1 "Uneva unamwiva na kumtimila kwa wengele Zumbe Mnungu na kutenda viligane ne zisigilizi zakwe zose izo hukwink'ha dielo, naawatunyiseni kujink'ha si zose za mwe isi. 2 Uvikilwa uno wose noukwizile uneva unatenda ivo akuunga Zumbe Mnungu."

3 "Nouvikilwe, mwe mizi na kwe zink'honde zako."

4 "Zumbe naakuvikile kwa kukwink'ha wana wengi na ulozo mwingi na ng'ombe nyingi na ngoto."

5 "Zumbe naakuvikile mwo ulozo wako na vint'hu vako va kwambikila nk'hande."

6 "Zumbe naakuvikile mwe zindima zako zose izo ukudamanya."

7 "Zumbe naawatowe wank'hondo wakukwiziila, nawakukump'hukile kwa sila imwenga mna nawakunyilike kwa sila mfungate."

8 "Zumbe naavikile magulu yako na kila mwe ndima ukudamanya. Naakuvikile mwe isi akukwink'ha."

9 "Zumbe naawatende mnde want'hu wakwe wakukile enga ivo alongile kwa kuika kilapi, uneva mnaziva na kutimila sigilizi zakwe Zumbe Mnungu na kwikala kwa kutimila sila zakwe. 10 Niho want'hu wose mwe si zose nawaone kugamba msagulwa ni Zumbe kunda want'hu wakwe, naho want'hu awo nawawogoheni. 11 Zumbe naawenk'heni wana wengi na mifugwa mingi na ulozo we isi awagambaga wakale wenyu kugamba naawenk'heni. 12 Zumbe naawakomwoele kindolo chakwe chedi kulawa kwe mbingu, naawenk'heni fula ye isi yako kwe misimo yakwe. Naawavikileni mwe zindima zenyu zose, naho nomkopeshe si nyingi mna nyuwe homkope. 13 Zumbe Mnungu naakuike kunda kilongozi mwe si zose naho hiyo ywa kuzigiila, nounde mpati naho houdunduge uneva noumwive na kutimila kwa uhuwilwa zisigilizi zakwe izo hukukusigiila ivi dielo. 14 Mna kauliseni msekuleka kutimila zisigilizi yoyose mwe izi hukwink'ha dielo niyo watimila milungu mituhu na kuidamanyila ndima."

15 "Mna uneva hunamwivile Zumbe Mnungu naho hunatimile kwa uhuilwa zisigilizi zakwe zose ne miko yakwe hukwink'ha dielo, mbuli izi zose ziihile nayakutimile."

16 "Nouligitwe mwe mizi na kwe zink'honde zako."

17 "Nouligitwe mwo uvuni wako, ne vint'hu vako va kwambikila nk'hande."

18 " Nouligitwe kwa kuswesa wana wengi na ulozo mgeke na mifugwa migeke."

19 "Nouligitwe mwe kila ndima noudamanye."

20 "Uneva unadamanya uwihi na kumlemela Zumbe, naakwigaile mavuma, kiyangayanga, na kuswesa kunda na ulamuzi mwe kila ndima noudamanye, mpaka msunguze kukomigwa pele. 21 Zumbe nakwigaile maine yakutisa mpaka yawabindeni pele mwe isi iyo mkuunga muitahe. 22 Zumbe naawatoweni na maine ya kululumka, naho hokunde na fula naho nokunde na nk'hung'unt'ho ikukoma pele vihandwa vako. Mavuma aya naya wakulumbuzeni mpaka viwakukomeni pele. 23 Hokunde na fula naho sanga yako neitoge enga kilama. 24 Zumbe hant'hu ha kukwigaila fula naakuselezele heho duna luvumbi na msanga mpaka ukomwe pele."

