1 "Kila mwo uheelo wa kila mwaka wa mfungate nomuwalekele wose mkuwatigiza. 2 Ivo nivo nomdamanye. Kila yumwenga amkopeshe Mwizilaeli miyawe, ahause diliho idyo naho asekugeza kumgamba amlihe kwaviya Zumbe mwenye niye aungile liho idyo dihauswe. 3 Mwadaha kuwagamba wata kwiza wawaliheni mna Muizilaeli miyao nomlekele."

4 "Zumbe Mnungu nawavikile mwe isi akuwenk'hani kunda ugoli wenyu. Hahande na mnt'hu mkiwa mwa nyuwe, 5 uneva du mnamwiva na kumtimila kwa wengele kwa kiya akuwasigiilani dielo. 6 Ayo nayalaile kwaviya Zumbe Mnungu naawavikile enga ivo alongile. Nanywe nomzikopeshe si nyingi, mna nyuwe homkope. Mna si nt'huhu nezidamanye enga ivo mkuunga nyuwe mna nyuwe homdamanye enga ivo zikuunga si nt'huhu."

7 "Uneva eyuko Mwizilaeli miyenyu mkiwa mwe isi iyo Zumbe Mnungu akuwenk'hani, msekunda wagila kwake na kulemela kumwambiza. 8 Vituhu vakwe, mkopesheni kwa kuunga nyuwe wenye ivo vikumkint'ha mwenye. 9 Kauliseni mbuli ihile isekunda mwe miyoyo yenyu, mkagamba, mwaka wa mfungate ni mwaka wa kuwalekela awo kiwakopeshe nawo wihagihi, niyo mwawakaula wandugu zenyu wakiwa kwa wiihi na kulemela kuwenk'ha chochose, woho wadaha kumwiila Zumbe kwajili yenyu nanywe nomnde na masa. 10 Mwink'heni ndugu ywenyu mkiwa kwa moyo wedi haheina kulabila, kwa ayo, Zumbe Mnungu naawavikile mwe zindima zenyu zose na kila kint'hu nomdamanye. 11 Kwaviya hokuswese kunda na wakiwa mwe isi yenyu, ivo nawaungani, mnde wakise kwa wandugu zenyu, na kwa wakiwa na kwa want'hu heweina kint'hu mwe isi yenyu."

12 "Uneva nduguyo Mwizilaeli, mgosi hegu mvele anatagwa kwako, naakudamanyile ndima kwa miyaka mtandatu, mna mwo mwaka wa mfungate umlekele. 13 Umwo weye nawe unamlekela, usekumleka aite haena kint'hu. 14 Mwink'he kwa ukise kiya Zumbe akuvikile, ngoto na unga na divai. 15 Kumbukileni kugamba nyuwe nomnda watumwa kudya Misili naho Zumbe Mnungu nakawakombolani, nivo vikuleka nawasigiilani ivo dielo."

16 "Mna uyo mtumwa analemela kuhalawa hako, kwaviya akuungisa weye ne mp'huga yako naho mwikalanya vedi, 17 ivo, nouguhe singano na kumponk'hola mwe digutwi dyakwe mpaka iyo singano ingile mwo lwivi yehe naye naande mtumwa ywako mazuwa yose. Naho noumtendele iivo mtumwa ywako ywe kivele. 18 Naho usekuona vidala kumlekela mtumwa ywako, kwaviya kakudamanyila ndima kwa miyaka mtandatu kwa hant'hu hamwenga mwe viidi viligane va maliho ndima. Damanya ivo, na Zumbe Mnungu naakuvikile kwa kiya noudamanye."

19 "Mpaguileni Zumbe Mnungu, welekwa wa nk'hongo we zing'ombe ne zimbuzi ne zingoto. Usekuzidamanyiza ndima ng'ombe. Zimbuzi ne zingoto nazo usekuzikant'ha mazoya. 20 Kila mwaka, weye ne mp'huga yako mwiidiile nyama iyo hant'hu hasagulwe ni Zumbe kugamba want'hu wamvike aho. 21 Mna mfugwa uwo unanda na lema dyodyose diya, usekumlavila Zumbe Mnungu, Mnungu ywako. 22 Nomdye nyama iyo ukanda mwo mzi wako, naho wose wana uwedi hegu heweina uwedi wadaha kudya enga ivo wakudya nyama ya kapala hegu ya nk'hongoni. 23 Mna usekudya sakame yakwe, uitile du hasi enga mazi."