuilwa kwakwe. 5 Uyo mlotezi na walota sozi wakomwe kwaviya kawahiniza want'hu wasaguke kwa Zumbe Mnungu. Zumbe awalavileni kwe isi ya Misili na kuwakombolani kulawa kwe isi iyo mwandaga watumwa. Kwaviya uyo kageza kuwausani mwe sila iyo Zumbe Mnungu awasigiileni muitimile. Ivo nivo nouuse wiihi kulawa mwenyu."

6 "Hata uneva ni nduguyo ywa hagihi, hegu mwanao ywa kilume hegu ywa kike hegu mkazio ukumuungisa, hegu mbuyayo ywa hagihi. Uneva analonga na weye kwa kinyele niyo akugamba mkavike milungu mituhu, milungu iyo wakale wenyu nazuwa hawaivikaga, 7 milungu ya want'hu ikuzunguluke, ikanda hale hegu hagihi na weye, kulawa kwo lumbili lumwenga lwe isi kuita lutuhu, 8 msekumzumila hegu kumtegeleza. Msekumuonela mbazi naho usekumwamila. 9 Mkomeni mnt'hu uyo! Naho weye unde ywa nk'hongo kumtowa maiwe, niho want'hu watuhu watimile. 10 Mtoweni maiwe Mnt'hu uyo abanike! Ageza kuwazaganyani mumleke Zumbe Mnungu uyo awalavileni Misili uko mwandaga watumwa. 11 Uneva mnawakoma want'hu awo, want'hu wose wa Izilaeli naweve icho kilaile niyo wogoha, hokunde na yeyose naadamanye wiihi enga uwo."

12 "Mkekala mwe mizi iyo Zumbe Mnungu akuwenk'hani mwadaha kwiva 13 kugamba wamt'hu waihile mwenyu wawazaganya want'hu we mizi yawe vileke wavike milungu hemwa ivikaga uko nk'hongo. 14 Unaiva seselo iyo niho nawe nouuze na kupelemba. Uneva inanda ni kindedi kugamba uihi uwo noulaila, 15 wakomeni pele want'hu wo mzi uwo ne mifugwa yawe. Ubanange pele mzi uwo. 16 Viduganyileni ho lwazo lwo mzi ivint'hu vawe vose. Akajika muwoke mzi ne vint'hu vose kunda malavo yo kokwa pele akulavilwa Zumbe Mnungu. Mzi uwo nounde mank'halank'hala mazuwa yose, naho houzengwe vituhu. 17 Mse kuguha kint'hu chochose kinde chenyu mwe ivi vint'hu visengelwe kubanagwa, vileke Zumbe ahitule maya yakwe yatendese awaoneleni mbazi. Naawagenyezeni viligane ne Ndagano aikaga kwa wakale wenyu, 18 uneva du nomwive ayo alongile Zumbe Mnungu na kudamanya yakumwelela."