1 Musa nakagendeela kulonga na Waizilaeli wose mbuli izi, 2 niyo agamba, "Miye ivi haluse nna miyaka gana na milongo miidi, naho hina ludole lwa kudamanyisa ndima. Naho Zumbe Mnungu kanigamba henomboke mto Yolodani. 3 Zumbe Mnungu naawalongoele na kuwakoma want'hu we ziisi wakwikala mwo mto Yolodani, vileke mwiitahe isi yawe. Yoshua naande kilongozi ywenyu enga ivo Zumbe Mnungu ywenyu alongile. 4 Zumbe naawabanange want'hu we si izo enga ivo awabanange want'hu wa Sihoni na want'hu wa Ogu, maseuta wa Waamoli hamwenga na want'hu wawe na kuibananga isi yawe. 5 Zumbe naawatendeni muwahume, nanywe nomuwatendele enga ivo niwasigiileni. 6 Mtoge naho mkangale, naho msekogoha hegu kutiswa nawo, kwaviya Zumbe Mnungu naande hamwenga na nyuwe. Yehe haaleke kuwambiza hegu kuwaleka."

7 Ivo Musa amwitangaga Yoshua aho ha want'hu wa Izilaeli niyo amgamba, "Utoge naho ukangale, kwaviya ni weye nouwalongoze want'hu awa kugenda kuitaha isi iyo Zumbe Mnungu alagane na wakale wetu. 8 Zumbe niye naakulongoele na kunda hamwenga na weye, haaleke kukwambiza naho haawalekeni, use kogoha hegu kwingila chevu."

9 Ivo, Musa awandikaga Imiko ya Mnungu iyo, niyo awenk'ha walavant'hambiko awo Walawi wakwinula Disanduku dye Ndagano ya Zumbe, naho awenk'haga iviyaiviya wadala vilongozi wa Izilaeli. 10 Niyo awasigiila akagamba, "Kwo uheelo wa kila mwaka wa mfungate umwo mwaka wo kuusilwa matigizo ukanda hagihi, mzisome kwa izwi mwe dizua dye kinyemi dye viheha. 11 Nomzisome umwo want'hu wa Izilaeli wakeza kumvika Zumbe Mnungu hant'hu hamwenga aha asagule. 12 Waduganye want'hu wose wagosi kwa wavele, wana na watakwiza wakwikala mwo mizi wenyu, vileke kila yumwenga eve na kukehiniza kumvika Zumbe na kutimila zimbuli ze sigilizi izi kwa uhuwilwa. 13 Kwa sila iyo awo welekwa heweenati weve sigilizi za Zumbe Mnungu, nawahine kumwiva na kumtimila umwo wakekala kwe isi iyo mkwomboka mto Yolodani kugenda kuitaha."

14 Ivo, Zumbe niyo amgamba Musa, "Zuwa dyako dyo kubanika dihagihi. Mwitange Yoshua, mwize hant'hu aho Mnungu akudugana na want'hu vileke nimsigiile." Ivo Musa na Yoshua niyo waita kwe Dihema Dikukile, 15 Zumbe naye niyo awalaila uko mwo mkola we divunde. Mkola uwo we divunde wakimalaga he nk'hili ye dihema dikukile.

16 Zumbe niyo amgamba Musa, "Zuwa dyako dyo kubanika dihagihi, weye una banika want'hu nawande hi wahuwilwa kwangu, naho nawaileke indagano niikile nawo, nawanileke na kuvika milungu mituhu imwe isi iyo wakugenda kwikala. 17 Mwe dizuwa idyo, miye neniwafiile maya, name neniwaleke na kunda hale na woho, nawabanangwe. Nawapate makunt'ho na masulumizo mengi, naho nawagambe togoleni maihi aya yose yakipata kwaviya Mnungu hamuli mwetu. 18 Ikindedi neninde hale nawo kwaviya wadamanya mbuli ziihile na kuhitukila milungu mituhu."

19 "Haluse wandika ukemi uno, uwahinize want'hu wa Izilaeli unde uwona wangu mwawe. 20 Neni wegale mwe isi ina ugoli na ulozo enga ivo nawaikilaga kilapi wakale wawe. Uko nawande ne nk'hande zose wakuziunga naho nawagimbale mna nawa nilemele na kuleka indagano na kuvika milungu mituhu. 21 Nawapate maihi mengi na makunt'ho, ukemi uno nowabwiile ivo houjalwe na welekwa wawe. Kwaviya himanya kiya wakufanyanya hata ivi haluse, handa hinati kuwegala mwe isi iyo huwenk'ha."

22 Ivo, Musa awandikaga ukemi uno mwe dizuwa iidyo na kuwahiniza Waizilaeli.

23 Niyo Zumbe alonga na Yoshua, mwana Nuni akamgamba, "Utoge naho ukangale, kwaviya nouwalongoze Waizilaeli mwe isi iyo nilagane kuwenk'ha, name neninde hamwenga na weye."

24 Musa eze ibinde kuwandika zimbuli ze sigilizi ino mwe kitabu, 25 naho awenk'haga isigilizi ino Walawi wenulaga Disanduku dye Ndagano dya Zumbe, 26 "Guheni kitabu iki che sigilizi, mkiike hank'handa he Disanduku dye Ndagano dya Zumbe Mnungu vileke inde uwona mwa nyuwe. 27 Himanya ivo mwili msaguke na kunda wank'hani. Kauleni umwo handa nikei mgima na nyuwe, msaguka kwa Zumbe, nyuwe homsagukise umwo miye heza kunda hibanika? 28 Waduganye wadala vilongozi wose wa makabila yenyu na vilongozi wakulu wenyu vileke nipate luneka lwa kulonga mbuli izi wazive, mbingu nazo ne isi nezinde waona mwa woho. 29 Kwaviya himanya umwo habanika ikindedi nomnde waihi na kuileka sila niwasigiile muitimile. Naho mazuwa yakwiza mbuli ziihile neziwezileni kwaviya nomumtende Zumbe aihiwe kwa kudamanya ayo awalemezeni."

30 Musa niyo akema mbuli zose zo ukemi uwo ho mdugano wa Waizilaeli, kukongela bosi mpaka kwo kubindiliza.