25 "Zumbe naakutende uhumwe ha wank'hondo wako. Nouwabase kwa sila imwenga, mna nouwanyilike kwa sila mfungate. Want'hu wa si nt'huhu mwe si zose wakawakaulani na kuona ayo yawabwiileni nawogohese. 26 Ukeza kubanika, kimba chako nekidigwe ni madege na makewe ya mwe isi, naho hokunde na yeyose naaya guluse. 27 Zumbe naakugele maihu yakutumbuka na kunyegela enga yadya yawapataga Wamisili na nk'hwenge za kundani na uhele na kunyegelwa ivo heviikuhona. 28 Zumbe naakugele kilalu na unt'hunt'hu na kwazaganywa. 29 Nougende kwa kubabasa babasa nomsi enga nt'hunt'hu. Huna icho noupate mwe zindima zako zose, naho nouheele kunyanyagalwa na kuhokigwa zuwa kwa zuwa, hokunde na yeyose ywa kukugombela."

30 "Noutumize mvele ywa kulomba mna naagende na mgosi mtuhu. Nouzenge nyumba mna houikale, naho nouhande zabibu mna houyabwede matunda yakwe. 31 Ng'ombe zako nezichinjigwe iivi ukakaula inyama nayo houidye weye, nouhokigwe zimp'hunda zako kwa ukwank'hwalu naho hezivuzigwe, ngoto zako nezink'hizwe kwa wank'hondo wako nawe houone ywa kukuwambiza. 32 Wanawo nawenk'hizwe kwa want'hu watuhu na kunda watumwa iivi ukasinya, nawe noukont'hole meso ukawakaula uko weli mna hawauye kwako. 33 Si hwiimanyize neiguhe ulozo wako ukombatize kuudamanyila ndima kwa udala, nawe nounyanyagalwe na kusulumizwa mazuwa yose. 34 Nounde enga mkilalu kwa mbuli nouzione. 35 Zumbe naakugele maihu yakulumisa heyekuhona mwa mavindi na mwe vijumbulu vako, nayakuvalame kulawa kwo lwayo mpaka kwo mtwi."

36 "Zumbe naawegaleni nyuwe hamwenga na seuta ywenyu kwe isi hemwiimanyize, weye hegu wakale wako, uko nomvike milungu mituhu ya maziti na maiwe. 37 Want'hu nawawaoneni kinyala, na kuwagelani visimo, na kuwatendani zina dya lubezo mwe si zose izo Zumbe naawa mwaganiseni."

38 "Nouhande mbeyu nyingi mna nouvune ulozo mgeke kwaviya ngeda nezidye vihandwa vako. 39 Nouhande zabibu na kuikaula vedi mna houvune zabibu zakwe hegu kunywa idivai yakwe, kwaviya zabibu neidigwe ni vidudu. 40 Mizeituni neikule kila hant'hu mwe isi yako mna hounde na mavuta yakwe kwaviya zeituni nezihuluke. 41 Noweleke wana wakike na wa kilume mna houwalele kwaviya nawatahigwe. 42 Maziti yako yose ne vihandwa vako nevidigwe ni sige."

43 "Watakwiza wakwikala mwe isi yenyu nawagendeele na kunda na upati na ludole mna weye nouhunguke nokunda mkiwa naho hwiina ludole. 44 Nawakukopeshe mna weye houwa kopeshe. Naho kwo uheelo nawakulongoze."

45 "Mavuma aya yose nayeze kwako nayakutimile niyo yakupata mpaka ubanike pele kwaviya hutegeleze ayo akulonga Zumbe Mnungu ywako uyo na kutimilisa sigilizi zakwe ne miko yakwe izo akwink'hile. 46 Neinde ni kilagiso cho usengelo wa Mnungu kwako na welekwa wako mazuwa yose, 47 kwaviya Zumbe akuvikilaga weye kwa sila zose mna weye humudamanyile ndima kwa moyo wa kinyemi na kumgamba nivedi kwajili yo uwingi udya we vint'hu vose. 48 Ivo elo nouwadamanyile ndima wank'hondo wakuungwa wegalwe kwako ni Zumbe. Naho nowikale mwo ukiwa haheina nkh'ande, na mazi yo kunywa na suke zo kuvala. Wank'hondo wenyu nawawasulumizeni kwa luhahila mpaka ukomwe pele. 49 Zumbe naakwigaile isi kulawa hale kwo uheelo we isi, si hwiimanyize hata ulosi wawe neikukime kulawa kulanga enga kasoka, 50 na wande na luhahila, hawalagise mbazi kwa yeyose akanda mdodo hegu mkulu. 51 Nawadye mifugwa yenyu no ulozo wenyu nanywe nomgwe mteho mpaka mbanike. Hawamwasileni nk'hande hegu divai hegu mavuta ya zeituni hegu mifugwa yenyu mpaka aho nombanike pele. 52 Nawawazungulukeni na kuwakindila mwe mizi yako yose mwe isi ukwink'higwa ni Zumbe Mnungu, mpaka aho nawamole magomela yako matali ayo uyahuwile."

