1 Uno nuwo uvikilo uwo Musa, mnt'hu ywa Mnungu, aulongaga kwa Waizilaeli umwo andaga akei kubanika.

2 Zumbe alawaga kwo Mnima wa Sinai,

atont'homokaga enga zuwa kulanga yo mnima Seili

awazangazilaga want'hu wakwe kulawa kwo mnima wa Palani.

Andaga hamwenga na fyo dya watumigwa wa kwe mbingu wakukile na moto ukwaka mwo mkono wakwe wa kulume.

3 Zumbe awaunga want'hu wakwe,

no kuwamila awakwe

ivo elo chafika madi he viga vakwe

no kutimila yadya akusigiila.

4 Musa akisigiilaga kitimile umwiko

nuwo ugoli wetu suwe want'hu wa Izilaeli.

5 Zumbe Mnungu kanda seuta ywa want'hu wa Waizilaeli

umwo makabila yawe ne vilongozi wawe waduganaga hamwenga.

6 Mwe dikabila dya Lubeni Musa agambaga,

"Lubeni asekubanika,

Naho want'hu wakwe wase kunda wageke."

7 Mwe dikabila dya Yuda, Musa agambaga,

"Weye Zumbe utegeleze lukunga lwe dikabila dya Yuda wakalombeza wambizi,

uwalunganye naho na makabila matuhu.

Uwatowanile weye Zumbe

Uwambize vileke wawahume wank'hondo wawe."

8 Aya nayo alongaga mwe dikabila dya Lawi,

"Tumimu yako ne Ulimu yako nokumwink'ha yudya andile mhuilwa kwako.

nokumgeza uko Masa

Niyo wahigana naye uko kwa mazi ya Meliba.

9 Walagisaga uhuilwa we kindedi kwako,

kujink'ha kwa welesi wawe na wandugu zawe na wana wawe.

Wazivaga na kuzitimila sigilizi zako

Naho wandaga wahuilwa kwe Ndagano yako.

10 Nawawahinize want'hu wako kwiva malagizo yako na kuzitimila sigilizi zako.

Nawalave nt'hambiko he kilingo chako cho kulavila nt'hambiko.

11 Uwambize want'hu we isi yako wande na ludole.

Welelwe mwe yadya wakudamanya.

Uvibogojole vigudi va wank'hondo wawe wose,

na awo wakumwiihiya wasekwinuka naho."

12 Aya nayo alongaga mwe dikabila dya Benjamini,

"Want'hu we dikabila idi nawo wakuungiswa ni Zumbe naho awamila.

Zumbe adyamila msi wose,

Naho yudya Zumbe amuungise naamwiike he chaha na kumkaulisa."

13 Aya nayo alongaga mwe dikabila dya Yusufu,

"Zumbe aivikile isi yawe indilise na fula

Naho inde na nc'hoko za mazi.

14 Isi yawe ivikilwe kunda na matunda yaivizwe vedi ne dizuwa.

Na matunda yedi ya kila msimo.

15 Na kwa vint'hu vedi ve milima ya kale na ulozo wa vigulu heviina uheelo.

16 Isi yakwe imeme vint'hu vose ivedi,

ivikilwe nu uwedi wa Zumbe,

uyo alongaga kulawa mwa kasaka kakweelaga moto,

uvikilwa uno umwiziile Yusufu

kwaviya nakanda kilongozi mwa wanduguze.

17 Yusufu ana ludole enga lwa jeku,

mahembe yakwe enga ya jeku dya mbogo,

Ifulaimu naande ni ayo mahembe alufu mlongo.

Manase ana mahembe maalufu."

Kwa mahembe ayo naazisukumizile si zose mpaka kwo uheelo we isi.

18 Naho mwa makabila ya Zabuloni na Isakali agambaga,

"Nawande wapati mwo uchuuzi wawe,

Naho ugoli wa Isakali ugenyele mwa mahema yako.

19 Nawawalalike want'hu weze kwe milima yawe,

uko nawakalave nt'hambiko za uwagilwa.

Kwaviya wapata ugoli wawe kulawa kwe bahali,

kulawa mwe sanga ya mp'wani."

20 Mwe dikabila dya Gadi agambaga,

"Atogolwe Mnungu uyo aikuzile mihaka ye isi yawe.

Yehe avemela enga simba,

vileke afunch'e mkono no mtwi.

21 Nasagulaga hant'hu hana ulozo kujink'ha hose.

Upasi we vilongozi wenk'hagwa woho

Wevaga na kuzitimilaga sigilizi ne miko ya Zumbe.

Umwo vilongozi wa Waizilaeli waduganaga hamwenga."

22 Mwe dikabila dya Dani agambaga,

"Dani ni enga bwanga dya simba,

Akupiilika kulawa Bashani."

23 Mwe dikabila dya Nafutali agambaga,

"Nafutali kamema uwedi wa Zumbe,

Isi yakwe ibula mpaka Kwa mwenye mzi ye diziwa dya Galilaya."

24 Kwe dikabila dya Asheli agambaga,

"Asheli avikiliswe kujink'ha wana wose wa Yakobo,

Naaungiswe ni wanduguze wose,

Naho isi yakwe ilozoke mavuta ya zeituni.

25 Mizi yakwe ikindilwe ni nk'hili za vilama ne shaba.

Naho mazuwa yose ekale kwa utondowazi."

26 Musa abindiliza kwa kugamba, nyuwe Izilaeli hakuli Mnungu enga Mnungu ywenyu

Yehe alawa kwe mbingu vileke achambize

Naye alawa kwe mbingu no ung'azi wakwe.

27 Mnungu ywa mazuwa yose niye unyilikilo wenyu.

Naho ludole lwakwe ni kawiilo dyenyu hediina uheelo,

awagulusaga wank'hondo wako umwo wandaga ukeza,

niyo akugamba uwakome wose pele.

28 Ivo Waizilaeli nawekale kwa utondowazi,

kwa utondowazi mwe isi imemile nk'hande na divai

uko umnyuzu wa kwe mbingu ukomela isanga.

29 Nyuwe want'hu wa Izilaeli mna kinyemi.

Niani akuunga aliganywe na nyuwe,

fyo kulu dya want'hu wayokolwe ni Zumbe.

Zumbe niye nk'hindo yenyu naho niye isime yenyu,

akuwamila na kuwenk'hani uhumi

wank'hondo wenyu naweze wakaunga utondowazi,

nanywe nomuwajatangizile.