1 Musa ne vilongozi wa Izilaeli wawagambaga want'hu, "Mwive na kutimila zisigilizi izi huwenk'hani ivi dielo. 2 Aho mnomboka mto wa Yolodani na kwingila mwe isi iyo mkwink'higwa ni Zumbe Mnungu, no mkimalise maiwe makulu niyo mwayakiziga. 3 Nomuwandike mnanga mwa maiwe ayo, sigilizi ino umwo mkeza kunda mwomboka na kwingila mwe isi. Iyo isi mkwink'higwa ni Zumbe Mnungu ywenyu. Ni isi ina ulozo na ugoli. Isi iyo Zumbe Mnungu ywa wakale wenyu agambaga naawenk'heni. 4 Umo mkeza komboka mto Yolodani nomkimalise maiwe mwo Mnima wa Ebali niyo mwayakiziga enga ivo huwasigiizani dielo. 5 Hant'hu aho nomumzengele Zumbe Mnungu kilingo cha kutambikila. Mzenge kwa maiwe heyesongolwe kwa kilama. 6 Heye, kila kilingo ukumzengela kwahohose hokumlavila nt'hambiko Zumbe Mnungu nouhzenge kwa maiwe heyesongolwe. Aho naho noulavile malavo yako yo kokwa. 7 Ulave malavo yo utondowazi aaho, mdye na kunda na kinyemi aho akuvikilwa Zumbe Mnungu ywenyu. 8 Akajika uwandike vedi zimbuli izi zose ze miko mwa maiwe ayo muyakizige."

9 Musa na Walawi walavant'hambiko niyo wawagamba Waizilaeli, "Hake nyamaleni, nyuwe want'hu wa Izilaeli naho tegelezeni! Dielo ivi mnda want'hu wa Zumbe Mnungu. 10 Ivo elo mwive na kutimila zisigilizi zakwe ne miko yakwe humwink'hani."

11 Mwe dizuwa iidyo Musa alongaga na want'hu wa Izilaeli akawagamba, 12 "Mnomboka mto Yolodani, want'hu wa kabila dya Simioni na Lawi na Yuda na Isakali na Yusufu na Benjamini nawakimale kwo mnima wa Gelizimu vileke wawavikile awant'hu. 13 Naho makabila ya Lubeni na Gadi na Asheli na Zabuloni na Dani na Nafutali awa nawo nawakimale kwo mnima wa Ebali kwa ndima ya kuligita. 14 Akajika Walawi nawawasomele Waizilaeli wose amaligito ayo yose kwa izwi kulu wakagamba."

15 " ‘Kaligitwa mnt'hu yeyose akusongola hegu kusana hili dya maiwe hegu maziti hegu ya kilama niyo adivika kwa kinyele. Zumbe aihizwa na wadya wakuvika mahili.’ "

"Want'hu wose nawo wagambe, Taile."

16 " ‘Kaligitwa mnt'hu yeyose akumbela ise hegu nine.’ "

"Want'hu wose nawo wagambe, Taile."

17 " ‘Kaligitwa mnt'hu yeyose akusogeza vilagiso ve mihaka aho wahakanilane na miyawe.’ "

"Want'hu wose nawo wagambe, Taile."

18 " ‘Kaligitwa mnt'hu yeyose akumzaganya nt'hunt'hu mwe sila.’ "

"Want'hu wose nawo wagambe, Taile."

19 " ‘Kaligitwa yeyose akwazaganya uwagilwa wa mtakwiza na mwanank'hiwa na mvele anabikilwe ni mgosiwe.’ "

"Want'hu wose nawo wagambe, Taile."

20 " ‘Kaligitwa mnt'hu yeyose akugenda na yeyose mwa wakaza ise kwaviya hamogohe ise.’ "

"Want'hu wose nawo wagambe, Taile."

21 " ‘Kaligitwa mnt'hu yeyose naagende na kala.’ "

"Want'hu wose nawo wagambe, Taile."

22 " ‘Kaligitwa mnt'hu yeyose akugenda na lumbudye mwana ise hegu mwana nine.’ "

"Want'hu wose nawo wagambe, Taile."

23 " ‘Kaligitwa mnt'hu yeyose akugenda na nine mdodo.’ "

"Want'hu wose nawo wagambe, Taile."

24 " ‘Kaligitwa yeyose akumkoma miyawe kwa kinyele.’ "

"Want'hu wose nawo wagambe, Taile."

25 " ‘Kaligitwa yeyose akuhokela maliho ya kumkoma mnt'hu heena lema.’ "

"Want'hu wose nawo wagambe, Taile."

26 " ‘Kaligitwa yeyose heekwiva na kutimila miko yose ya Mnungu na mahinizo yakwe.’ "

"Want'hu wose nawo wagambe, Taile."