53 "Mwo lupisi ulo lwo kukindilwa nokunde na gumbo, niho noudye wanao mwenye wink'higwe ni Zumbe Mnungu umwo mkanda mwasulumizwa ni wank'hondo wenyu. 54 Hata mnt'hu mta nt'hogola naho mkombaganyi naande mgila kwa wanduguze na kwa mkaziwe ambwedile, hata kwa wanawe wasigalanye. 55 Haampangile yeyose inyama ya wanawe wakuunga wadye kwaviya homsigailwe ni kint'hu mwo kuuzungulukwa na kusulumizwa ni wank'hondo mwe mizi yenyu yose. 56 Hata mvele mta nt'hogola naho mgoli naande iivo. Heelelwe kumuoana mgosiwe ambwedile na wanawe mwenye. 57 Umwo mzi wakwe ukeza kunda ukindilwa naandilise na gumbo naho kwa kinyele naadye nyama ya katiti kakwe Naadye katiti kakwe ne beleko dyakwe naho naamnyime mgosiwe hata na wanawe."

58 "Uneva hunatimile mbuli izi zose ze miko kwa wengele, izi ziwandikwe mwe kitabu iki naho hamna ditunyile dizina dina ung'azi na dyakweheelesa na kutisa dya Zumbe Mnungu, 59 naawegaileni maine na mavuma nyuwe na welekwa wenyu, maine yana luhahila naho ya lupisi lutali yahile naho heyekuhona. 60 Naawegaileni maine yose mwayaonaga Misili yadya yawatisagani nayo nayawatimileni mazuwa yose. 61 Iviaivia Zumbe neegale maine ye hengi na mavuma heyewandikwe mwe kitabu iki che miko mpaka mkomigwe pele. 62 Hamwenga no wingi wenyu enga nt'hondo zo ulanga nomsigale wageke kwaviya hamwivile na kumtimila Zumbe Mnungu. 63 Enga ivo vamwelele Zumbe kuwadamanyilani ayedi na kuwatendani mgenyele, iivo neelelwe kuwazaganyani na kuwakomani pele. Nomkwipulwe mwe isi mkugenda kuitaha inde yenyu."

64 "Zumbe Mnungu naawamwaganiseni mwe isi zose, kulawa uheelo umwenga we si mpaka uheelo mtuhu. Uko nomvike milungu mituhu ya maziti na ya maiwe iyo heyamanyikaga kwenyu nyuwe na kwa wakale wenyu. 65 Houwone utondowazi hant'hu hohose, naho houdahe kuhumula mwe si izo. Zumbe naakwink'he wogofi naho nouswese kinyemi na kwingila chevu. 66 Lupisi lwose nounde na wogohi wa kukomwa ni want'hu. Kilo na msi nowogohese naho houmanye kugamba nounde mgima hegu bule. 67 Moyo wako noutunt'he kwa wogohi kwa kila kint'hu noukione. Kukanda mtondo nouunge kunde kisingi, naho kukanda kisingi nouunge kunde mtondo. 68 Zumbe naakuvuze naho Misili mwe mitumbwi mwo utafi nakelisaga kugamba howize uugende naho. Ukwo noukelave weye mweye uketage kwa wank'hondo wako unde mtumwa mgosi hegu mtumwa mvele, mna hokunde na yeyose naaunge kukugula."