Musa agendeelaga kugamba, 1 "Uneva kuna nk'humbizi mwa want'hu waidi, niyo wagenda kulamulwa kwe kitala, yumwenga niyo aoneka hana masa, mtuhu naye niyo anoka kunda na masa, 2 uneva mta masa kasengelwa kutoigwa ngoda, mlamuzi uyo namgambe agone hasi na kumtowa uwazilo wa ngoda kuviligane na masa yakwe. 3 Mta masa adaha kutoigwa ngoda milongo mine naho hiyo zikujink'ha aho. Mnombosa uwazilo uwo nomnde mumgela soni ndugu ywenyu."

4 "Usekuinyinya ng'ombe ikakwambiza kuhugusa uhule."

5 "Uneva wandugu waidi wa kilume wekala hant'hu hamwenga niyo yumwenga ywawe abanika, mkaza uyo abanike naalombigwe uumwo mwe mp'huga iyo. Nduguye dya uyo abanike naamguhe ande mkaziwe. 6 Nt'hulasasu we kilume neelekwe nawo naawazigwe kunda mwana ywa yudya mgosi abanike, vileke zina dyakwe dise kuuswa mwe Izilaeli. 7 Mna uneva uyo mndugu ywa uyo abanike anagamba hakumuunga uyo mvele abanikilwe ni mgosiwe, ivo uyo mvele naaite ha wakulu wo mzi uwo na kugamba, ‘Nduguye ywa mgosi ywangu alemela kunipala, hakuunga kukint'hiza ndima ya mnumangu abanike.’ 8 Niyo wakulu wo mzi uwo nawamwitange uyo mgosi na kulonga nae. Uneva alemela kumpala, 9 uyo mvele abanikilwe ni mgosiwe naamwitile aaho ha wadala wo mzi, naamhambule kilatu chakwe kimwenga na kumtweela mate mwe kihanga chakwe niyo amgamba, ‘Ivi nivo nevinde kwa mnt'hu hekuunga kumwelekela nduguye wana.’ 10 Naho zina dye mp'huga yakwe mwe Izilaeli neitangwe ‘mp'huga ya mnt'hu ahambulwe kilatu.’ "

11 "Uneva wagosi waidi watowana na mvele ywa yumwenga ywawe niyo awabasa akamgombele mgosiwe akutoigwa, niyo amtoza kwo ugosi wa uyo akumtowa mgosiwe, 12 noukant'he mkono wakwe wo kulume uyo mvele, msekumuonela mbazi."

13 "Msekunda na vihimo viidi va kuhimila, vikulu na vidodo. 14 Naho msekunda na vihimo vihengi vikulu na vidodo mwe kaya yako. 15 Mhimile na vihimo va kindedi na va hevikuhinya vileke mwikalise mwo wikazi wenyu mwe isi Zumbe Mnungu akuwenk'hani. 16 Wose wakudamanya ivo, Zumbe Mnungu aihiwa ne zimbuli izo."

17 "Kumbukileni kiya Waamaleki wawadamanyilagani umwo mwandaga mkalawa Misili, 18 mwandaga hawakumwogoha Mnungu naivo wawatowagani kunyuma umwo mwandaga msokela, naho wawakomaga wose wandaga wakeza kunyuma wahwele. 19 Umwo Zumbe Mnungu eze awenk'heni kuhumula kulawa kwa wank'hondo wenyu wose wakuwazungulukani mwe isi iyo Zumbe akuwenk'hani inde yenyu mwikale umwo, nomuwakome Waamaleki wose vileke wasekwiza kukumbukilwa naho. Msekujala mbuli ino."